Jéhovah afa ye na aberger ndali ti kundu ti lo

“L’Eternel amû ndara, hingango ye na hingango nda ti ye asigigi na yanga ti Lo.”​—APROVERBE 2:6.

1, 2. Ye nyen apusu akoli so awara batême awe ti gi ti wara ambeni kungba na yâ kongregation?

NICK so ayeke ancien ngbene ye ngu mbasambala, atene: “Bê ti mbi anzere lani mingi tongana a iri mbi na kusala ti ancien. Mbi bâ matabisi so tongana mbeni lege so azi na mbi ti kono yâ ti kusala ti mbi teti Jéhovah. Mbi bâ so a lingbi mbi kiri singila na lo teti ye kue so lo sara ndali ti mbi. Mbi ye nga ti mû maboko na amembre ti kongregation na ngangu ti mbi kue, ti mû maboko na ala tongana ti so ambeni ancien asara ndali ti mbi.” Me atâa so lo yeke na ngia, lo yeke nga na gingo bê. Nick angbâ ti tene: “Teti ade mbi wara ngu 30 pëpe si a iri mbi na kusala ti ancien, mbi hinga pëpe wala mbi yeke na akode so a hunda ti bata kongregation ni nzoni, akode tongana hingango nda ti ye nga na ndara.”

² Ala so Jéhovah azia ala ti bata kundu ti lo ayeke na anda ti tënë mingi ti duti na ngia. Bazengele Paul adabe ti a-ancien ti Ephèse na mbeni oko ti anda ti tënë so tongana lo fa peko ti atënë ti Jésus, lo tene: “Ngia ayeke na zo so amû ye, ahon ngia ti lo so akamata ye.” (Kusala 20:35). Ti sara kusala tongana serviteur ti mungo maboko wala ancien amû na akoli so awara batême awe ambeni lege ti mû ye na Jéhovah nga na kongregation. Na tapande, aserviteur ti mungo maboko ayeke sara kusala na tere ti a-ancien. Aserviteur so ayeke bâ nga lege ti gbâ ti akua so amû ngoi mingi me so a lingbi a sara ni. A yeke ndoye teti Nzapa nga teti amba ti ala si apusu aita so ti sara kota kusala so.​—Marc 12:30, 31.

3. Ngbanga ti nyen ambeni asara mbeto ti gi ti yô akungba na yâ kongregation?

³ Ka ti koli Chrétien so asara mbeto ngbanga ti so lo bâ so lo lingbi pëpe ti ga serviteur ti mungo maboko nga na pekoni ancien? Tongana ti Nick, lo lingbi ti gi bê ti lo so lo yeke pëpe na akode so a hunda ti duti mbeni nzoni berger. Mo ita-koli so mo wara batême awe, mo yeke na popo ti ala so ayeke na mara ti bibe so? Agingo bê ti mo ayeke na lege ni. Jéhovah ayeke hunda tënë na aberger na ndo sarango ye ti ala na kundu ni. Jésus atene: “Zo so a mû ye mingi na lo, fade a hunda ye mingi na tïtî lo; na zo so a mû ye mingi na lo ti bata, fade a hunda lo na ye mingi ahon.”​—Luc 12:48.

4. Tongana nyen Jéhovah amû maboko na ala so lo iri ala ti bata angasangbaga ti lo?

⁴ Jéhovah ayeke ku ti tene ala so lo zia ala tongana aserviteur ti mungo maboko na a-ancien ayô nene kungba so gi ala oko? Oko pëpe, lo mû maboko na ala nzoni ti sara gi kusala pëpe me ti tene ala sara ni nzoni. Tongana ti so article so aga kozo na so afa, Jéhovah amû yingo vulu ti lo na ala, so lengo ni amû maboko na ala ti bata angasangbaga ni na be-ti-ndoye (Kusala 20:28; aGalate 5:22, 23). Na ndo ni, Jéhovah amû na ala ndara, hingango ye na hingango nda ti ye (aProverbe 2:6). Tongana nyen lo yeke mû aye so kue? Zia e sara tënë na ndo alege ota so na yâ ni Jéhovah ayeke fa ye na azo so lo iri ala na kusala ti bata angasangbaga ti lo.

