E kono yâ ti kusala ti e na ngoi ti Mémorial
1. Amatanga so a “diko lâ ni awe” asala lani ngangu wa na ndo ti azo ti Israël so akpe mbito ti Nzapa?
1 Na angoi so a fa ni awe na yâ ti ngu ni, azo ti Israël ti giriri ayeke sala amatanga ti Jéhovah so “A diko lâ ni awe”. (Lév. 23:2). Mungo ngoi ti gbu li na ndo nzobe ti Nzapa ti ala aga na ala kota ngia na apusu ala ti duti na wâ teti vorongo so ayeke na sioni oko pëpe.—2 Chron. 30:21–31:2.
2, 3. Ngbanga ti nyen a yeke na lege ni ti kono yâ ti kusala ti e ti yingo na ngoi ti Mémorial? Na e yeke sala ande Mémorial ni lawa?
2 Laso, na yâ ti ngu oko oko akusala ti e ti Chrétien so aga na zo ngia ayeke gue na li ni mingi na ngoi ti Mémorial. A yeke mbeni ngoi so e yeke gbu li mingi na ndo kota matabisi so Jéhovah amû ni teti e: Molenge ti lo ngengele oko (Jean 3:16; 1 Pi. 1:18, 19). Tongana e yeke gbu li ti e na ndo ti ndoye so Nzapa na Molenge ti lo afa na mbage ti e, ye so ayeke pusu e ti gonda Jéhovah na ti sala ngangu ti sala ye so bê ti Nzapa aye.—2 aCor. 5:14, 15.
3 Na ngu so, a yeke sala Matanga ti Kobe ti Seigneur na jeudi lango 24 ti mars na peko ti lindango ti lâ. Tongana nyen e lingbi ti kono mungo mbage ti e na yâ kusala ti fango tënë na nze ti mars, avril na mai?
4, 5. (a) Ye nyen amû lani lege na mbeni ita ti ndu azo mingi na nzo tënë? (b) Ti mo, ye wa mo bâ so ayeke lë lengo na ndo so mo yeke dä?
4 Sala ngangu ti ndu azo mingi: Gi alege ti ndu azo mingi na ngoi so mo yeke bi tele ti mo na yâ kusala ti fango tënë. Mo lingbi ti leke ti mû mbage na yâ kusala ti fango tënë da na da na ngoi so azo ayeke mingi na kodoro? Na tapande, na peko ti midi wala lakui? Tongana ambeni zo na yâ groupe ti Mandango Buku ti mo ayeke na nzara ti fa tënë kozoni na ngoi ti mandango ye ni, surveillant ti groupe ni alingbi ti leke ti tene a sala mbeni ndulu bungbi ti fango tënë ti tene a sala kusala na yâ mbeni territoire so ayeke ndulu na groupe ni.
5 Mbeni lege nde ti ndu azo mingi ayeke ti fa tënë na ando so azo ayeke dä mingi. Atâa so lo yeke sala mbeni kua so amû ngoi ti lo mingi, mbeni ita-wali na kodoro ti Japon aye lani ti duti pionnier auxiliaire. Mbeni ancien amû na lo maboko na fango na lo so, kozoni ti gue na kua, lo lingbi ti fa tënë na ndo ti lege so ayeke ndulu na tele ti mbeni ndo ti lutingo ti atrain. Na peko ti so lo hon ndo ti kamene ti lo mveni nga na hengo ndo ti ambeni zo so lo na ala ayeke gue oko na lege ti kua, lo wara azo 40 so ahunda ti wara apériodique lakue lakue. Na popo ti ala a yeke wara azo so lo na ala ayeke tambela lakue na lege ti gue na kua, azo so ayeke sala kusala na ndo ti lutingo ti atrain nga na amveni ti amagazin so ayeke ndulu na ndo ni. Lo kangbi périodique ndulu na 235 nze oko oko. Na salango lisoro na azo lâ na lâ na ndo Mbeti ti Nzapa gi teti kete ngoi, lo wara lege ti manda Bible na azo omene.
