FIANARA 57
Akory Laha Manao Fahotà Bevata Iha?
Ndre tena tea ani-Jehovah noho miezaky mafy mba tsy hanao raha mampalahelo azy iha, le mety hanao hadisoa avao kindraiky. Fe tena bevata ty fahotà sisany laha ampitovizy amy ty hafa. (1 Korintianina 6:9, 10) Laha manao fahotà bevata iha, le tiarovo fa mbo tea anao avao Jehovah sady parè hanenga ty hadisoanao noho hanampy anao.
1. Ino ty tsy maintsy ataontsika mba hanengàni-Jehovah ty hadisoantsika?
Malahelo ty olo tea ani-Jehovah lafa tsapany hoe nanao fahotà bevata ie. Fe mampahery an-drozy raha nivolanini-Jehovah toy: “Ndre mena biby aza ty fahotanareo, le hatao foty manahaky lanezy io.” (Isaia 1:18) Laha tena mibebaky tsika, le hanenga ty hadisoantsika Jehovah. Manao akory olo mibebaky zao? Maneny vatany tamy raha tsy mety nataony ie, le miezaky tsy hampimpoly an’iny sasy. Misoloho amy Jehovah ie mba hanenga ty hadisoany. Miezaky mafy ie bakeo mba tsy hanao na hieritseritsy raha hitariky azy hanao fahotà. Miezaky koa ie mba hiay mifanaraky amy fitsipikini-Jehovah.—Vakio Isaia 55:6, 7.
2. Akory ty ampiasàni-Jehovah ani-anti-panahy reo mba hanampea antsika?
Laha nanao fahotà bevata tsika, le mampirisiky antsika Jehovah mba “hikaiky ty anti-panahini-fiangona.” (Vakio Jakoba 5:14, 15.) Tea ani-Jehovah noho ty aondriny lahilahy voatendry rey. Hain-drozy ty raha tokony hatao mba hanampea antsika hifandramby soa amy Jehovah ndraiky.—Galatianina 6:1.
Ino ty ataoni-anti-panahy reo mba hanampea antsika? Hisy anti-panahy roe na telo hiresaky amintsika. Hampiasa Soratsy Masy rozy mba hampisehoa hoe raty vatany ty raha nataontsika. Hanome torohevitsy noho fampahereza antsika rozy mba hanampea antsika tsy hampimpoly ani-fahotà iny sasy. Laha nanao fahotà bevata ty olo raiky kanefa tsy mibebaky, le hanapa-kevitsy ty anti-panahy hoe alà tsy ho anisan’ny fiangonana ie mba tsy hitariky ty hafa hanao fahotà koa.
DINIHO LALIKY
Hodinihintsika marerè ty fomba anampeani-Jehovah antsika laha nanao fahotà bevata tsika. Hisaotsy azy tsika amy zay satria ameany fanampea.
3. Ho afaky hinama amy Jehovah ndraiky tsika laha mieky ty fahotantsika
Manao raha mampalahelo ani-Jehovah tsika lafa manao fahotà, ka tokony hieky ty fahotantsika aminy. Vakio Salamo 32:1-5, bakeo iaraho midiniky fanontanea toy:
Manino ro mahasoa antsika ty mieky ty fahotantsika amy Jehovah, tany ty hamony ani-raha zay?
Tsy ampy avao ty hoe mieky ty fahotantsika amy Jehovah. Mila mangataky fanampea amy anti-panahy koa tsika. Alefaso VIDEO toy, bakeo iaraho midiniky fanontanea io.
Ino ty nataoni-anti-panahy mba hanampea ani-Canon himpoly amy Jehovah ndraiky?
Tokony hivola ty marina noho tsy hamonivony raha tsika lafa miresaky amy anti-panahy satria natao hanampy antsika rozy. Vakio Jakoba 5:16, bakeo iaraho midiniky fanontanea toy:
Manino ro ho mora amy anti-panahy reo ty hanampy antsika laha mivola ty marina tsika?
Mila mieky ty fahotanao amy Jehovah iha, mivola ty marina amy anti-panahy, le maneky ty fanampea baka amy Jehovah
4. Mamindra fo amy mpanota Jehovah
Alà tsy ho anisan’ny fiangona ty olo nanao fahotà bevata laha tsy mety manaraky ty fitsipikini-Jehovah. Tsy mifandramby aminy sasy tsika. Vakio 1 Korintianina 5:6, 11, bakeo iaraho midiniky fanontanea toy:
Misy vokany amy koba ty levira mifangaro aminy. Ino koa ty ho vokany laha mbo mifandramby amy fiangona ty mpanota tsy mibebaky?
Mamindra fo amy mpanota Jehovah. Manahaky azy ty anti-panahy, ka manao raha mba hanampea ani-azy nalà tsy ho anisan’ny fiangona rey. Maro ty nimpoly amy fiangona ndraiky ndre tsy mora tamin-drozy aza ty hoe nalà tsy ho anisan’ny fiangona, satria lasa tsapany hoe tena raty ty raha nataony.—Salamo 141:5.
Manino ty fomba anandesan’i Jehovah ty mpanota ro mampiseho hoe mahay mandanjalanja, mamindra fo, noho be fitiava ie?
5. Manenga ty hadisoantsika Jehovah lafa mibebaky tsika
Nanao fanohara Jesosy mba hanampea antsika hahay ty raha tsapani-Jehovah lafa misy olo mibebaky. Vakio Lioka 15:1-7, bakeo iaraho midiniky fanontanea toy:
Ino ty ianaranao mikasiky ani-Jehovah baka amy fanohara io?
Vakio Ezekiela 33:11, bakeo iaraho midiniky fanontanea toy:
Ino ty raha bevata mila ataontsika mba hampisehoa hoe mibebaky vatany tsika?
Manahaky mpiaraky aondry mikarakara soa ty aondriny Jehovah
MIERITSERITSY TY OLO SISANY HOE: “Matahotsy aho tsy no alà tsy ho anisan’ny fiangona laha volaniko amy anti-panahy ty fahotà nataoko.”
Ino ty hovolaninao amin’olo mieritseritsy ho zay?
FAMINTINA
Ndre nanao fahotà bevata tsika, le hanenga ty hadisoantsika avao Jehovah laha mibebaky vatany tsika, zany hoe tena maneny sady tapa-kevitsy tsy hampimpoly sasy ani-raha raty iny.
Famerena
Manino ro mahasoa antsika ty mieky ty fahotantsika amy Jehovah?
Ino ty tokony hataontsika laha teantsika hanenga ty hadisoantsika Jehovah?
Manino tsika ro tokony hangataky fanampea amy anti-panahy laha nanao fahotà bevata?
DINIHO KOA RETOA
Ho hitanao amy tantarani-lahilahy raiky toy fa marina ty raha resahy amy Isaia 1:18 iny hoe mamindra fo Jehovah.
Ino ty azon’ny anti-panahy atao mba hanampea ty olo nanao fahotà bevata?
Akory ty ampisehoa fitiava noho famindram-po amy mpanota tsy mibebaky?
Manino ty lahilahy raiky niala tamy fahamarina ro nahatsapa hoe nitaomini-Jehovah himpoly ao ndraiky?
“Manova Olona ny Baiboly” (Ny Tilikambo Fiambenana 1 Aprily 2012)