Aberger so akpengba awe afa ye na ala

5. Ngbanga ti nyen Pierre na Jean ayeke lani anzoni berger?

⁵ Lâ ni so abazengele, Pierre na Jean, ayeke na gbele Sanhédrin, ajuge ni so ayeke awandara ti sese so abâ ala tongana “azo so amanda mbeti pëpe, na ala yeke azo senge”. Ala hinga ti diko na ti sû mbeti, me ala manda ye na tïtî amaître ti ndia na ndo Mbeti ti Nzapa pëpe. Atâa so kue, Pierre na Jean nga na atanga ti adisciple aduti biani anzoni wafango ye, na ye so apusu lani azo mingi so amä ala ti ga awamabe. Ye nyen asara si asenge zo so aga akpengba wafango ye tongaso? Na pekoni so ajuge ni amä Pierre na Jean, “ala hinga biani ala yeke na tere ti Jésus giriri.” (Kusala 4:1-4, 13). Tâ tënë, ala wara lani yingo vulu (Kusala 1:8). Me a yeke polele nga so Jésus la afa ye na ala, na même awafango ngbanga so ayeke awaziba na lege ti yingo ahinga ni. Na ngoi so lo yeke na sese, Jésus afa na abazengele ni lege ti bungbi azo so ayeke tongana angasangbaga, nga lo fa na ala lege ti bata ala na pekoni so ala ga na yâ kundu ni.​—Matthieu 11:29; 20:24-28; 1 Pierre 5:4.

6. Tapande wa Jésus na Paul azia na ndo fango kusala na azo?

⁶ Na peko ti so a zingo Jésus na kuâ, lo ngbâ ti fa ye na ala so lo iri ala na kusala ti berger (Apocalypse 1:1; 2:1–3:22). Na tapande, lo mveni lo soro Paul na lo bâ ndo na ndo lege so a fa ye na lo (Kusala 22:6-10). Paul amû na nene ni mingi fango ye so lo wara na lo fa nga ni na ambeni ancien (Kusala 20:17-35). Na tapande, lo mû ngoi mingi na lo sara ngangu ti fa ye na Timothée ti duti “zo so alingbi” na yâ kusala ti Nzapa, “zo so ahinga kusala ni si kamene asara lo pëpe”. (2 Timothée 2:15). Mbeni kpengba songo amaï lani na popo ti akoli use so. Kozoni, Paul asû ye so na ndo Timothée, lo tene: “Lo sara na mbi na yâ kusala ti Tene-nzoni, legeoko tongana molenge asara na babâ ti lo.” (aPhilippien 2:22). Paul agi lani ti sara si Timothée wala mbeni zo nde aduti disciple ti lo pëpe. Nde na so, lo wa afon lo wamabe ti ‘sara tongana lo sara, legeoko tongana lo sara tongana Christ asara.’​—1 aCorinthien 11:1.

7, 8. (a) Tapande wa afa nzoye so ayeke ga tongana a-ancien amû tapande ti Jésus na Paul? (b) Na ngoi wa a yeke nzoni a-ancien ato nda ti fa ye na ala so alingbi ande ti ga aserviteur ti mungo maboko na a-ancien?

⁷ Na tapande ti Jésus na Paul, aberger so akpengba awe amû li ni ti fa kua na aita-koli so awara batême awe, na ala wara nga a-oko ye ti nzoni na pekoni. Bâ ye so asi na Chad. A bata lo na yâ mbeni sewa so azo ni asara anzapa nde nde, me ade ti ninga pëpe a iri lo na kusala ti ancien. Lo tene: “Teti angu mingi, a-ancien mingi so akpengba amû maboko na mbi ti maï na lege ti yingo. Teti so babâ ti mbi ayeke Témoin pëpe, a-ancien so abi bê ti ala na mbi na ala ga tongana ababâ ti mbi ti yingo. Ala mû ngoi ti fa na mbi ti fa tënë nzoni, na pekoni, mbeni ancien ni oko afa na mbi ti sara akusala ti kongregation so a mû na mbi.”

