Programi i ri i asamblesë qarkore
1 Tema që do të zhvillohet në programin e ri të asamblesë qarkore që nis në shtator është «Rrini zgjuar, qëndroni të palëkundshëm, jini të fortë.» Ajo është bazuar në fjalët inkurajuese të apostullit Pavël drejtuar të krishterëve të shekullit të parë të shënuar në 1. Korintasve 16:13.
2 Programi do të fillojë duke nxjerrë në pah nevojën tonë të përhershme për një vetëshqyrtim frymor. Mbajtja e një qëndrimi të fortë për çfarë është e drejtë në këto «ditë të fundit», kërkon një vlerësim real të marrëdhënies sonë me Jehovain dhe qëndrimit tonë me organizatën e tij tokësore. (2. Tim. 3:1) Do të na kujtohet se Perëndia e vlerëson të gjithë punën tonë të rëndë. Nevojitet që të jemi të mësuar, në mënyrë që të përmirësojmë cilësitë tona të krishtere dhe të mbajmë një sjellje shembullore.
3 Gjithashtu do të theksohet nevoja për të qenë të zellshëm në veprën e bërjes së dishepujve, ndërsa shtrijmë përparimin dhe përgjegjësinë tonë frymore. Fjalime, demonstrime dhe biseda nga më të ndryshmet do të trajtojnë sugjerime praktike se si individët dhe familjet mund të mbajnë një program të rregullt në të ushqyerit frymor.
4 Të shtunën, kandidatët e kualifikuar do të mund të bëjnë deklaratën publike të dedikimit të tyre me pagëzimin në ujë. Pastaj, të dielën të gjithë ne duhet të jemi të pranishëm në fjalimin publik, të titulluar «Cili është qëndrimi juaj me Perëndinë?»
5 Programi do të përfundojë me inkurajimin për të qenë të palëkundshëm në besim, duke u sjellë me njëri-tjetrin gjithmonë me një frymë dashurie dhe paqeje. Asambleja qarkore është një rast i veçantë që Jehovai ka siguruar për të gjithë ne «për të nxitur njëri-tjetrin në dashuri dhe vepra të mira». (Hebr. 10:24, 25, BR) Bëj planet përfundimtare që të jesh i pranishëm gjatë gjithë programit në të dy ditët.