Zia E Mu Mbage ti E Kue na yâ Kusala ti Kongo Le-kobe
1 Aprophète ti Jéhovah ti giriri nga na Jésus Christ mveni asala tene ti mbeni kusala ti bungbingo azo. (Es. 56:8; Ezéch. 34:11; Jean 10:16) Fadeso a yeke sala kusala so tongana a fa nzo tene ti Royaume na ndo sese kue. (Mat. 24:14) A yeke ba polele kangbi so ayeke na popo ti azo so asala na Nzapa na ala so asala na lo pepe. (Mal. 3:18) Ye so aye ti tene nyen teti e?
2 Mbeni kungba ti zo oko oko: E lingbi ti manda ye na lege ti tapande ti Paul, so amu li ni mingi na yâ kusala ti Chrétien. Lo ba so lo yeke na kungba na li ti lo ti fa tene si azo kue alingbi wara matabisi ti mä nzo tene na ti sö fini. Ye so apusu lo ti sala kusala lakue teti nzoni ti ala. (aRom. 1:14-17) Na bango sioni dutingo so azo ayeke na gbe ni laso, e yeke pepe na kungba ti kota ahon ti fa tene na azo so ayeke na yâ territoire so a mu na e?—1 aCor. 9:16.
3 Ngoi ti sala kusala fade fade: A lingbi ti haka kusala ti fango tene na kusala ti gingo ti sö fini ti azo. A lingbi a wara azo na a mu maboko na ala ti sö fini kozoni si ngoi ahon. Ngoi angbâ mingi pepe. Ye ti sioni ayeke hara fini ti azo! A yeke senge pepe si Jésus awa adisciple ti lo ti “sambela Mveni ti le-kobe ni si Lo to azo ti kusala ti fâ le-kobe ti Lo.”—Mat. 9:38.
4 Na hingango kota kusala so a lingbi a sala fade fade laso, awakua mingi ti Royaume akono mungo mbage ti ala na yâ kusala so asö fini. Mbeni pendere so iri ti lo ayeke Hirohisa alango na ndo so gi mama ti lo oko si abata lo na angambe ti lo ti koli na ti wali osio. Lo mu maboko na sewa ti lo ti wara nginza na londongo hio na ngbonga ota ti ndapelele ti kä ambeti-sango. Atä so kue, Hirohisa aye la ni ti sala mingi ahon na yâ kusala, tongaso lo to nda ti kusala ti pionnier permanent. Ambeni lege ayeke dä so mo lingbi ti mu mbage ti mo mingi ahon na yâ kusala so a yeke kiri ti sala ni mbeni pepe?
5 “Ngoi so angbâ ayeke mingi pepe.” (1 aCor. 7:29, NW) Tongaso, zia e sala ye kue so e lingbi ti sala na yâ kusala ti kota ahon so a yeke sala na ndo sese laso: fango tene ti Royaume na salango adisciple. Jésus ahaka la ni kusala so na kusala ti kongo le-kobe. (Mat. 9:35-38) Na mungo mbage ti e kue na yâ kusala ti kongo le-kobe so, alengo ti ngangu kusala ti e alingbi ti ndu mungo maboko na mbeni zo ti ga mbeni oko ti awavorongo mingi so asi singo, so a sala tene ti ala na Apocalypse 7:9, 10.