Mireniyumu Yechitatu—Ichazadzika Tariro Dzako Here?
KUVERENGA kudzokera shure kwakavamba. Wachi ine nhamba iri pamberi penzvimbo yedzidzo yeBeaubourg muParis, France, inoratidza chiverengero chamasekondi chasara. Iyo ichapfuuridzira kuverenga kwayo kusina ngoni ichidzokera shure kutozosvikira pakati pousiku hwaDecember 31, 1999. Panguva iyoyo, chimwe chinhu chakapupurirwa kamwe bedzi kare muNguva yedu yaVose chichaitika: kupinzwa kwemireniyumu itsva, mireniyumu yechitatu.
“2000, nenzira yakati, ‘ndichinoitika chikurusa chati chakarirwa’ munhau yavanhu,” anokarakadza kudaro muongorori wenzanga Bernward Joerges weBerlin, Germany. Neiko pane kariro yakadaro? Pashure pokurangarira zvose, gore ra 2000 unongova zvawo mumwe musi mukufamba kwenguva. Kunze kwezvo, musi wacho unozivikanwa bedzi naavo vanotevera karenda rokuMadokero. Mukuwirirana nekarenda rechiIslām, 2000 N.V. anowira mukati megore rechiIslām 1420; mukuwirirana nekarenda rechiJudha, 5760 A.M.
Asi mubvunzurudzo muDagens Nyheter yezuva nezuva yeSweden, Purofesa Joerges anotsanangura, kuti: “Nemhaka yokuwana nyika nokuwana umambo, kuverenga kwedu nguva kwaGregory, kutanga nokuberekwa kunofungidzirwa kwaKristu, kwakasimba mumativi makuru enyika.” Gore ra 2000 nokudaro richava chiratidzo chenhambo yapasi pose nokuda kwechikamu chikuru chorudzi rwomunhu. Anoti Purofesa Joerges: “Vanhu vose vachabatanidza nhauro youpenyu hwavo pachavo pamwe chete nechiito chiri chose zvacho nechinoitika ichochi.”
Bva, vazhinji vanorangarira zvakawanda kupfuura kungoratidzira chete nguva. “Gadziriro nezvirongwa zvemwero mikuru zvo‘kuratidzira’, kupa revo kuichi chinoitika ndokuchengeta zvava kutoitwa mumativi ose oupenyu uye pamwero yose youpenyu yenzanga,” anodaro Joerges. Iye anowedzera kuti “mupasi rose, vaiti vakuru vegadziriro na‘vakuru veshoo’ vari kufungidzira nokuronga zvinoitika zvikuru.” Vamwe vadeyi kutaura vanotaura kuti “tichanyura mumafashamo amabhuku apamusoro pezana ramakore rapfuura. Zvinobudisa nhau zvose zvichapenga pamusoro pomugumo namavambo zvemireniyumu. Nhepfutepfu yeTV yeWest Germany iri kuronga kutepfenyura kwamaawa 24 okubuda kwezuva kupota pasi.”
Zvinobudisa nhau zvichavawo nechokwadi chokunyandura manyemwe makuru pamusoro pomucheche wokupedzisira kuberekwa muna 1999 nowokutanga kuberekwa muna 2000. Vanyori venhau vachava vanodisa kuwana vashomanene vanosara vakaberekwa muzana ramakore rechi 19 kuti vabvunze kuti kunonzwika sei kuva vakararama mumazana amakore matatu namamireniyumu maviri! Vamwe vanotorangarira kuti iyi mbavarira yose yemireniyumu ichanyandura rudzi rwakati rwoupengo hwavanhu. Mukuwirirana neimwe deyo kutaura inotyisa, pakati chaipoipo pousiku hwapamberi ihwohwo hweGore Idzva, vazhinji vachazviuraya.
Pasinei zvapo nokunyanyisa kuri pachena kwakadaro, kunonzwisisika kuti chinoitika chacho chinonyandura fariro. Nokuda kwavazhinji vari munyika yedu yaneta nenhamo, mireniyumu itsva inorangarirwa sechiratidzo chetariro, nzira yokuenda nayo kunguva yemberi iri nani. Vamwe vanotarira kusayenzi noruzivo kuparira nguva yemberi umo tichadya zviri nani ndokurarama kwenguva refu zvikuru, kushanda zvishoma ndokugara pamusha zvikuru; umo michina ichatisunungura pamabasa anofinha; umo muitiro unodzorwa uchashandura mvura kuva peturo. Ivo vanoona muchiono nguva yemberi yeholograph TV, Foni dzinoratidza mufananidzo, michina yefakisi inobudisa mavara, uye foni dzinoturikira panguva iyoyo. Ivo vanofunga nezvokuongorora Mwedzi, Mars, kana kuti mimwe mitumbi yomudenga, vachichera pfuma yayo.
Asi havasati vari vose vane tariro kwazvo. Vamwe vanzveri vanoona mireniyumu itsva seinopinza nguva yokukura kwechiverengero chavagari vapasi kusingadzorwi nokupudzika kwemhoteredzo. Kushatiswa kwemhepo kuchashandura mhepo yakapoteredza pasi kuva imba yamagirazi munokura miti inopisa. Mazaya eaizi achanyunguruka uye makungwa achakwira, achifashamira nharaunda dzinobereka zvibereko, dzakagarwa asi zvichishandura mamirioni amaeka amapurazi kuva magwenga. Ivo vanodeya kuona kuwa kwepfuma yenyika, kusaterama kwezvamatongerwe enyika uko kuchazunungusa hurumende nenzanga, mhaka dzokutiza, uye zvakaipa zvikurusa zvazvose, kuuraya kukuru kwenyukireya uko kuchaparadza upenyu hwose hwavanhu.
Vadeyi kutaura vanofungidzira zvakawanda kunyange zvazvo vachiperevedza pauzvokwadi apo kunouya kumireniyumu inosvika. Zvinhu zvisingadeyi kuoneka zvakawanda zvikuru zvinobatanidzwa zvokusagona kudeya kutaura nguva yemberi nenzira yakarurama. Mudeyi kutaura nguva yemberi anobhadharwa anofananidza kuita saizvozvo nokutamba chess: “Ndisati ndaita kufamba kwangu kunotevera, ndinotarira kufamba kwakawanda mberi sezvandinogona. Asi pashure pokunge mukwikwidzani wangu aita kufamba kwake, ndinokuita zvakare.”
Kuti chaizvo gore ra 2000 rinei, nguva bedzi ichataura. Ikoku hakurevi, zvisinei, kuti nguva yako yemberi inofanira kuva isina chokwadi. Bhaibheri rinogovera ufakazi hwakawanda hwokuti tava pedyo nokusvika kwemireniyumu inokosha zvikuru kwazvo kupfuura iyo inovamba mumakore asingasviki gumi. Iyi Mireniyumu inosvika ichapfuura zvikuru kariro dzipi nedzipi dzavanhu! Iyoyi inorevei chaizvoizvo? Ichabatanidzei? Tinokukumbira kurangarira nyaya yedu inotevera ndokudzidza icho Bhaibheri rinotaura.