Chinobatsira Kupedza Misikanzwa Yepwere
NOMUNYORI WEMUKAI! MUFRANCE
ZVAKAITIKA munguva ichangopfuura zvakaratidza pachena kutyorwa kwomutemo nokugadzikana pamwero unotyisa mumadhorobha akawanda ane urombo muFrance. Maererano nemagazini yokuFrance inonzi L’Express, “chisimba mumadhorobha chawedzera zvakapetwa kanenge kashanu mumakore matanhatu.” Pamusoro paizvozvi, nhamba yevaduku vanobatanidzwa muutsotsi hwechisimba yawedzera zvinotyisa.
Mukuwedzera pakuparadza zvinhu, kutengesa zvinodhaka, ugororo, kupisa zvinhu, uye umbavha, vane misikanzwa vave vachinanga vamiririri veNyika. Mapurisa, vanodzima moto, uye vanoshandira zvokufambisa zvavose, kungotaura vashoma vacho, vari pakati paavo vanosangana nokumukira kwechisimba nguva dzose.
Nei kuine chisimba chakawanda zvakadai? Nyanzvi mbiri dzezvemagariro evanhu dzakatsanangura kuti: “Nemhaka yokuparara kwemhuri; izvi zvinoratidza kurwisana nezvose zvinotaurwa nevane simba.” Vanotaurawo “nezvokunzwa kwe[vechiduku] sevasiyiwa nevane simba” uye vasina “tariro yenguva yemberi ine chinangwa.”
Zvapupu zvaJehovha zvinoparidza mashoko eBhaibheri etariro nguva dzose munharaunda dzakazara nousindimari. Pachirongwa chakaitwa munguva ichangopfuura panhepfenyuro yeterevhizheni yokuFrance, mumwe mutori wenhau akati: “Zvapupu zvaJehovha zvinobvongodza munogara vanhu uye nharaunda dzine urombo—nharaunda dzinoita sedzakasiyiwa nevanobatsira vanhu, mapurisa, nehurumende. Muzvivako izvi nemigwagwa, zvinotaura uye zvinoteerera.” Basa razvo rine simba rakanaka, sezvakaratidzwa netsamba inotevera yakabva kumuverengi muduku weMukai!
“Ndinoda kukutendai nomwoyo wangu wose nokuda kwemabhuku enyu. Hamuna kubatsira ini bedzi asi ukama hwangu nevabereki vangu hwava nani. Ndine makore 16 chete uye ndiri muMuslim.
“Zvandinoda kutaura ndezvokuti makabudirira pakuita kuti ndisava ane misikanzwa. Somugumisiro, ndinonyatsotevera chitendero changu, asi ndinoverengawo Bhaibheri. Ndinokutendai, ndiri kuendererawo mberi nedzidzo yangu. Uyewo, nemagazini enyu mabatsira vanhu vanoverengeka munharaunda yangu kurega misikanzwa—ndinovakweretesa magazini acho mwedzi nemwedzi. Ndinokutendai zvikuru uye ndinonzwa kuti ndine mungava.”