6. Na lege wa amaseka alingbi ti kono yâ ti kusala ti ala ti yingo?
6 Alege so azi ti fa nzo tënë: Mingi ti awafango tënë so angbâ ti gue na da-mbeti ayeke na ambeni ngoi ti hungo tele na yâ ngu ni. A lingbi ti duti mbeni lege so azi na ala ti ga pionnier auxiliaire. Nga, amaseka Chrétien alingbi ti kono yâ ti kusala ti ala na fango tënë na ekole. Bê ti mo alingbi ti dö ti bâ so ambeni kamarade ti mo ti klase aye ti manda ye na ndo atënë ti mabe ti mo. Ngbanga ti nyen mo gbu pëpe ambeni ngoi ti salango lisoro na yâ ti klase wala ngoi ti adevoir ti fa tënë na ala? Ambeni awara lege ti sala tongaso na salango kusala na akasete vidéo ti bungbi. Ambeni ato nda ti sala étude ti Bible na akamarade ti ala ti klase na mungo maboko na ala ti maï juska ti wara batême. So ayeke anzoni lege ti “sepela iri ti L’Eternel”.—Ps. 148:12, 13.
7. (a) Tongana nyen mbeni ita-koli agbu alege so azi na lo ti fa tënë na ambeni zo? (b) Mara ye so asi na mo awe?
7 Na yâ akusala ti mo ti lâ oko oko, gi alege ti sala lisoro na azo na ndo ti nzoni Nzapa ti e nga na ndo apendere zendo ti lo. Mbeni ita-koli ayeke mû lakue gi a-oko train; na tongana lege ni ayeke dä, lo yeke fa tënë na azo so lo na ala ayeke tambela lakue legeoko na ndo lege ni. Na tapande, lâ oko oko na ngoi so lo yeke ku ti mû mbeni train, lo yeke sala lisoro ndulu na penze-ngbonga oku na mbeni maseka-koli. Ye ti pekoni ayeke so maseka-koli ni na mbeni kamarade ti lo ayeda ti manda Bible. Ala yeke sala étude ti Bible ni na yâ ti train. Na pekoni, mbeni mbakoro-wali so ayeke mä lisoro ni na yâ ti train ni aga ndulu na ita-koli ni na lo hunda ti manda Bible. A nzere na lo ti manda Bible lakue na alango so lo yeke mû na train. Na salango tongaso, ita-koli ni asala étude ti Bible nde nde na azo bale-oko na yâ ti train ni.
8. Akode wa alingbi ti mû lege na ala so ngu ti ala ague na li ni mingi wala ala so ayeke na kpale ti seni ti maï mungo mbage ti ala na yâ kusala ti fango tënë?
8 Ye ni ayeke duti tongana nyen tongana ngu ti mo ayeke mingi wala kpale ti seni azia katikati na yâ ye so mo lingbi fade ti sala? Alege alingbi ti duti dä ti tene mo maï lege ti sepela Jéhovah. Mo tara awe fango tënë na téléphone? Tongana mo hinga biani ti fa tënë na téléphone pëpe, sala tënë ni na surveillant ti groupe ti Mandango Buku ti mo. Lo lingbi ti leke ti tene ambeni wafango tënë so asala kusala na kode ni so awe asala kusala legeoko na mo. Ti sala kusala na tele ti mbeni mba ti mo alingbi ti mû lege na mo ti manda ye na mbage ti lo, ti mû maboko na mba nga ti fa tënë nzoni. A yeke wara ambeni nzoni wango na ndo lege ti fango tënë na téléphone na yâ Kusala ti Royaume ti février 2001, lembeti 5-6.
9. Tongana nyen e lingbi ti mû maboko na awamandango Bible ti mû mbage na yâ kusala ti fango tënë legeoko na kongregation?
9 Gango na Mémorial alingbi ti mû wâ na afini zo ti kono lege so ala yeke na ni ti sepela Jéhovah. Mo lingbi ti mû maboko na ala ti hon ndo ti ambito kue so ala yeke na ni na ndo alege kue so azi na ala ti fa tënë. A yeke na fango na ala peko ti anzoni ye so asi na yâ kusala ti fango tënë. Fa na ala yeke yeke ti sala tënë na ndo afango ye ti Bible na ti fa tënë ti mabe ti ala (1 Pi. 3:15). Tongana mbeni wamandango Bible afa na gigi nzara ti bê ti lo ti to nda ti kusala ti fango tënë, sala tënë ni na surveillant-président. Lo yeke leke ti tene a sala ande mbeni bungbi na wamandango ye ni ti fa na lo wala lo lingbi awe ti mû mbage na yâ kusala ti fango tënë legeoko na kongregation. Biani, a yeke mû ngia na bê ti Jéhovah ti bâ afini zo na mungo mbage ti kota yanga-ti-komande ti lo.—aProv. 27:11.
