Unogona Kuva Netariro Yokurarama Nokusingaperi Here?

“PANE chinhu chiri kuitika mumuviri yevanhu chinotema upenyu hurefu hungabvira hwemakore 115 kusvikira ku120,” anodaro Dr. James R. Smith, purofesa wemasero ezvinhu zvipenyu. “Pane muganhu—asi hatizivi chinotema izvozvo.” Saka, Dr. Roger Gosden wezvinhu zvipenyu anotaura kuti hazvishamisi kuti, “vasayendisiti vachatofanira kuwana nzira yokuwedzera nayo panoperera mujaho, uye vashomanana vanotofunga nezvazvo.” Izvozvo zvave kuda kuchinja here?

Kunangana “Nemubvunzo Unokosha Chaiwo”

Kunyange zvazvo pane rondedzero dzisingaperi dzinovimbisa mushonga wokugumisa kukwegura, nyanzvi zhinji dzinobvumirana naDr. Gene D. Cohen, purezidhendi weGerontological Society of America, kuti “vimbiso dzose idzi dzazova pasina.” Nei? Kutanga, anodaro munyori wezvesayenzi Nancy Shute, muU.S.News & World Report, “hapana ati ave kuziva chinokonzera kukwegura nemagumisiro akwo asingadzivisiki, rufu. Uye kushandisa mushonga pahosha inopfuurira usingazivi chiri kuiparira kudzingana nemhepo.” Zvakare Dr. Gosden anotaura kuti kukwegura kwaramba kusinganzwisisiki: “Kunooneka pane mumwe nemumwe wedu asi zvinokuparira zvaramba zvakavanzika.” Anotaura kuti “mubvunzo unokosha chaiwo wokuti nei kuchimboitika” haunyanyofungwa nezvawo.a

Zviri pachena kuti sezvapanongovawo nemuganhu wemamhanyire anogona kuita vanhu, urefu hwepavanogona kusvetuka, uye kudzika kwepavanogona kusvika kana vakaita chamunyurududu, muganhu uripowo wokuti mafungire evanhu nokunzwisisa zvinogona kutsanangurwa kusvika papi. Uye kupindura “mubvunzo unokosha chaiwo wokuti nei” sezviri pachena zviri kure nemuganhu iwowo. Saka, nzira chete yokuwana nayo mhinduro kuenda kune zvinopfuura zvinozivikanwa nevanhu. Ndizvozvo chaizvo zvaunokurudzirwa kuita, nebhuku renjere rekare Bhaibheri. Richitaura nezveMusiki, “tsime roupenyu,” Bhaibheri rinotivimbisa kuti: “Kana mukamutsvaka, uchawanikwa nemi.” (Pisarema 36:9; 2 Makoronike 15:2) Saka kana zvakadaro, kunzvera Shoko raMwari, Bhaibheri, kunoratidzei nezvechikonzero chaicho nei vanhu vachifa?

Chinokonzera Rufu

Bhaibheri rinotiudza kuti Mwari paakasika vanhu vokutanga, akaisa “pfungwa yokusaguma mumwoyo yavo.” (Muparidzi 3:11, Beck) Zvisinei, Musiki akapa vabereki vokutanga vevanhu zvinopfuura chido chokurarama nokusingaperi; akavapawo mukana wokudaro. Vakasikwa vane pfungwa nemuviri zvakakwana, uye vairarama mumhoteredzo ine rugare. Musiki aida kuti vanhu ava vokutanga vararame nokusingaperi uye kuti nokufamba kwenguva pasi rizare nevana vavo vakakwana.—Genesi 1:28; 2:15.

Zvisinei, upenyu husina mugumo, hwaiva nezvaihudzora. Hwaitsamira pakuteerera Mwari. Dai Adhama aizorega kuteerera Mwari, aizo“fa zvirokwazvo.” (Genesi 2:16, 17) Zvinosuruvarisa kuti, vanhu vokutanga havana kuteerera. (Genesi 3:1-6) Nokuita kudaro, vakava vaiti vezvivi, nokuti “zvivi ndiko kudarika murayiro.” (1 Johane 3:4) Somugumisiro, vakanga vasisina tariro youpenyu husingaperi, nokuti “mubayiro wezvivi ndirwo rufu.” (VaRoma 6:23) Saka paakapa mutongo kuvanhu vokutanga, Mwari akati: “Zvauri guruva, uchadzokerazve kuguruva.”—Genesi 3:19.

Saka, pashure pokunge vanhu vokutanga vatadza, zvakafanotaurwa zvinoparirwa nechivi zvakava mavari, uye mugumo weupenyu wakatanga. Somugumisiro, vakava varanda vokukwegura, rufu ruchiteverawo. Mukuwedzera, vadzingwa mumusha wavo wokutanga weParadhiso, wainzi Edheni, vanhu vokutanga vakanangana nechimwe chinhu chakapesvedzera upenyu hwavo zvakaipa—zvakapoteredza zvakaita sedanda kunze kweEdheni. (Genesi 3:16-19, 23, 24) Zvinhu zviviri izvi chivi chokuzvarwa nacho nezvakapoteredza zvisina kutsarukana zvakatapura vanhu vokutanga nevana vavowo vemunguva yemberi.

