Abe-ta-zo so azia na e tapande
1 Na ngu 1937, mbeni fini lege ti fango tënë na ngoi kue abâ gigi: kusala ti pionnier spécial. Aita-koli na aita-wali so ayeke na nzoni kode ti fango tënë ayeda na bê kue ti gue ti fa tënë na ndo kue so bungbi ti Jéhovah atokua ala dä. A sara angu mingi fadeso awe so apionnier spécial angbâ ti zia nzoni tapande so a yeke nzoni ti mû pekoni.—aHéb. 6:12.
2 Ala mû li ni na yâ kusala ni: Apionnier spécial ayeke akozo zo so amû afonono na asembe ti bia so a zia adiskur na ndo ni ti fa tënë na azo na yanga-da ti ala. Ala sara nga kusala na atënë ti yâ ni ti sara lisoro na azo na ngoi so ala kiri ti bâ ala. Ala yeke sara lani tongaso na yâ ti akota gbata so akongregation ayeke dä kozoni awe. Na pekoni, a yeke tokua lani apionnier spécial na ando so bezoin ti awafango tënë ayeke dä. Ala yeke kiri ti bâ azo kue so asara nzara ti tënë ni na ala sara a-étude. Ye ti peko ti angangu kue so ala sara ayeke so afini kongregation mingi mingi abâ gigi. Wâ so ala yeke na ni na fango tënë asara si kusala ni ague na li ni mingi tongana ti so e bâ ni laso (Es. 60:22). Apionnier spécial angbâ ti mû maboko mingi na kusala ti fango nzo tënë si a ndu “azo kue na gbe ti yayu”.—aCol. 1:23.
3 Tapande so a yeke nzoni ti mû ni: Ambeni pionnier spécial ayeke na yâ ti kusala ti ngoi kue a sara angu mingi awe. Tongana ngu ayeke hon, aye nde nde so ayeke si na aita so, so ayeke be-ta-zo, asara si mabe ti ala akiri akpengba (1 Pi. 1:6, 7). Ala yeda ti gbanzi tere ti ala na ambeni kungba tongaso si ala lingbi ti sara kua na ando so a yeke na bezoin ti ala dä. Ambeni aga mbakoro awe na ala tingbi na akpale ti seni wala ambeni kpale nde (2 aCor. 4:16, 17). Ye oko, “na lâ ti mbakoro ti ala,” ala ngbâ lakue ti “lë lengo”. (Ps. 92:15). Ala zia bê ti ala kue na Jéhovah na ala bâ so lo yeke iri deba nzoni na ndo ti ala.—Ps. 34:9; aProv. 10:22.
4 Apionnier spécial alingbi biani na gonda ti e. Tongana mo yeke na matabisi ti wara apionnier spécial na yâ ti kongregation ti mo, gbu lege so azi na mo so ti duti nduru na ala si mo wara aye ti nzoni dä. Ndali ti so ala yeke awafango tënë ti Royaume so ayeke be-ta-zo, fa so mo bâ na nene ni kusala ti ala. Zia si tapande ti gbungo ngangu ti ala akpengba mo. Azo kue so amû tapande ti mabe ti ala, Jéhovah ayeke yeda na ala na lo yeke iri deba nzoni na ndo ti ala ndali ti so “azo so asara ye na lege ti tene-biani, ala mû ngia na Lo.”—aProv. 12:22.