Layinki Ximootewoosi Sokka
3 Ikkollana, goofimarchu barruwara dandee heeꞌrate qarrisannohu baxxino diri daannota afi. 2 Korkaatuno, mannu umosi baxannoha, woxe baxannoha, naaxxaleessa, booꞌnaleessa, xonamannoha, annahonna amate hajajamannokkiha, galatiweelo, ammanaminokkiha, 3 kalaqamu baxilli nookkiha, sumuu yaa giwannoha, suꞌma hunannoha, umosi qeeꞌlinokkiha, kaajjado, danchare baxannokkiha, 4 kaadaasincho, yiinota cuꞌmiꞌre giwannoha, booꞌnatenni ufuufaminoha, Magano baxantenni maalu hagiirre baxannoha ikkanno; 5 Maganoho galtinore labbanno; loosinsanni kayinni wolqasi kaaddanno;* togoo manniwiinni xooqi. 6 Minunni mine sure eanno manni kaꞌꞌannohu insa giddonniiti; kuni manni addi addi yorto haꞌrunsannoha cubbu batinyinni laafino meento qafadanno; 7 togoo meenti woꞌmanka woyite rosanno; ikkollana gara ikkitinota halaalu egenno horonta huwata didandaanno.
8 Iyyaaneesinna Iyyaanibereesi Muse hettissunte gede, insano halaale hettissannoreeti. Togoo mannira surrensa woꞌmunni woꞌma daafantinotano agurranna ammanatenni millissannokki daafira Maganu albaanni ayirrinye hooggino. 9 Ikkollana, kuri lamunku manni gowwimma manna baalaho xawoho reqecci yite leeltunte gede, konni manni gowwimmano xawo fultanno daafira kawiinni saꞌe assite affannori dino. 10 Ati kayinni rosoꞌya, heeꞌreemmo gara, mixoꞌya, ammanaꞌya, cincaꞌya, baxilleꞌyanna kaajje uurraꞌya seekkite haꞌrunsootto; 11 Antsookiyaho, Iqooniyooninna Lisxiraho iillinoe dartenna qarra afootto. Konne baala darte cince saoommo; Mootichuno konni baalunkunni gatisinoe. 12 Hige Kiristoosi Yesuusi rosaano ikkite Maganoho gala hasidhannorira baalaho dartu iillannonsa. 13 Ikkollana, bushu manninna lawisiisaano soꞌrisiissanninna sodhanni bunshete aana bunshe leddanni hadhanno.
14 Ati kayinni, rosoottonna ammante adhootto coyinni kaajjite heeꞌri; korkaatuno kuri coyibba ayeoowiinni rosoottoro afootto; 15 qoleno, Kiristoosi Yesuusi ammante gato afiꞌratto gede assitannohe hayyo heedhannohe gede kaaꞌlitannoheta qullaawa borro muꞌru qaaqqi heedhe afootto. 16 Qullaawa Borro baala Maganu ayyaani massaganna borreessinoonnite; qoleno rosiisate, seejjate, coye suwisatenna* keeraanchimmatenni amaalate kaaꞌlitanno; 17 hakkuno, Maganu manchi danchu loosi baalunkura dancha gede qajeele woꞌmunni woꞌma ikkado ikkanno gedeeti.