⁸ Tongana ti so ye so asi na Chad afa, aberger so ahinga ti bâ ndo ayeke to nda ti fa ye na ala so alingbi ande ti ga aserviteur ti mungo maboko na a-ancien a ninga kozoni si ala gue na li ni ti yô akungba tongaso. Ngbanga ti nyen? Ngbanga ti so Bible ahunda ti tene aserviteur ti mungo maboko na a-ancien aduti na nzoni tambela na ala kpengba na lege ti yingo kozoni si a iri ala na kusala. “A lingbi a tara ala so kozoni.”​—1 Timothée 3:1-10.

9. Kungba wa aberger biazo ayeke na ni? Ngbanga ti nyen?

⁹ Tongana a lingbi a tara aita-koli, a yeke na lege ni ti tene a fa ye na ala kozoni. Na tapande, tongana a hunda na mbeni wamandango mbeti na ekole ti sara mbeni ngangu kizama so awafango mbeti ni afa ye mbilimbili na ndo ni pëpe, fade lo yeke wara kizama ni? Biani, fade lo bi ni na ngu. Tongaso, fango ye ayeke kota ye. Ye oko, anzoni wafango mbeti ayeke fa mbeti na a-élève gi ti wara kizama pëpe, me nga ti sara kusala na hingango ye so ala wara. Legeoko nga, a-ancien so asara kua na bê kue ayeke gi ti mû maboko na aita-koli so awara batême awe ti lë aye so a hunda na zo so a iri lo na kusala na fango ye mbilimbili na ala. Ala sara ye so pëpe gi ngbanga ti so ala ye si aita-koli so aga aserviteur ti mungo maboko wala a-ancien, me nga ti tene ala lingbi ti bata kundu ni nzoni (2 Timothée 2:2). Tâ tënë, a lingbi aita-koli so awara batême awe asara mbage ti ala, na ala sara kua ngangu ti lingbi na kusala ti serviteur ti mungo maboko wala ti ancien (Tite 1:5-9). Me, aberger so akpengba awe alingbi ti mû maboko na ala ti maï hio tongana ala fa ye na ala na bê ti ala kue.

10, 11. Na lege wa aberger alingbi ti fa na azo ti yô ambeni kungba?

¹⁰ Tongana nyen, mbilimbili, aberger so akpengba awe alingbi ti fa na amba ti ala ti yô akungba na yâ kongregation? Kozoni kue, a yeke ti bi bê na aita-koli na yâ kongregation: ti fa tënë lakue legeoko na ala na ti mû maboko na ala ti maï akode ti ala ti ‘fa nda ti tene-biani na lege ni.’ (2 Timothée 2:15). Aberger so ayeke biazo ayeke sara lisoro na aita so na ndo ngia so ayeke ga tongana zo asara na amba ti lo, nga na ngia so ala mveni ayeke wara na ziango aye ti yingo na gbele ala na ti si dä. Na nzobe, ala mû ambilimbili wango na ndo lege so mbeni ita-koli alingbi ti ga “tapande ti kundu ni” nzoni ahon.​—1 Pierre 5:3, 5.

¹¹ Tongana mbeni ita aga serviteur ti mungo maboko awe, aberger ti ndara ayeke ngbâ ti fa ye na lo. Bruce, so ayeke ancien teti ngu 50 tongaso, atene: “Mbi ye mingi ti duti na tere ti mbeni fini serviteur ti mungo maboko na ti kiri ti bâ na lo awango ti ngbâ be-ta-zo na ti ndara. E yeke diko nga ambeni tënë so abâ mbilimbili kua ti lo, na pekoni mbi yeke sara kua na lo juska lo hinga kua ti lo ni nzoni.” Yeke yeke tongana serviteur ti mungo maboko ni ayeke kpengba, a lingbi ti fa na lo ye na ndo kusala ti berger. Bruce angbâ ti tene: “Tongana mbi na mbeni serviteur ti mungo maboko e yeke gue ti bâ aita, mbi yeke mû maboko na lo ti soro ambeni versê so alingbi ti wa zo wala sewa so e gue ti bâ ala na ti pusu ala ti sara ye. Ti manda lege ti sara kusala na aversê tongaso si a ndu bê ti azo ayeke kota ye mingi ti tene serviteur ni aga ande nzoni berger.”​—aHébreu 4:12; 5:14.

