“Machinja Maonero Andinoita Zvapupu zvaJehovha”
NDIWO matauriro akaita mumwe mukuru mukuru wetorongo muPoland panyaya yebasa reZvapupu zvaJehovha, sezvakashumwa mumagazini yedu yaOctober15, 1998. Nyaya yaiti, “Apo Mwoyo Yakaoma Inogamuchira,” yakazivisa kubudirira kwakava neZvapupu zvaJehovha mukushanda nevasungwa muWołów, muPoland.
Magazini yeNharireyomurindi yataurwa pamusoro apa isati yabudiswa kuna vose, musangano wekuigovera kuvasungwa chete wakarongwa pana 13 September 1998, patorongo reWołów. Avo vakakokwa kupinda vaisanganisira Zvapupu zvomunharaunda imomo, vasungwa vakabhabhatidzwa nevamwe vaifarira, uye vakuru vakuru vetorongo vakawanda. Izvi zvinotevera ndezvimwe zvezvakacherechedzwa neavo vakapinda.
Jerzy, mumwe weZvapupu zvaJehovha akabhabhatidzwa mutorongo anopfuura makore mashanu akapfuura, akati: “Ndinofara zvikuru, sezvandinogona kurava nhasi pamusoro pekuti hama dziri muungano dziri pedyo dzakaedza zvakadini kutibetsera.” Akawedzera kuti: “Ndinoramba ndichivavarira kuzvinatsiridza, uye ndinogona kuona maumbirwe andave ndichiitwa naJehovha.”
Mumwe musungwa, anonzi Zdzisław, akati maererano nebasa rokupupurira mutorongo: “Iye zvino, vasungwa vana vari kugadzirira kubhabhatidzwa, uye avo vachangobva kufarira vanopfuurira kupinda misangano pahoro yedu. Nyaya iyi inotiita kuti tishande zvakasimba mune mamwezve mabasa mundima ino.” Mafungiro akanaka zvakadini, tichifunga kuti Zdzisław achine makore 19 ari mutorongo!
Pashure pekurava nyaya yetorongo reWołów, mumwe mukuru mukuru wetorongo akati: “Takudzwa zvikurukuru. Handina kumbofunga kuti torongo rino raizowana kuzivisa kwakanaka kwakadaro mumitauro 130 munyika yose. Ndinokudai imi vanhu, uye ndinoonga zvamuri kuitira vasungwa.” Mumwe mukuru mukuru akawedzera kuti: “Machinja maonero andinoita Zvapupu zvaJehovha. Ndaimbokuonai sevanhu vanonyanyisa mune zvechitendero. Zvino ndinoona kuti muri vanhu vane tsika.”
Mukuru wetorongo reWołów, Marek Gajos, akasekerera ndokuti: “Pakutanga taifunga kuti maizongoita zvishoma-shoma. Taifunga kuti maingova chimwe chitendero chaida zvikuru kubetsera vasungwa nezveBhaibheri. Zvisinei, nokuona migumisiro yebasa renyu rokutanga, tasarudza kubetserana nemi. Mave musinganeti kuuya kuno kwemakore mapfumbamwe zvino, uye ndinoonga zvikuru nezvamakatoita.”
Kunyange zvakadaro, nyaya yacho yakagamuchirwa sei nevazhinji vaiva mutorongo reWołów? Kufarira kwaiva pakati pevasungwa kwaiva kwakakura zvikuru zvokuti Zvapupu zvaiva mutorongo zvakapedza magazini azvo ose. Vakuru vakuru vetorongo vakaratidzawo mufaro nekukumbira mamwe magazini 40 okuwedzera. Kuti dzigone kuvawanisa magazini, ungano dzemunharaunda imomo dzakabetsera ndokupa mamwe makopi 100 kuhama dzaiva mutorongo. Panguva iyoyowo, vaipinda misangano mutorongo vakawedzera.
Piotr Choduń, mumwe mukuru mukuru wetorongo ave achibetserana neZvapupu zvaJehovha, akati: “Takasarudza kuti nyaya iyi iratidzwe pose panoonekwa nevanhu mutorongo redu. Tinotarisira kuti vose vevasungwa avo vachigere kudzidza Bhaibheri nemi vacharava magazini iyi.”
Muenzaniso wakaisvonaka weZvapupu izvozvi uye kutsunga kwazvo kuramba zvichiparidza kunoramba kuchiva nemigumisiro yakanaka. Kuwedzera kuvasungwa 15 vakazosvika pakubhabhatidzwa, vakuru vakuru vetorongo vaviri vakazvitsaurira kuna Jehovha, uye mumwe mukuru mukuru wetorongo akakumbira kufunda Bhaibheri. Chokwadi, hama dzinoparidza mutorongo reWołów dzinopa mbiri yose kuna Jehovha Mwari nokuda kwekubudirira kwadzo.—Enzanisa na1 VaKorinte 3:6, 7.
[Mufananidzo uri papeji 28]
Zvapupu zvitatu nemumwe musungwa pakuratidzirwa kwemagazini muhoro inoitirwa hurukuro dzemutorongo