Mo yeke sara asacrifice ndali ti Royaume?

1. Asacrifice wa azo mingi asara? Ngbanga ti nyen la ala sara ni?

AZO aye mingi ti sara asacrifice ndali ti aye so ayeke kota mingi na lê ti ala. Ababâ na amama ayeke mû ngoi ti ala, nginza ti ala, nga na ngangu ti ala ti bâ na lege ti amolenge ti ala. Azo so aye ti sara mandako na ngoi ti mbeni kota ngia ti awanguru, a yeke mû ngoi lâ na lâ ti manda ye ni nga ti leke tere ti ala ngangu juska ti si na ngoi ti mandako ni, atâa so akamarade ti ala ayeke sara ti ala ngia. Jésus nga kue asara asacrifice ndali ti aye so ayeke kota ye na lê ti lo. Jésus agi lani pëpe ti duti na aye ti nginza na yâ ti fini ti lo, lo yeke nga na molenge ape. Me ye so agbu bê ti lo ayeke ti mû maboko na Royaume ti Nzapa (Mat. 4:17; Luc 9:58). Adisciple ti lo nga kue asara asacrifice mingi ti mû maboko na Royaume ti Nzapa. Teti so Royaume ti Nzapa ayeke kota ye mingi na lê ti ala, ala sara asacrifice tongaso si ala mû tere ti ala kue ti mû maboko na ni (Mat. 4:18-22; 19:27). Tongaso, a lingbi e hunda tere ti e: ‘Nyen la ayeke kota ye mingi na lê ti mbi?’

2. (a) Asacrifice wa la a lingbi atâ Chrétien kue asara ni? (b) Ambeni sacrifice wa ambeni ita asara?

² Ambeni sacrifice ayeke dä so a lingbi atâ Chrétien kue asara ni. A yeke kota ye ti sara ni tongana e ye ti ngbâ ti duti na kpengba songo na Jéhovah. Asacrifice so a lingbi e sara ni, a yeke ti mû ngoi ti e nga na ngangu ti e ti sambela, ti diko Bible, ti voro Nzapa na yâ ti sewa, ti gue na abungbi nga ti fa tënë (Jos. 1:8; Mat. 28:19, 20; aHéb. 10:24, 25).a Na lege ti angangu so e yeke sara nga so Jéhovah airi tënë nzoni dä, kusala ti fango tënë ague na li ni mingi nga gbâ ti azo angbâ ti ga na “hoto ti da ti L’Éternel”. (És. 2:2). Ti mû maboko na kusala ti Royaume, aita mingi asara asacrifice ti sara kua na Béthel, ti mû maboko na sarango aDa ti Royaume nga na aDa ti assemblée, ti leke akota bungbi, wala ti mû maboko na azo so abâ pasi na peko ti aye tongana angu so asuku amû ndo wala asese so ayengi. Atâa so Jéhovah ahunda na e pëpe ti sara akua so kue si e wara fini, a yeke kota ye ti tene e sara ni ti mû maboko na Royaume ti Nzapa.

3. (a) Ye ti nzoni wa e yeke wara tongana e sara asacrifice ndali ti Royaume? (b) Ahundango ndo wa ayeke nzoni e hunda na tere ti e?

³ Laso, a yeke kota ye mingi ti sara ye kue so e lingbi ti sara ti mû maboko na Royaume ti Nzapa. E yeke na ngia mingi so aita mingi asara asacrifice ndali ti Jéhovah. (Diko Psaume 54:8.) Tongana e sara nga tongaso, e yeke duti na ngia mingi na ngoi so e yeke ku Royaume ti Nzapa (Deut. 16:15; Kus. 20:35). A yeke nzoni e oko oko kue e gbu li ti e na ndo ti ahundango ndo so: Ambeni ye wa la e lingbi ti sara ti mû maboko mingi na kusala ti Royaume? E yeke sara kua tongana nyen na ngoi ti e, nginza ti e, ngangu ti e nga na akode ti e? Nyen la a lingbi e girisa ape na ngoi so e yeke sara asacrifice? Zia e bâ tapande ti ambeni zo so asara asacrifice na bê ti ala wani so e lingbi ti manda ye dä. Ye so ayeke mû maboko na e ti duti na ngia mingi.