10. (a) Tongana nyen mbeni nzoni kapa alingbi ti mû maboko na e ti sala kusala ti pionnier auxiliaire? (b) Mo leke tele ti mo lani ti duti pionnier auxiliaire na ngoi ti Mémorial ti ngu so ahon? Na lege wa?
10 Mo lingbi ti ga pionnier auxiliaire? A lingbi a bâ na nene ni mingi ngbonga 50 so a hunda ni na apionnier auxiliaire (Mat. 5:37). So ti tene, na yâ yenga oko oko, a lingbi mo leke ti wara l’heure 12 tongaso. Mbeni oko ti atapande ti kapa ti kusala ti pionnier auxiliaire so a zia ni na lembeti 6 alingbi na mo? Tongana a lingbi na mo pëpe, mo lingbi ti leke mbeni kapa ni so ayeke mû ande lege na mo ti sala kusala ti pionnier auxiliaire na mars, avril wala mai? Hunda na Jéhovah ti hiri deba nzoni na ndo angangu ti mo ti kono yâ ti kusala ti mo.—aProv. 16:3.
11. Na lege wa a-ancien na aserviteur ti mungo maboko alingbi ti mû maboko na ala so ayeke sala ande kusala ti pionnier auxiliaire?
11 A-ancien na aserviteur ti mungo maboko ayeke mû ande maboko mingi na mo na yâ angangu so mo yeke sala ti mû ngoi ti Mémorial ti ga mbeni ngoi so ayeke nde ti gonda Jéhovah. Peut-être mingi na popo ti ala ayeke duti ande pionnier auxiliaire. A-ancien ayeke leke ande ambeni bungbi ti fango tënë na ambeni ngoi nde, na tapande na peko ti midi, na lakui ti asenge lango nga na anda ti yenga tongana a hunda ti sala tongaso. Ti hinga biani na ndo wa nga lawa si a lingbi ti sala abungbi ti fango tënë so, nga zo wa si alingbi ti mû ande li ni, a-ancien alingbi ti sala tënë ni na ala so ayeke na nzoni programme ti fango tënë ti pionnier wala ala so na bango ala, ala ye ti sala ni. A-ancien ayeke sala ngangu ti leke aye ti tene ambeni wafango tënë asala kusala legeoko na mo na alango nga na angbonga so mo leke awe teti fango tënë. Na lege so, akapa so a leke awe alingbi ti luti nzoni na kusala ni alingbi ti tambela nzoni.—aProv. 20:18.
12. Ye nyen ayeke pusu e ti sepela Jéhovah lakue?
12 Sala angangu kue: Tongana dutingo ti mo amû lege na mo pëpe ti duti pionnier auxiliaire, dabe ti mo so Jéhovah ayeke yeda na angangu nga na asandaga ti e ‘alingbi na ye so ayeke na e, lo hunda e pëpe ti mû ye so ayeke na e pëpe.’ (2 aCor. 8:12). E yeke na aye mingi so ndali ni e yeke kiri singila na Jéhovah. A yeke na lege ni si David atene: “Fade mbi sala tënë nzoni na L’Eternel lakue, na mbi sepela Lo na yanga ti mbi lakue.” (Ps. 34:2). Zia e leke na bê ti e ti sala tongaso na ngoi ti Mémorial so.
[Encadré na lembeti 3]
Mo lingbi ti kono yâ ti kusala ti mo tongana nyen?
◼ Fa tënë na ngoi so azo ayeke na kodoro
◼ Fa tënë na ando so azo ayeke dä mingi
◼ Tongana a zi lege ni na mo, fa tënë na place ti kua wala na ekole
◼ Fa tënë na lege ti téléphone
◼ Sala kusala tongana pionnier auxiliaire
[Kete tënë na lembeti 4]
(Bâ tanga ni na l. 7, na nduzu)
[Kete tënë na lembeti 7]
E kono yâ ti kusala ti e (Tanga ni)