Mû maboko na azo so ayeke nduru pëpe ti manda buku Bible afa
1. Azo kue la ayeke ka nduru ti manda buku Bible afa na kozo tingbingo tere ti e na ala? Fa ndani.
1 Ti tene mbeni zo aga wakua ti Jéhovah, a lingbi lo manda ye so Bible afa. Ye oko, ambeni zo ayeke dä so ala yeke na yâ ti bungbi ti vorongo nzapa so ayeke ti aChrétien pëpe na ala bâ ti ala Bible pëpe tongana Tënë ti Nzapa. Ambeni amä na bê oko pëpe na Nzapa nga ala bâ Bible na nene ni pëpe. Aye wa la alingbi ti mû lege na e ti mû maboko na azo so ayeke nduru pëpe ti manda buku Bible afa? Awango so na gbe ni ge so aluti na ndo ti aye so awafango tënë ti yâ ti akodoro 20 atene.
2. Tongana mbeni zo atene na e so lo mä na bê na Nzapa pëpe, nyen la a lingbi e gi ti hinga ni, na ngbanga ti nyen?
2 Azo so amä na bê na Nzapa pëpe: Tongana mbeni zo atene so lo mä na bê na Nzapa pëpe, a yeke nzoni ti hunda lo ngbanga ti nyen. A yeke ngbanga ti so lo mä na bê na tënë ti évolution? Lo zia ti mä na bê na Nzapa ndali ti aye ti kirikiri so ayeke si na yâ ti dunia wala ndali ti sarango ye na handa so ayeke na yâ ti abungbi ti vorongo nzapa? Lo londo na mbeni kodoro so a kanga lege na azo ti yâ ni ti mä na bê na Nzapa? Peut-être lo ke biani pëpe so Nzapa ayeke dä, me lo ye lâ oko pëpe ti mä na bê na lo. Mingi ti awafango tënë abâ so ti hunda zo ni: “Depuis lawa la mo mä na bê na Nzapa pëpe?” ayeke pusu zo ni ti fa tënë ti bê ti lo. Mä lo na mo fâ tënë na yanga ti lo pëpe. Tongana e hinga ngbanga ti nyen zo ni ake ti mä na bê na Nzapa, e yeke hinga tongana nyen e lingbi ti kiri tënë na lo nga mbeti wa e lingbi ti mû na lo.—aProv. 18:13.
3. Tongana nyen la e lingbi ti fa so e ne azo nga na atënë ti mabe ti ala?
3 Na ngoi so mo yeke kiri tënë, sara kue ti kpe ti tene zo ni abâ so mo yeke kasa bango ndo ti lo. Bâ tënë so aita ti États-Unis atene: “A yeke kota ye mingi ti tene a ne liberté ti azo kue ti soro ti mä na bê na ye so ala ye. Ahon ti fa na azo so e la e hinga ye mingi, a yeke nzoni ti hunda atënë so asara si azo ni wani agbu li nga ala mû desizion.” Na peko ti so lo mä mbeni zo so afa atënë ti bê lo kue awe, mbeni surveillant so ague na ndo nde nde ato nda ti kiringo tënë ti lo na lege ti hundango tënë so: “Mo tara lâ oko awe ti bâ ye ni tongana ti so ge so?”