ASANDAGA SO AZO TI ISRAËL AMÛ GIRIRI

4. Na lege wa azo ti Israël ayeke wara lani ye ti nzoni na lege ti mungo sandaga?

⁴ A lingbi lani azo ti Israël ti giriri amû asandaga ti tene apardone asiokpari ti ala. Ti tene Jéhovah abâ azo ti Israël na nzoni lê a lingbi ala mû asandaga. Ambeni sandaga ni a hunda ni na ala hundango nga ambeni ala yeke mû ni na bê ti ala wani (Lév. 23:37, 38). A-offrande kue so azo-na-wa, a yeke a-offrande, wala amatabisi, so ala mû na bê ti ala wani, wala na nzobe na Jéhovah. Mbeni tapande ti sandaga so a mû na Jéhovah, a yeke na ngoi ti mungo temple na Jéhovah na ngoi ti Salomon.​—2 Chron. 7:4-6.

5. Ye wa Jéhovah aleke lani ti tene même awayere amû asandaga na lo?

⁵ Jéhovah ahinga nzoni mingi so azo alingbi pëpe ti mû a-offrande alingbi tere. Ni la lo hunda na zo oko oko ti mû gi ye so alingbi na ngangu ti lo. Ndia ti Jéhovah ahunda ti mû anyama na sandaga nga a lingbi a tuku mênë ti anyama ni. Asandaga so ayeke lani gi “gbede ti anzoni ye so ayeke ga” na lege ti Jésus (aHéb. 10:1-4). Me, Jéhovah aluti nganganga na ndo ti ndia so pëpe. Na tapande, Nzapa ayeda lani ti tene zo amû akolokoto na sandaga tongana lo lingbi pëpe ti mû ngasangbaga wala ngasa. Tongaso, même mbeni wayere alingbi lani ti mû sandaga na Jéhovah na ngia (Lév. 1:3, 10, 14; 5:7). Atâa so anyama so azo amû na sandaga na Jéhovah ayeke nde nde, lo hunda aye use na mbage ti azo kue so aye ti mû offrande ti nzobe.

6. Aye use wa Jéhovah ahunda lani na azo kue so aye ti mû a-offrande? Ngbanga ti nyen a yeke kota ye ti sara ye alingbi na ni?

⁶ Kozoni, a lingbi zo ti mungo offrande ni amû tâ nzoni ye ti lo so ahon atanga ni kue. Jéhovah atene na amolenge ti Israël so a lingbi nyama so ala yeke mû na offrande aduti nyama so ayeke nzoni mingi si lo “wara ngia” dä (Lév. 22:18-20). Tongana mbeni ye ti tere ti nyama ni abuba wala lo yeke na kobela, Jéhovah ayeke yeda na sandaga ni pëpe. Use ni, a lingbi zo so amû offrande ni asara pëpe mbeni ye so asara si lo ga sioni. Tongana zo ni asara mbeni ye so asara si lo ga sioni, kozo ti tene lo mû offrande ti nzobe, a lingbi lo mû offrande ti siokpari wala ti kengo-ndia ti tene Jéhovah abâ lo na nzoni lê awe si lo mû offrande ti nzobe ni (Lév. 5:5, 6, 15). Ye so ayeke kota ye mingi. Jéhovah amû commandement atene tongana mbeni zo so asara mbeni ye so asara si lo ga sioni ate nyama ti offrande ti siriri, so na yâ ni a yeke wara offrande ti nzobe, a lingbi a fâ lo (Lév. 7:20, 21). Me, tongana zo ni asara mbeni ye ti sioni ape nga nyama so lo mû na offrande ni ayeke nzoni, zo ni ayeke duti na ngia mingi.​—Diko 1 Chronique 29:9.