12. Tongana nyen aberger biazo alingbi ti fa ye na afini berger?

¹² Afini berger nga awara aye ti nzoni mingi na lege ti ambeni ye so a fa na ala. Nick, so e sara tënë ti lo fade, atene: “Ye so mbi manda na tïtî a-ancien use so ayeke kangba na mbi amû maboko na mbi mingi. Mingi ni, aita so ahinga lege so a lingbi a leke ambeni tënë. Lakue ala mû ngoi ti mä mbi na ala mû tënë ti mbi na nene ni, même tongana ala yeda na ni pëpe. Mbi manda ye mingi na bango lege so ala sara ye na mbage ti aita na yâ kongregation na tâ be-ti-molenge nga na yekiango ndo. Ala gboto lê ti mbi na ndo nene ti sara kua na Bible nzoni tongana a ndu lekengo akpale wala mungo wango.”

Tënë ti Nzapa afa ye na ala

13. (a) Nyen si mbeni ita-koli ayeke na bezoin ni ti tene lo ga mbeni nzoni berger? (b) Ngbanga ti nyen Jésus atene: “Tënë so Mbi fa na i ayeke ti Mbi pëpe”?

¹³ Na yâ Tënë ti Nzapa, Bible, biani a yeke wara andia, akpengba-ndia na atapande so mbeni berger ayeke na bezoin ni si lo ‘lingbi kue, na lo wara ye kue alingbi teti nzo kusala kue.’ (2 Timothée 3:16, 17). Mbeni ita-koli alingbi ti hinga mbeti nzoni, me hingango ye ti lo na ndo Mbeti ti Nzapa na kode so lo yeke sara kua na ni ayeke ye so ayeke sara si lo ga nzoni berger. Bâ tapande ti Jésus. Lo yeke berger ti yingo so ahinga ndo mingi, so a hinga nda ti ye mingi, na ti ndara mingi so sese ade abâ pëpe; kamême so kue, lo zia bê ti lo na ndara ti lo mveni pëpe tongana lo yeke fa ye na angasangbaga ti Jéhovah. Lo tene: “Tënë so Mbi fa na i ayeke ti Mbi pëpe, me a yeke ti Lo so ato Mbi.” Ngbanga ti nyen Jésus atene so tënë ti ni alondo na Babâ ti ni ti yayu? Lo fa nda ni: “Zo so asara tënë ti lo mveni, lo gi gloire ti lo mveni.”​—Jean 7:16, 18.

14. Tongana nyen aberger ayeke gi gloire ti ala mveni pëpe?

¹⁴ Aberger so ayeke be-ta-zo ayeke gi gloire ti ala mveni pëpe. Awango ti ala aluti na ndo ndara ti ala pëpe, me na ndo Tënë ti Nzapa. Ala hinga so kusala ti berger ayeke ti mû maboko na angasangbaga ti duti na “bibe ti Christ”, pëpe na bibe ti ala (1 aCorinthien 2:14-16). Na tapande, ye nyen alingbi ti si tongana mbeni ancien so ayeke mû maboko na mbeni koli na wali ti lo ti leke akpale ti mariage amû wango na lege ti aye so asi na lo, me pëpe na lege ti akpengba-ndia ti Bible nga na ambeti ti “ngbâ be-ta-zo na ti ndara”? (Matthieu 24:45, NW ). Angobo ti kodoro ni na ambeni ye so lo manda na yâ fini ti lo alingbi ti sara ngangu na ndo awango ti lo. Biani, angobo kue si ayeke sioni pëpe, na ancien ni alingbi ti hinga ye mingi na ndo ti gigi. Me angasangbaga ni ayeke wara nzoni mingi tongana aberger awa ala ti mä go ti Jésus na atënë ti Jéhovah ahon ti mä atënë ti azo wala atënë so alondo na yâ angobo ti kodoro ni.​— Psaume 12:7; aProverbe 3:5, 6.

