Saili mo Ē e Mafai ona Aʻoaʻoina
1 “E le mafai se tasi ona sau ia te au, pe a le tosina mai e le Tamā ua auina mai aʻu.” (Ioa. 6:44) O Ieova o lē suesue i loto, o le a na tauia i latou o ē mafai ona aʻoaʻoina ma gaoioi e tusa ma mea ua latou aʻoaʻoina. (Iere. 17:10; Ioa. 6:45) Ua tatou maua le faaeaga o le avea ma ana au faigaluega i le sailia o ē loto maulalo o loo moomoo mo se lalolagi fou.—Sala. 37:11; 1 Kori. 3:9.
2 Ua faamatalaina e Iesu ona soo o ni “fai faiva i tagata.” (Mata. 4:19) E ui o lena ituaiga o galuega e fitā i nisi taimi, a e o le maua o ni iuga lelei e aumaia ai le lotomalie. Nai lo o le galulue mo lo tatou lava lelei, a e o le mea moni ua tatou faasaoina ia “iʻa” mai se faaumatiaga mautinoa. O se tagata fai faiva e taulau, e tatau ona ia iloa po o le ā e faia ina ia faatosina mai ai le iʻa. E faapena foi ia i tatou ona molioo atu le feau o le Malo i se auala faatosina o le a faagaee ai le naunau o la tatou au faalogologo. E moni lava lenei mea, a e maise pe a tatou ō atu e faia toe asiga. O le ā e mafai ona tatou fai atu ai?
3 Afai sa faaalia le naunau i mataupu o “Le Olomatamata” e uiga i lotu, e mafai ona e faapea atu:
◼ “I la ta feiloaiga muamua, na ta talanoa ai i le pogai ua lē mananao ai le toatele e talanoa e uiga i lotu. Pe te lē manatu ea o se mea uiga ese lena, talu ai o le toatele lava o o tatou tuaoi e faapea mai o i latou o Kerisiano? Atonu o e tau manatu pe aisea ua avea ai le mataupu i lotu o se mataupu o feeseeseaiga ma finauga.” Faatali mo se tali. Suʻe i le itulau e 322 o le tusi Reasoning, ma fetufaai i ni nai manatu i lalo o le ulutala “Aisea ua Tele Naua ai Lotu?”
4 Atonu e te faaaogā lenei taulimaga talitutusa e amata ai se talanoaga i le mataupu o lotu:
◼ “Faamata o i ai se auala tatou te mautinoa ai ua tatou maua le lotu moni? [Faatali mo se tali.] Ona ua tele naua lotu eseese, ua lagona ai e le toatele o tagata le fenuminumiai ma le lē mautonu.” Suʻe i le tusi Reasoning, itulau e 328-329, lea e talanoaina ai le fesili e faapea, “E mafai faapefea e se tagata ona iloa po o fea le lotu saʻo?” Faaopoopo puupuu i le fesili numera 5, “Pe fealofani moni ona sui?” Faamatala le auala e mafai ona aʻoaʻoina atili ai i le faia o suesuega totino faale-Tusi Paia.
5 Afai e foliga mai e manatu mamafa lē e ona le fale i tulaga o loo i ai le lalolagi, atonu e te manao e faataʻitaʻi le faatomuaga lenei:
◼ “E foliga mai o loo e popole e uiga i tulaga leaga o loo fesagai ma i tatou i le olaga faapea ma le tausia o o tatou aiga. Ua faailoa mai e le Tusi Paia se folafolaga matagofie o le a faataunuuina e le Atua i le lumanai lata mai.” Faitau le Faataoto 2:21, 22, ma faamatala le folafolaga a Ieova e uiga i se lalolagi filemu e lē uma.
6 A faia toe asiga pe a maeʻa ona amata le tauiviga faapitoa o le Tala o le Malo, faamolemole ia faamautinoa ua tuu se kopi o le Tala o le Malo i tagata o aiga o ē e lei i ai ni kopi. O mea e mafai ona e taʻua pe a faia toe asiga i ni Tala o le Malo na tuu, o le a talanoaina i le lomiga o La Tatou Faiva o le Malo o Me.
7 Ona o le Afioga a le Atua e “matuā galue,” e tatau ai ona tatou taumafai e faaaogā i a tatou taulimaga. (Epe. 4:12) Ia avea o sou sini le faalaeiau o lē ona le fale e faitau e ia lava le Tusi Paia. (Faatusatusa i le Galuega 17:11.) Afai tatou te faia ma le filigā la tatou vaega, o le a faamanuia e Ieova a tatou taumafaiga.