ASANDAGA SO E YEKE MÛ LASO

7, 8. (a) Ye ti nzoni wa aita mingi so asara asacrifice ndali ti Royaume awara? (b) Aye wa la e yeke na ni so e lingbi ti sara na sacrifice na Jéhovah?

⁷ Laso, aita mingi ayeke na nzara ti sara aye mingi na yâ ti kua ti Jéhovah, na Jéhovah ayeke na ngia mingi ndali ni. Tongana e sara kua ngangu ndali ti aita ti e, a yeke sara nga si e duti na ngia. Mbeni ita-koli, so ayeke mû maboko na kua ti lekengo aDa ti Royaume nga so ayeke mû maboko na aita so ayeke na yâ ti kpale ndali ti aye tongana angu so asuku amû ndo nga na asese so ayengi, atene so tere ti ni anzere mingi ti sara akua so. Lo tene: “Ti bâ ngia ti aita nga na singila ti ala na ngoi so ala yeke na yâ ti fini Da ti Royaume ti ala wala na ngoi so e mû maboko na ala na peko ti mbeni ngu so asuku amû ndo wala mbeni sese so ayengi, a sara si e bâ so akua kue nga na angangu kue so e sara ayeke senge pëpe.”

⁸ Laso bungbi ti Jéhovah ayeke gi lakue lege ti mû maboko na Royaume ti Nzapa. Na ngu 1904, Ita Charles Taze Russell atene so, a yeke nzoni e kue e sara kue ti mû ngoi ti e, ngangu ti e, nginza ti e nga na ambeni ye ti e ti mû gloire na Jéhovah. A lingbi ti hunda na e ye mingi ti sara asacrifice na Jéhovah, me e yeke wara aye ti nzoni mingi na pekoni (2 Sam. 24:21-24). E lingbi ti sara kua nzoni mingi ahon ti kozo na aye so e yeke na ni ti sara na sacrifice na Jéhovah?

9. Nyen la e manda na Luc 10:2-4 na ndo ti lege so e lingbi ti sara kua na ngoi ti e?

⁹ Ngoi ti e. A hunda ngoi mingi nga na ngangu mingi ti kiri na peko ti ambeti na yanga ti akodoro nga ti pete ni, ti leke aDa ti Royaume nga na aDa ti assemblée nga ti leke akota bungbi. A hunda nga ngoi ti mû maboko na azo so ayeke na yâ ti kpale ndali ti aye tongana ngu so asuku amû ndo wala sese so ayengi nga ti sara ambeni kua so ayeke kota mingi. Lango oko oko e yeke gi na angbonga 24. Jésus afa na e ambeni ye so e lingbi ti sara ti sara kua nzoni na ngoi ti e. Na ngoi so Jésus atokua adisciple ti lo ti fa tënë, lo tene na ala ti “luti ti bara zo na lege pëpe.” (Luc 10:2-4). Ngbanga ti nyen la Jésus atene na ala tongaso? Na ngoi ti Jésus, tongana mbeni zo aluti ti bara mba ti lo ayeke mû ngoi mingi, ala yeke bara gi zo na maboko ape. Me ala yeke gbu tere na kate lege mingi nga ala yeke kuku même na sese. Aye so kue ayeke mû ngoi mingi. Jésus atene lani pëpe na adisciple ti lo ti duti asioni zo. Me, lo yeke mû lani maboko na ala ti tene ala bâ so ala yeke na ngoi mingi ape nga a lingbi ala sara kua nzoni mingi na ni ti sara na aye so ayeke akota ye mingi (aÉph. 5:16). E lingbi ti sara ye alingbi na fango ye so ti wara ngoi mingi ti mû maboko na kua ti Royaume?

10, 11. (a) Ambeni kua wa la a yeke sara na ndo ti sese kue na a-offrande ti e? (b) Fango ye wa so ayeke na 1 aCorinthien 16:1, 2 alingbi ti mû maboko na e?