“Ngbâa be-ta-zo na ti ndara” afa ye na ala

15. Kusala wa Jésus amû lani na “ngbâa be-ta-zo na ti ndara”? Ngbanga ti nyen kusala ni aga nzoni?

¹⁵ Abazengele tongana Pierre, Jean na Paul ayeke lani aberger na ala kue ayeke amembre ti bungbi so Jésus airi ni “ngbâa be-ta-zo na ti ndara”. Ngbâa so ayeke bungbi ti aita ti Jésus na sese so a sa yingo na ndo ti ala, so beku ti ala ayeke ti lë gbia na Christ na yayu (Apocalypse 5:9, 10). Na lâ ti nda ni ti aye ti sese so, wungo ti aita ti Christ so angbâ akiri na gbe ni. Ye oko, kusala so Jésus amû na ala ti sara, fango nzo tënë ti Royaume kozoni si nda ni aga, amû ndo laso mingi ahon ti kozo. Atâa so kue, bungbi ti ngbâa so asara kusala so nzoni mingi. Ngbanga ti nyen? Mbeni nda ni ayeke so ala fa kusala ni na ala so ayeke ti “ambeni ngasangbaga” ti mû maboko na ala na yâ kua ti fango tënë na fango ye (Jean 10:16; Matthieu 24:14; 25:40). Laso, a yeke bungbi ti abe-ta-zo so si ayeke sara kota mbage ti kusala ni.

16. Tongana nyen bungbi ti ngbâa ni afa ye na akoli so lo iri ala na kusala?

¹⁶ Tongana nyen bungbi ti ngbâa ni afa kusala so? Na ngoi ti akozo Chrétien, bungbi ti ngbâa ni atokua azo ti fa ye na asurveillant na ti zia afini ni na yâ akongregation, so na pekoni, a fa ye na angasangbaga ni (1 aCorinthien 4:17). A yeke legeoko nga laso. Wabatango Bungbi, so ayeke kete groupe ti a-ancien so a sa yingo na ndo ti ala so ayeke sara kua na iri ti bungbi ti ngbâa so, amû yanga na azo so lo tokua ti fa ye na aserviteur ti mungo maboko nga na a-ancien na ti zia afini ni na yâ ti akongregation saki mingi ti ndo lê sese. Na ndo ni, Wabatango Bungbi azia na sese a-ekole ti tene a fa ye na amembre ti aKomite ti filiale, asurveillant so ague na ndo nde nde, a-ancien na aserviteur ti mungo maboko si ala bata angasangbaga ni nzoni. A yeke mû nga awango na lege ti alettre, a-article ti Tour ti Ba Ndo nga na lege ti ambeni mbeti nde, tongana buku Bungbi so a leke ni ti sala ye so Jéhovah aye.a

17. (a) Tongana nyen Jésus afa so lo zia bê ti lo na bungbi ti ngbâa ni? (b) Tongana nyen aberger ti yingo alingbi ti fa so ala zia bê ti ala na bungbi ti ngbâa ni?

¹⁷ Jésus azia bê ti lo mingi na bungbi ti ngbâa ni, tongaso lo zia lo na ndo “ye ti lo kue”, so ti tene aye ti lo ti yingo kue so ayeke na ndo sese (Matthieu 24:47). Aberger so a iri ala na kusala afa nga so ala zia bê ti ala na bungbi ti ngbâa ni na sarango ye alingbi na awango so ala wara na tïtî Wabatango Bungbi ti lo. Biani, tongana aberger ayeke fa ye na amba ti ala, tongana ala zia si Tënë ti Nzapa afa ye na ala nga tongana ala sara kusala na awango ti bungbi ti ngbâa ni, ala yeke sara si kundu ni aduti beoko. So singila si e yeke na ni teti so Jéhovah afa ye na akoli so, na bê ti ala kue, ayeke bâ lege ti Chrétien oko oko na yâ kongregation!

[Kete tënë na gbe ni]

Fade mo kiri tënë tongana nyen?

• Tongana nyen aberger biazo ayeke fa ye na amba ti ala?

• Ngbanga ti nyen aberger ayeke fa ye ti li ti ala mveni pëpe?

• Tongana nyen nga ngbanga ti nyen aberger ayeke fa so ala zia bê ti ala na bungbi ti ngbâa ni?

[Afoto na lembeti 24, 25]

A-ancien ayeke fa ye na akoli so ade maseka na yâ kongregation

[Afoto na lembeti 26]

“Ngbâa be-ta-zo na ti ndara” ayeke fa ye mingi na a-ancien