4. Tongana nyen la e lingbi peut-être ti mû maboko na azo so ayeke aBoudhiste?
4 Tënë Nzapa ayeke mbeni ye so mingi ti aBouddhiste ahinga ni pëpe. Ambeni wafango tënë na Grande-Bretagne aye mingi ti sara kusala na brochure La paix et le bonheur durables : comment les trouver tongana ala yeke fa tënë na mara ti azo tongaso. Na peko ti so ala bâ kozo tënë ni awe, ala yeke sara lisoro na ndo ti mbage so atene “Existe-t-il vraiment un Créateur Très-Haut ?” nga na mbage so atene “Un guide bénéfique pour tous les humains.” Na pekoni, ala lingbi peut-être ti mû na lo buku Bible afa na ti tene: “Même tongana mo mä na bê na Nzapa pëpe, mandango Bible ayeke nzoni ngbanga ti so a yeke wara gbâ ti apendere wango na yâ ni.” Mbeni ita-koli pionnier na gbata ti Amerika so ayeke fa ka tënë na yâ ti territoire ti azo so ayeke tene yanga ti Chinois atene: “Azo mingi na yâ ti territoire ti e aye dikongo mbeti mingi. Mingi ni ala yeke hunzi ti diko mbeti ni kue kozo si e kiri ti bâ ala. Ye oko, ala hinga pëpe ye so aye ti tene mandango Bible. Tongaso mbi ye ka ti mû na ala brochure Nzoni tënë na kozo tingbingo tere ti mbi na ala ngbanga ti so a sû ni na mbeni lege so apusu zo ti sara lisoro.” Mbeni surveillant ti circonscription so ayeke sara kusala na yâ ti territoire ti azo so ayeke tene yanga ti Chinois na Amerika afa so mo lingbi même ti zia buku Bible afa gi na kozo gango ti mo. Ye oko, a yeke peut-être nzoni ti tene mo to nda ti étude ni na chapitre 2, so asara tënë na ndo ti Bible, ahon ti tene mo to nda ni na chapitre 1 so asara tënë na ndo ti Nzapa.
5. Ngbanga ti nyen a yeke kota ye ti duti na kangango bê ti ku?
5 A hunda ngoi mingi ti tene mbeni zo amä na bê na Nzapa, tongaso a yeke kota ye ti duti na kangango bê ti ku. Akozo lisoro ti e alingbi peut-être pëpe ti pusu mbeni zo ti yeda so Nzapa ayeke dä. Me peut-être na pekoni zo ni ayeke yeda so peut-être Nzapa ayeke dä, wala lo lingbi ti tene so lo hinga awe ndani so azo ayeke tene so Nzapa ayeke dä.
6. Ngbanga ti nyen ambeni zo asara nzara ti tënë ti Bible pëpe?
6 Azo so asara nzara ti tënë ti Bible pëpe wala so ake ti zia bê na ni: Ye oko, mingi ni mbeni zo so ayeda so Nzapa ayeke dä, alingbi ti ke aye so Bible afa ngbanga ti so lo mä na bê pëpe so Bible ayeke Tënë ti Nzapa. Peut-être lo lango na yâ ti mbeni kodoro so aChrétien ayeke dä pëpe na lo bâ Bible tongana mbeti ti azo so atene ala yeke aChrétien. Wala lo lango na yâ ti mbeni kodoro so azo ti yâ ni atene ala yeke aChrétien me so sarango ye ti ala afa so ala yeke aChrétien pëpe na lo pensé so Bible alingbi ti mû maboko na lo pëpe. Tongana nyen la e lingbi ti mû maboko na mara ti azo tongaso ti sara nzara ti tënë ti Bible na ti yeda mbeni lâ ti manda buku Bible afa?
7. Nzoni lege ti zia nzara ti Bible na bê ti azo ayeke so wa?
7 Filiale ti Grèce atene: “Nzoni lege ti mû maboko na azo so asara nzara ti tënë ti Bible pëpe a yeke ti zi Bible ni na ti fa na ala ye so ayeke na yâ ni. Mingi ti awafango tënë abâ so ngangu so tënë ti Bible alingbi ti sara na ndo ti bê ti zo ayeke mingi ahon atënë kue so ala lingbi ti tene na zo ni (aHéb. 4:12). Bango iri ti Nzapa na yâ ti Bible amû maboko na azo mingi ti maï nzara ti diko Bible.” Filiale ti Inde atene: “Tâ tënë na ndo ti azo so ayeke na fini na azo so akui awe nga zendo so Bible amû teti mbeni sese so tënë ti kangbi na tënë ti mara ayeke dä pëpe, a yeke biani ye so andu bê ti mingi ti aHindou.” Ti hinga akpale so azo ayeke na ni na yâ ti aterritoire ayeke mû lege na awafango tënë mingi ti fa ye so Bible atene na ndo ti ye so Royaume ti Nzapa ayeke sara ande ti leke na akpale ni.
8. Nyen la e lingbi ti tene na azo so ayeke na nzoni bango ndo pëpe na ndo ti Bible ndali ti sarango ye ti tere ti azo ti a-eglize?