¹⁰ Nginza ti e. A hunda nginza mingi ti mû maboko na akua ti Royaume. Ngu oko oko amû gbâ ti nginza ti mû maboko na kua ti asurveillant so ague na ando nde nde, ti apionnier spéciale nga na ti amissionnaire. Ti londo na ngu 1999 ti ga na ni, a sara aDa ti Royaume ahon 24 500 na ando so aita ni ayeke na aye mingi ape. Me bezoin ti aDa ti Royaume 6 400 tongaso angbâ. Nze na nze ayeke sigigi na Tour ti Ba Ndo nga na Réveillez-vous! kutu 100. A sara akua so kue grâce na a-offrande ti ala.

¹¹ Bazengele Paul afa mbeni ye so e lingbi ti sara ye alingbi na ni tongana e ye ti mû a-offrande. (Diko 1 aCorinthien 16:1, 2.) Na gbe ti yingo ti Nzapa, lo wa aita ti lo ti Corinthe ti tene ala ku pëpe juska na nda ti yenga awe si ala zi mbeni ye abata ndali ti offrande, me ti zi ni na tongo nda ti yenga ni alingbi na ngangu ti ala. Legeoko tongana ti ngoi ti akozo Chrétien, laso aita ayeke leke ti bata mbeni ye alingbi na ngangu ti ala ti mû na a-offrande (Luc 21:1-4; Kus. 4:32-35). Jéhovah abâ na nene ni bibe so aita so ayeke na ni so.

12, 13. Ngbanga ti nyen ambeni zo alingbi ti pensé so ala lingbi pëpe ti mû ngangu ti ala nga na kode ti ala ti mû maboko na kua ti Royaume? Nyen la a lingbi ala girisa ape?

¹² Ngangu ti e nga na akode ti e. Jéhovah ayeke mû maboko na e na ngoi so e yeke mû ngangu ti e nga na akode ti e ti sara na kua ti Royaume. Lo tene so lo yeke mû maboko na e na ngoi so ngangu ahunzi na e (És. 40:29-31). E bâ so e yeke na akode mingi ape ti mû maboko na kua ti Royaume? E pensé so gi ambeni zo la alingbi ti sara ni nzoni mingi? E girisa ape so, Jéhovah alingbi ti sara si e sara kua nzoni na akode ti e, legeoko tongana ti so lo sara lani na Betsaléel nga na Oholiab.​—Ex. 31:1-6; bâ foto so ayeke na tongo nda ti article ni.

¹³ Jéhovah awa e ti zia si mbeni ye akanga lege na e pëpe ti mû ngangu ti e kue ti sara na lo (aProv. 3:27). Na ngoi so aJuif so ayeke na Jérusalem ayeke leke lani temple so abuba, Jéhovah atene na ala ti gbu li ti ala nzoni na ndo ti ye kue so ala yeke sara ti mû maboko na kusala ni (Ag. 1:2-5). Ala zia lani lê ti ala na ndo ti ambeni ye nde na ala zia kua ti Jéhovah na kozo ndo ape. A yeke nzoni e gbu li ti e ti bâ wala aye so ayeke kota ye na lê ti e ague oko na ye so Jéhovah aye. E lingbi ti gbu li ti e nzoni na ndo ti fini ti e ti bâ ambeni ye so e lingbi ti sara ti mû maboko mingi na Royaume ti Nzapa na yâ ti alango ti nda ni so?

E MÛ NA JÉHOVAH YE SO ALINGBI NA NGANGU TI E

14, 15. (a) Tapande ti aita so ayeke na yâ ti akodoro so ayeke na yâ ti yere amû maboko na e tongana nyen? (b) Nyen la a lingbi e sara?

¹⁴ Azo mingi ayeke na yâ ti akodoro so akpale nga na yere ayeke dä mingi. Bungbi ti Jéhovah ayeke sara kua ngangu ti mû maboko na aita so ayeke na yâ ti akodoro so (2 aCor. 8:14). Me, atâa so aita so ayeke na ye mingi pëpe, ala bâ na nene ni pasa so ala yeke na ni ti mû a-offrande. A nzere na Jéhovah mingi ti bâ so ala mû ye so ala yeke na ni na ngia.​—2 aCor. 9:7.