Mutongo Nevimbiso

Sezvo kuchinja uku kunokuvadza kwakaitika muupenyu hwavo vanhu vokutanga vasati vabereka vana, vaingogona kubereka vana vakafanana navo chete—vasina kukwana, vane zvivi, uye vanokwegura. “Rufu rwakasvika kuvanhu vose, nokuti vose vakatadza,” rinodaro Bhaibheri. (VaRoma 5:12; enzanisa naPisarema 51:5.) “Tinotakura masamanisi edu akanyorwa mumaumbirwe akaitwa sero redu,” rinodaro bhuku rinonzi The Body Machine—Your Health in Perspective.

Zvisinei, izvi hazvirevi kuti hapana tariro youpenyu husina mugumo—upenyu husina kukwegura norufu. Kutanga, zvine musoro kudavira kuti Musiki akachenjera kwazvo weupenyu hwevanhu nezvimwe zvipenyu zvose zvinoshamisa zvakasiyana-siyana anogona kuporesa kusakwana chero kupi zvakwo kwokuzvarwa nakwo ndokugovera simba rinodiwa rinoita kuti upenyu hwevanhu hupfuurire nokusingaperi. Chechipiri, izvi ndizvo chaizvo Musiki akavimbisa kuita. Apa mutongo worufu kuvanhu vokutanga, Mwari akaratidza kakawanda kuti chinangwa chake chokuti vanhu vagare nokusingaperi pasi hachina kuchinja. Somuenzaniso, anopa vimbiso yokuti: “Vakarurama vachagara nhaka yenyika, vachagaramo nokusingaperi.” (Pisarema 37:29) Chii chaunofanira kuita kuti uzoona kuzadzika kwevimbiso iyi?

Kurebesa Kwaungaita Upenyu Hwako—Nokusingaperi

Zvinofadza kuti, munyori wesayenzi Ronald Kotulak abvunzurudza vanzveri vezvekurapa vanopfuura 300, akati: “Vasayendisiti vave vachiziva kwenguva yakareba kuti mari, basa, nedzidzo zvinhu zvinokosha kwazvo zvinotema utano hwevanhu uye kuti vachararama nguva refu zvakadini. . . . Asi dzidzo ndiyo iri kuoneka iri pamberi pakutema kwazvo urefu hweupenyu.” Akatsanangura kuti: “Zvatinodya sezvazvinopa gadziriro dzedu dzomuviri simba rokurwisa utachiona hunotyisidzira upenyu, saizvozvowo dzidzo inotidzivirira pakusarudza zvakashata.” Sezvakataura mumwe munzveri kuti, “nedzidzo unodzidza mararamiro munyika yako” uye “makundire aungaita zvibingamupinyi zvingamuka.” Saka, munzira yakati, dzidzo, seizvo munyori Kotulak anoirondedzera, “chinhu chinokosha kuupenyu hune utano, hurefu.”

Nhanho yokutanga kuwana upenyu husingaperi munguva yemberi idzidzowo—dzidzo yeBhaibheri. Jesu Kristu akati: “Upenyu husingaperi ndihwo, kuti vakuzivei imi, Mwari uri woga wazvokwadi, naJesu Kristu, wamakatuma.” (Johane 17:3) Kupinza zivo pamusoro paJehovha Mwari, Musiki, Jesu Kristu, uye yezvegadziriro yechibayiro chakagoverwa naMwari ndirwo rudzi chete rwedzidzo inogadzirira munhu kutora nhanho yokutanga munzira inoenda kuupenyu husingaperi.—Mateo 20:28; Johane 3:16.

Zvapupu zvaJehovha zvinoita purogiramu yedzidzo yeBhaibheri inogona kukubatsira kuwana zivo iyi inopa upenyu yeBhaibheri. Shanyira imwe yeHoro dzazvo dzoUmambo kuti udzidze zvakawanda nezvepurogiramu iyi yepachena, kana kuti vakumbire kuti vakushanyire panguva yakakunakira. Uchawana kuti Bhaibheri rine uchapupu hwakasimba hwokuti nguva yava pedyo apo kunezenge kusina matanda anovhiringidza upenyu uye pasina mugumo wahwo. Chokwadi, rufu rwave rwuchitonga kwezviuru zvemakore, asi nokukurumidza ruchakundwa nokusingaperi. Itariro inofadza zvakadini kuvakwegura nevadikiwo!

[Mashoko Omuzasi]

[Mifananidzo iri papeji 13]

Nhanho yokutanga kuwana upenyu husingaperi idzidzo yeBhaibheri