8 Tongana mbeni zo ayeke na nzoni bango ndo pëpe na ndo ti Bible ndali ti sarango ye ti tere ti azo ti bungbi ti vorongo nzapa ti wataka, fa na lo so abungbi ti vorongo nzapa ti wataka aba yâ ti afango ye ti Bible. Filiale ti Inde asû mbeti atene: “Ngoi na ngoi, e yeke na bezoin ti mû maboko na azo oko oko ti bâ so a yeke pëpe azo ti a-eglize la ayeke awa ti Bible.” Ala fa so bê ti aHindou mingi adö na bango mbage 4 ti brochure Quel est le but de la vie? Conmment le découvrir?, so afa tongana nyen a-eglize atara ti ba yâ ti tënë ti Nzapa na ala ye ti futi ni. Mbeni ita-koli pionnier na kodoro ti Brésil atene na azo, lo tene: “Ngbanga ti nyen mo gi pëpe ti hinga aye mingi na ndo ti atënë ti yâ ti Bible? Azo mingi ayeke sara tongaso na kite na bê kozo ape, sân ti tene a hunda na ala ti ga amembre ti mbeni eglize. Mo yeke manda ande aye mingi.”
9. Ngbanga ti nyen a lingbi e kiri na peko pëpe tongana mbeni zo asara pëpe nzara ti hinga ye so Bible afa na tongo nda ni?
9 Jéhovah ayeke bâ bê ti zo oko oko kue (1 Sam. 16:7; aProv. 21:2). Lo yeke gboto azo so bê ti ala ayeke mbilimbili ti ga na yâ ti tâ vorongo (Jean 6:44). Mingi ti ala ayeke mara ti azo so afa tënë ti Nzapa na ala lâ oko pëpe wala so ahinga ye gi kete na ndo ti Bible. Fango tënë ti e amû lege na ala ti ‘sö fini ti ala na ala si na tâ hingango ye na ndo ti tâ tënë.’ (1 Tim. 2:4). Tongaso, tongana ambeni zo asara pëpe nzara ti hinga ye so Bible afa na tongo nda ni, kiri na peko pëpe! Sara kusala na mbeni oko ti agbakuru so ayeke na yanga ti kodoro ti mo ti pusu ala ti sara nzara ti tënë ni. Yeke yeke, mo lingbi peut-être ti kiri na lisoro ni na yâ ti kozo gbakuru ti e ti mandango Bible na azo, so ayeke buku Bible afa nyen biani?
[Encadré na lembeti 4]
Tongana zo ni atene so lo mä na bê na Nzapa pëpe, tara ye so ge:
• Ti hinga ndani, hunda lo: “Depuis lawa la mo mä na bê na Nzapa pëpe?”
• Tongana lo yeke mbeni Bouddhiste, sara kusala na brochure La paix et le bonheur durables : comment les trouver, lembeti 9-12.
• Tongana lo mä na bê na tënë ti évolution, ambeti so ge alingbi peut-être ti mû maboko na lo:
A-article ti yâ ti Réveillez-vous! “Hasard ou conception ?”
Vidéo: Les merveilles de la création révèlent la gloire de Dieu
Abrochure: Une vie pleinement satisfaisante : Comment ?, mbage 4; La vie a-t-elle été créée ? nga na Cinq questions à se poser sur l’origine de la vie
• Tongana lo zia ti mä na bê na Nzapa ndali ti aye ti kirikiri nga na pasi, ambeti so alingbi ti mû maboko na lo:
Buku: Y a-t-il un Créateur qui se soucie de vous ?, chapitre 10
Abrochure: Nzapa abi be ti lo biani na ndo ti e?, mbage 6, na Quel est le but de la vie?, mbage 6
• Gue na lo hio na yâ ti buku Bible afa tongana zo ni ato nda ti yeda so Nzapa ayeke dä. Peut-être ayeke nzoni ti to nda ni na chapitre 2 wala na mbeni chapitre nde so agbu bê ti lo.
[Encadré na lembeti 5]
Tongana zo ni amä na bê na Bible pëpe, tara ti sara kusala na ye so:
• Buku La vie: comment est-elle apparue? Évolution ou création? chapitre 17 na 18
• Na aHindou, sara kusala na brochure Pourquoi adorer Dieu en amour et en vérité?
• Na aJuif, sara kusala na brochure Connaîtrons-nous un jour un monde sans guerre?, lembeti 3-11.
