Fa so mo bi bê na zo ni: Gonda lo
1 Tongana e gonda azo na bê ti e kue, a yeke mû wâ na bê ti ala, a yeke pusu ala ti sara ye nga a yeke mû na ala ngia. Awafango tënë mingi abâ so tongana ala tene mbeni kete tënë ti gonda na azo ni na bê ti ala kue, mingi ni azo ni ayeke nduru ti mä ala. Na ngoi so e yeke gi ti fa nzo tënë na azo, tongana nyen si e lingbi ti gonda ala?
2 E duti azo so ahinga ti bâ ndo: Tongana Jésus Christ akiri na yayu, lo bâ na nzoni lê anzoni ye so ambeni kongregation ti Asie Mineure asara (Apoc. 2:2, 3, 13, 19; 3:8). Legeoko nga, tongana e bi bê ti e biani na azo so e tingbi na ala na fango tënë, a yeke pusu e ti gi ti bâ ambeni ye so e lingbi ti gonda ala ndali ni. Na tapande, tongana zo ni aleke yâ ti gbagba ti lo pendere, wala lo yeke fa ndoye na amolenge ti lo, wala lo ga lo bara e na ngia na yanga, e lingbi ti gonda lo ndali ni. Mo yeke nduru ti bâ aye so na ti gonda azo ni ndali ni?
3 E mä zo nzoni: Na ndembe so mo yeke fa tënë na azo, hunda na ala ambeni mbilimbili tënë ti tene ala fa tënë ti bê ti ala. Fa so mo yekia ala na lege so mo dengi mê na tënë so ala tene (aRom. 12:10). Peut-être, mo yeke wara ande mbeni tënë so mo lingbi ti gonda ala ndali ni na ti sara lisoro dä.
4 E sara ye na ndara: Tongana zo ni atene mbeni tënë so ague nde na ti Bible, a yeke nzoni e sara nyen? Ahon ti ke tënë ti lo ni, e kiri singila na lo ndali ti tënë so lo tene, na e tene mbeni tënë tongana “Mbi bâ so tënë ni agbu bê ti mo mingi.” (aCol. 4:6). Atâa tongana zo ni aye ti papa na e, e lingbi lakue ti gonda lo ndali ti so lo fa so tënë ni agbu bê ti lo biani. Ti sara ye tongaso alingbi ti sara si bê ti zo so ake kozoni ti mä nzo tënë awoko.—aProv. 25:15.
5 Ti tene gondango ndo ti e anzere na zo ni, a lingbi atënë ni alondo na bê ti e. Tongana e tene mara ti atënë so akpengba azo, a yeke mû gonda na Jéhovah nga a lingbi ti pusu azo ti mä nzo tënë ti Royaume.