Mo Yeke Te Kobe ti Yingo Nzoni?

¹ Mbeni mato atene ‘kode ti tengo kobe ti e andu seni ti e.’ Biani, kode ti tengo kobe ti e ayeke ndu ngangu nga na seni ti e na lege ti mitele. Teti so Jésus atene la ni: “Fade zo angbâ na fini gi na lege ti mapa pepe, me na lege ti tene kue so asigigi na yanga ti Nzapa,” tongaso nga, akode ti tengo kobe ti e ti yingo alingbi ti sala nzoni wala sioni na e. (Mat. 4:4) Tongaso mo yeke te kobe ti yingo nzoni? Mo yeke zo so ayeke soro yâ ti kobe mingi? Mo yeke te kobe gi na loro? Wala mo yeke na ngia ti mu ngoi lakue ti te kobe ti yingo so ayeke na lege ni, na so amu ngangu na zo?

² Gingo nda ti kode ti tengo kobe ti mo: Jéhovah amu ‘kobe na tâ ngoi ni’ nga na “pumba ti ye ti mafuta” na lege ti “ngba ti be-ta-zo na ti ndara.” (Mat. 24:45, NW; Es. 25:6) Ti wara nzoni ye kue na lege ti akobe so a mu na ndoye, a lingbi e sala ngangu ti te kobe ti yingo nzoni.

³ Mo lingbi hunda tele ti mo mveni: ‘Mbi yeke diko lakue versê ti lâ oko oko nga na atene ti ndo ni? Mbi yeke diko na mbi gbu li nzoni na ndo Mbeti ti Nzapa lâ oko oko? Mbi yeke leke tele ti mbi teti abungbi ti kongregation na mandango aye ni kozoni? Mbi diko awe afini mbeti ti e so na popo ni a wara Prophétie ti Isaïe, Lumière Teti Azo Kue?’

⁴ Jésus amu zendo giriri: “Ngia ayeke na azo so ahinga ye ti yingo atia ala . . . Ngia ayeke na azo so nzala ti mbilimbili asala ala legeoko tongana nzala ti kobe na ti ngu asala zo, teti fade ala wara ye alingbi na nzala ti ala”. (Mat. 5:3, 6). Tongaso, te kobe ti yingo nzoni na salango si bibe nga na bê ti mo asi na hingango ye ti Nzapa.