• Sara lisoro na lo na ndo ti aye ti nzoni so ayeke ga na sarango ye alingbi na afango ye ti Bible. Ambeti so mo lingbi ti sara na kusala ti fa nene ti awango ti Bible na mbeni zo ayeke so:
A-article ti yâ ti Réveillez-vous! : “De l’aide pour les familles”
Vidéo: La Bible : une force dans votre vie
Abrochure: Nzoni tënë so alondo na Nzapa!, aye ti manda 9 na 11; Un livre pour tous, lembeti 22-26; nga na Une vie pleinement satisfaisante : Comment ?, mbage 2
Na aBouddhiste, sara kusala na brochure La voie qui mène à la paix et au bonheur, lembeti 3-7.
Na aMusulman, sara kusala na brochure La vraie foi : le chemin qui mène au Bonheur, mbage 3.
Tongana mo yeke fa tënë na ando so azo ni aye Bible pëpe, a yeke peut-être lege ti ndara ti fa pëpe ndo so mo mû atënë ti mo ni dä, juska mo sara avizite fani mingi na lo awe si.
• Fa na lo tongana nyen aprophétie ti Bible aga tâ tënë. Ambeti so mo lingbi ti sara na kusala ayeke so:
Vidéo: La Bible : un récit historique exact, des prophéties dignes de foi
Brochure: Un livre pour tous, lembeti 27-29
• Gue na lo hio na yâ ti buku Bible afa tongana lo hunda tënë na ndo ti ye so Bible afa na ndo ti ambeni tënë.
[Foto na lembeti 6]
Tongana zo ni atene: “Mbi mä na bê na Nzapa pëpe,” mo lingbi ti tene:
• “Mbi lingbi ti fa na mo na nduru tënë ye so asara si mbi mä na bê na mbeni Wasarango ye?” Na pekoni, fa na lo ambeni tënë so ayeke na yâ ti buku Comment raisonner, lembeti 72-74, wala mä tere ti ga na lo mbeni mbeti so mo ye ti diko ka ni mingi.
• “Me tongana Nzapa ayeke dä, sarango ye wa la mo ye ti tene lo duti na ni?” Azo mingi atene so ala ye ti ga nduru na mbeni Nzapa ti ndoye, so ayeke mbilimbili, so ayeke sara nzoni bê, nga so ayeke zia kangbi na popo ti azo pëpe. Fa na lo na yâ ti Bible so Nzapa ayeke na mara ti asarango ye so. (Peut-être a yeke nzoni ti sara kua na chapitre 1 ti buku Bible afa na ti to nda ni na paragraphe 6.)
Tongana zo ni atene: “Mbi yeke na confiance na Bible pëpe,” mo lingbi ti tene:
• “Azo mingi la ayeke pensé tongaso. Ambeni atene so Bible ayeke buku ti senda-ye pëpe wala atënë ti yâ ni kue ayeke gi angbene tënë. Tene na mbi, mo diko Bible lâ oko awe? [Zia zo ni akiri tënë. Na pekoni fa na lo kozo tënë so ayeke na lembeti 3 ti brochure Un livre pour tous na mû na lo brochure ni.] Azo mingi amä na bê na Bible pëpe ndali ti so abungbi ti vorongo nzapa ti wataka aba yâ ti afango ye ti Bible ni. Na ngoi ti peko, a yeke nzere ande na mbi mingi ti sara lisoro na mo na ndo ti tapande so ayeke na lembeti 4 na 5 ni.”
• “Azo mingi ayeke na oko bango ndo ti mo so. Mo ye mbi fa na mo mbeni ye so apika bê ti mbi mingi na ndo ti Bible? [Diko Job 26:7 wala Ésaïe 40:22, so afa so tongana andu tënë ti senda-ye Bible ayeke tene gi tâ tënë.] Bible ayeke nga na awango ti ndara so alingbi ti mû maboko na asewa. Na ngoi ti peko, a yeke nzere ande na mbi mingi ti fa na mo mbeni tapande ni.”
• “Singila mingi so mo fa tënë ti bê ti mo na mbi so. Tongana Nzapa asara lani mbeni buku ndali ti azo, mo pensé ti mo so atënë ti nyen la alingbi fade ti duti na yâ ni? Na pekoni fa na lo mbeni ye na yâ ti Bible so ague oko na kiringo tënë ti lo ni.