A Leke Ye “Mbilimbili na Lege Ni”
1 Ti tene mbeni kota bungbi ti district atambela nzoni, a lingbi a bungbi angangu mingi. Ndokua so aba tambelango ti assemblée ni aleke mbeni ndo ti bungbi so alingbi, nga lo mä tele ti futa ambeni ndo ti lango. Azo na asewa aleke ti tambela na ti wara mbeni ndo ti lango. Nga akongregation abungbi angangu so ala sala na bê ti ala mveni ti leke andokua mingi so a hunda ti sala si kota bungbi ni atambela. Nda ni ayeke ti tene ‘a sala ye kue mbilimbili na lege ni.’—1 aCor. 14:40.
2 Tongana mo bungbi ngangu ti mo legeoko na ti ala so aba lege ti kota bungbi ni, bata na li so a hunda anze, ngoi na ngoi angu, ti leke tele. Aita ngbangbo mingi amu angoi mingi ti leke na aye so. Ye so aba nga tene ti louengo ambeni ndo, ti bungbi agbakuru ti kusala na ti mu azo na kusala. Lekengo tele so kozoni aga na adeba nzoni mingi na azo kue na lege ti yingo. E lingbi ti sala nyen ti mu maboko?
3 E sala kusala maboko na maboko na aye so a leke teti ando ti lango: A yeke kota ye ti tene e kue e sala kusala maboko na maboko na aye so a leke teti kota bungbi. Ye so ayeke mbilimbili kota ye tongana e mä tele ti wara ambeni ndo ti lango. Biani, teti akota bungbi oko oko, a hunda ti wara ando ti lango ngbangbo mingi. Mingi ti aita ti e ayeke na nginza mingi pepe na a lingbi ala loué ambeni ndo so a hunda nginza mingi pepe. A sala ambeni ngangu mingi ti mä tele na ti wara ando ti lango. A lingbi e bi bê ti e na lege ti ndoye na aye so atia ambeni zo na e ‘gi ye teti e mveni pepe, me e gi ye teti ambeni zo nga.’—aPhil. 2:4.
4 Tongana e sala ye alingbi biani na afango lege ti Société ti wara ando ti lango, a yeke sala nzoni na azo kue so ye ni andu ala. Ti mu afango lege so na nene ni pepe aga na akpale senge senge. Na tapande, tongana zo ahunda ti tene a bata na lo mbeni ndo ti lango kozoni awe na lo ke ni na ndangba ngoi ni, a ye ti tene so mbeni ita nde awara ni pepe tongana lo sala la ni ngangu ti wara mbeni oko. Ye so alingbi ti hunda na aita ni ti tambela na yongoro ndo wala ti yeda na ando ti lango so ayeke nzoni mingi pepe. Ba tongana nyen a yeke nzoni ahon tongana e sala ye alingbi na tene ti yanga ti e, na tenengo “Oui, oui”! (Mat. 5:37) A lingbi azo so aita amu ndo ti lango na ala asala nga ye alingbi na akpengba-ndia so.
5 Akota lege so e lingbi ti sala kusala maboko na maboko: Ambeni kete ye ayeke dä so e lingbi ti sala kusala maboko na maboko na ye so a leke teti kota bungbi ti bata ambeni ndo ti lango na aita. (1) Sû iri ti mo nzoni na yâ mbeti Demande de chambre. (2) Ga pepe na ndo ti lango ni na azo ahon wungo ti ala so a fa na yâ ti mbeti Demande de chambre. (3) Mu mbeni nginza na azo so ayamba mo ti futa na ngu nga na wâ. (4) Tongana mbeni kpale asi na ndo ti lango ni, ba hio ndokua so aba tambelango ti kota bungbi ni. (5) Yekia na sala kusala maboko na maboko na ndokua so aba tambelango ti Kota Bungbi ni tongana a zia mo na mbeni ndo so azo mingi alango dä na so a kangbi yâ ni, oko teti aita-koli na mbeni oko teti aita-wali. Zia e sala kue ti yekia nzala ti ambeni zo nde ti duti gi ala oko na e sala ye lakue na lege ni.
6 Tongana awakua ti Jéhovah Nzapa, e yeke na matabisi ti fa lengo ti Nzapa na yâ ye kue so e sala. Ye so ahunda ti leke tele teti akota bungbi, ndo so a di iri ti Nzapa na ndo ni, na ti gue dä. Dabe ti mo, lo “yeke Nzapa so asala ye na lege ni, na Lo yeke Nzapa ti siriri.” (1 aCor. 14:33) Tongaso, zia e leke na bê ti e ti tene azo kue so aba e aba lengo so ti Jéhovah na lege ti ye so ala ba na yâ e: tambela ti e nga na salango ye ti e na ngoi so e leke tele teti Kota Bungbi ti District “Awafango Tene ti Nzapa” na ti gue dä. Zia azo ti be-ti-mbilimbili so aba e ahinga so a leke azo ti Jéhovah so abungbi “mbilimbili na lege ni.”—Ps. 68:27 (68:26, NW).