¹⁵ Na Afrika, na yâ ti mbeni kodoro so yere ayeke dä mingi, ambeni ita akä ambeni ye ti jardin ti ala na ala mû nginza ni ti tene amû maboko na kusala ti Royaume. Gi na yâ ti kodoro so, a leke lani ti sara Da ti Royaume. Aita ti kodoro ni aye ti mû maboko na kua ni. Me, kapa ni atï lani tâ gi na ngoi ti lungo ye na yaka. Teti so ala ye gi ti mû maboko na kua ni, na kota lâ ala sara kua ti Da ti Royaume ni nga na lakui ala gue na yaka ti lu ye. So tâ bibe ti sacrifice la! Ye so adabe ti e na aita ti Macédoine ti giriri. Ala yeke lani na yâ ti “kota yere”, me ala dema mingi na Paul ti zia lege na ala ti tokua nginza na aita ti ala (2 aCor. 8:1-4). Legeoko nga, zia e oko oko kue e ‘mû ye alingbi na ye so ayeke na e, na lege ti nzoye so Jéhovah Nzapa ti e amû na e.’​—Diko Deutéronome 16:17.

16. Nyen la a lingbi e sara si Jéhovah ayeda na asacrifice ti e?

¹⁶ Tongana e yeke sara asacrifice a lingbi e sara hange ti bâ na nene ni pëpe aye so ayeke kota mingi, na tapande azo ti sewa ti e. Legeoko tongana ti azo ti Israël ti giriri, a lingbi e sara kue si Jéhovah ayeda na asandaga ti e. A lingbi e girisa ape so bango lege ti sewa ti e nga na vorongo so e yeke voro na Jéhovah ayeke akota ye so a lingbi e sara ni. A lingbi e zia pëpe si ngoi so e yeke mû ndali ti aita ti e nga na aye so e yeke mû ndali ti ala asara si e bâ lege ti azo ti sewa ti e nzoni ape na lege ti yingo nga na lege ti mitele. Tongaso ape, a yeke mo bâ mo tene e gi ti mû na Jéhovah ye so e yeke na ni ape. (Diko 2 aCorinthien 8:12.) Na ndo ni, a lingbi e ngbâ ti kpengba songo ti e na Jéhovah (1 aCor. 9:26, 27). A yeke nzoni e hinga na bê ti e kue so tongana e sara ye lakue alingbi na aye so Bible afa, asacrifice so e sara ayeke sara si e duti na ngia nga Jéhovah ayeke “yamba” ni.

ASACRIFICE SO E SARA AYEKE KOTA YE MINGI

17, 18. Tënë ti bê ti e ayeke so wa na ndo ti aita so ayeke sara asacrifice ndali ti Royaume? Nyen la a yeke nzoni e kue e gbu li ti e na ndo ni?

¹⁷ Mingi ti aita ti e ‘atuku tere ti ala tongana offrande ti sämba’ na lege ti akua so ala yeke sara ti mû maboko na Royaume (aPhil. 2:17). E gonda mingi aita so ayeke sara asacrifice so. E gonda nga mingi awali nga na amolenge ti aita so ayeke mû li ni na yâ ti kua ti Royaume ndali ti bibe ti sacrifice so ala yeke na ni.

¹⁸ A hunda ti sara kua ngangu ti mû maboko na kua ti Royaume. A yeke nzoni e gbu li ti e na e gi ti bâ tongana nyen la e lingbi ti sara kua mingi na Jéhovah na e sambela ndali ni. Tongana e sara ni e yeke wara aye ti nzoni mingi laso nga “na yâ ti aye ti ngoi so ayeke ga” e yeke wara ni ande mingi ahon ti so.​—Marc 10:28-30.