O le ā Sau Tala pe a E Toe Foi Atu?
1 Ina ia uigā i la tatou faiva e manaomia ni sauniuniga, ona pe a tatou toe asiasi atu ia i latou o ē na muai faaalia le naunau, o le a mafai ai ona tatou toe faafouina lo latou naunau ma faaauau ai la tatou talanaoga. E mafai faapefea ona tatou faia lenei mea?
2 Ona e naunau ma le loto faamaoni Kerisiano moni i isi, atonu e te faasino muamua ai i se mea na e iloa e uiga i lē ona le fale i le asiasiga ua tuanai atu.
I se tagata o lē na faaalia lona popole i solitulafono, e mafai ona e faapea atu:
◼ “I la ta talanoaga i le taimi ua mavae, na e taʻua ai faapea sa faapopoleina oe ona o le matauina o le faateteleina o le solitulafono. E te manatu ea o le talosagaina o ni leoleo se toatele o le a foia ai le faafitauli?”
Afai e faaleoina e se tagata le popole i taualumaga e leʻi mamao atu i tulaga o le lalolagi, e mafai ona e faapea atu:
◼ “I la ta talanoaga faatasi i le taimi ua mavae, na e faatūina ai se manatu tāua e uiga i le leai o se filemu i le lalolagi. E te manatu ea o le a aumaia e taʻitaʻi o le lalolagi se faiga fou i le lalolagi?”
I se tagata o lē na tigā ona o le manatu faapito o isi, e mafai ona e faapea atu:
◼ “I la ta talanoaga ua mavae, na e taʻua ai se manatu e sili ona lelei e uiga i le matapeapea ua tatou vaaia i tagata lautele. O le ā sou manatu i le finagalo o le Atua e uiga i tagata matapeapea? [Faataga mo se tali.] O le mea lenei ua fai mai ai le Tusi Paia i le Efeso 5:5.”
3 O isi faaupuga ua faaaogāina ma le uigā e aofia ai:
◼ “Na ou matuā olioli lava i la ta talanoaga ua mavae, o lea na ou suesueina ai si manatu puupuu lenei e faailoa atu ai ia te oe le auala ua silasila ai Ieova i le tulaga o ē leai ni aiga. Matau le Isaia 65:21-23.”
◼ “Sa ou fiafia i lau tala faapea e manaomia e le fanau a tagata se pulega e sili atu ona lelei.”
◼ “E manaia tele le fesili na e lagā i le pe o ausia e lotu uma le faamaoniga a le Atua.”
◼ “Ua ou matuā iso lava i le mea na e taʻua e uiga i le muai fuafuaina o iʻuga o mea e tutupu mulimuli.”
◼ “Sa ou manatunatu e uiga i la ta talanoaga, ma o loo iai le manatu i le tusi The Greatest Man Who Ever Lived ou te manatu o le a e fiafia ai. [E mafai ona faailoa i lē ona le fale ni manatu ua filifilia i le tusi.]”
O faatomuaga faapenei e faaalia ai tatou te talisapaia a tatou talanoaga ua tuanai, ma tatou te naunau e toe talatalanoa ma lē ona le fale.
4 A o e leʻi faia le toe asiga, ia manatunatu i le mea o le a e fai atu ai. Ia faafetaui lau taulimaga i tagata taitoatasi.
5 Afai e pisi le tagata o loo tatou asiasi atu i ai, e mafai lava ona tatou uigā i le faapea atu:
◼ “Ou te iloa e lē o tele sou taimi avanoa, ae o le mea lenei e mafai ona e manatunatu i ai a o e faamaeʻaina lau galuega. [Faitau le Mataio 5:3.]”
Pe e mafai ona e faapea atu:
◼ “Sa ou tusia mau ia e tolu mo oe. Talu ai e lē o se taimi lelei lenei e talanoa ai, o lea ou te tuua ai mo oe, ma pe a ou toe sau, ou te fiafia e faaalu sina lima minute e talanoaina ai faatasi ma oe.”
6 Ia Alofia Faafeiloaiga Lē Talafeagai: O fesili e ono aumaia ai se tali e lē talafeagai pe ono tuua ai lē ona le fale i se tulaga lē mautonu e masani lava ona lē fua mai ai ni iʻuga lelei. E aofia i ia faafeiloaiga: “Pe na e faitau i le lomiga na ou tuua ia te oe?” “E iai ni au fesili?” “O e manatua aʻu?” “Ua ou asiasi mai e fesili atu pe o e naunau pea e talatalanoa e uiga i fuafuaga a le Atua mo lenei lalolagi.”
7 O le a tatou naunau e asiasi atu i tagata taitoatasi o ē na faaalia muamua le fiafia pe afai tatou te sauniuni mamao e avatu ia i latou se fesoasoani e uigā moni.