E Mä Ye So Awe Pepe?

¹ Tâ tene biani! Na yâ ti Tene ti lo, Jéhovah akiri fani mingi na ndo abibe nde nde ti tene awakua ti lo awara ye ti nzoni dä. Fani mingi, Jésus akiri na ndo ti aye so lo fa kozoni awe na ndo ti ambage nde nde ti Royaume. Tongana giriri ala sala tene na aChrétien so gere ti ala aluti nzoni awe na yâ ti tâ tene, abazengele akiri lakue na ndo ti a-oko tene so andu ye ti yingo.​—aRom. 15:15; 2 Pi. 1:12, 13; 3:1, 2.

² Na ngoi ti e, bungbi ti Jéhovah abata si a kiri a fa akota tene lege mingi na ngoi ti abungbi ti kongrégation. A manda ambeni mbeti ti Société fani mingi. A yeke senge ye pepe ti kiri ti mä mbeni ye so e mä awe!

³ Ti kiri na ndo ye lege mingi ayeke kota ye: Adango bê ti Jéhovah akono ngangu ti e ti gbu nda ti aye, a sala si bango ndo ti e aga nzoni na a kpengba lekengo na bê ti e ti ngbâ na yâ kpengo loro ti aChrétien. (Ps. 119:129) Na ngoi so e kiri ti ba aye so Jéhovah ahunda nga na akpengba-ndia ti lo, a yeke tongana e ba ndo na yâ ti mbeni tatara. Ye so amu lege na e ti ba tele ti e nzoni na ti ke na ngangu bibe ti e ti duti gi ‘zo so amä Tene senge na lo glisa tene ni.’​—Jacq. 1:22-25.

⁴ Tongana e kiri lakue pepe na ndo ti atâ tene so e manda awe, fade ambeni ye nde ayeke sala ngangu na ndo ti bê ti e. Adango bê ti Nzapa amu ngangu na e ti luti na gbele angangu ti sese ti Satan so afuti lege ti zo. (Ps. 119:2, 3, 99, 133; aPhil. 3:1) Adango bê so a mu lakue na ndo ti gango tâ tene ti aye so Nzapa aleke ti sala apusu e ti ‘bata.’ (Marc 13:32-37) Kiringo lakue na ndo atâ tene ti Bible amu maboko na e ti ngbâ na ndo ti lege so ague na fini ti lakue lakue.​—Ps. 119:144.

⁵ Tongana nyen ti wara ye ti nzoni dä: A lingbi e ‘leke bê ti e ti mä adango bê ti Nzapa.’ (Ps. 119:36, NW) Na bungbi, tongana a sala tene ti mbeni tene so e hinga nzoni, a lingbi e leke tele ti e, e diko aversê so amu na yâ ni na e gbu li ti e na ndo lege ti sala ye alingbi na awango ni. E ba dango bê so e sala na Ekole ti kusala ti théocratie tongana mbeni senge ye pepe, na bingo bê so a yeke ga na e ye oko pepe. (Luc 8:18) Zia e bata si e ga lâ oko pepe azo so abi bê ti ala pepe na ndo ye so a yeke fa na tenengo so, fani mingi, a kiri na ndo akozo gere ti tâ tene na ngoi ti abungbi.​—aHéb. 5:11.

⁶ Zia e duti na mara ti bibe ti wasungo psaume so: “Bê ti mbi asi na kota ngia teti atene ti dango bê ti mo, legeoko tongana a sala teti tanga ti aye ti ngele ngangu.” (Ps. 119:14, NW) Tâ tene, e mä kozoni awe afango ye ti ngele ngangu so, na e yeke kiri ande ti mä ni, teti Jéhovah ahinga nzoni so a lingbi e mä ni!