Programi i asamblesë së re speciale njëditore

¹ Ndërsa mjetet e informacionit dhe mësuesit e kësaj bote i japin lavdi pasurisë materiale, Fjala e Perëndisë na nxit ‘Të jemi të pasur në vepra të shkëlqyera’. (1 Tim. 6:18) Kjo është tema e programit të asamblesë speciale njëditore, që fillon në shtator të vitit 2002. Çfarë inkurajimi do të marrim në këtë asamble?

² Mbikëqyrësi qarkor do të trajtojë se çfarë do të thotë «Të jemi të pasur nga këndvështrimi i Perëndisë» dhe do të intervistojë disa që po përpiqen të fitojnë pasuri frymore. Në fjalimin e parë që do të mbajë atë ditë oratori vizitues do të tregojë se si po kryen populli i Perëndisë «Vepra të shkëlqyera në këtë kohë korrjeje». Secili nga ne do të nxitet të mendojë se si mund të marrë pjesë edhe më plotësisht në veprën e korrjes që po kryhet sot, vepër kjo e urdhëruar nga Perëndia.

³ Sa kënaqemi kur i shohim të rinjtë e krishterë që kërkojnë pasuritë frymore! Kjo gjë i sjell lavdi Jehovait dhe i ndihmon të rinjtë të vënë një themel të shkëlqyer për privilegje të tjera shërbimi në të ardhmen. Pjesa «Të lavdërojmë të rinjtë për veprat e shkëlqyera në lëvdimin e Jehovait» do të nxjerrë në pah veprat e shkëlqyera që po bëjnë në qark të rinjtë e krishterë.

⁴ Cilat janë rezultatet kur kryejmë vepra të shkëlqyera? Oratori vizitues do të flasë për këtë në fjalimin e tij të fundit «Kur vazhdojmë në vepra të shkëlqyera korrim bekimet e Jehovait». Ai do të shqyrtojë katër fusha ku korrim bekime të pasura: (1) si individë, (2) si familje, (3) si kongregacion dhe (4) si një organizatë mbarëbotërore.

⁵ Ata që i janë kushtuar Jehovait do të kenë mundësinë të pagëzohen. Nëse dikush është gati të ndërmarrë këtë hap, të njoftojë menjëherë mbikëqyrësin drejtues.

⁶ Kur të njoftohet data e asamblesë për zonën tonë, pa humbur kohë të bëjmë plane të përcaktuara mirë për të qenë të pranishëm. Të përpiqemi të mbërrijmë herët me qëllim që të marrim pjesë në këngën dhe në lutjen hapëse. Duke qenë të pranishëm dhe të vëmendshëm gjatë gjithë programit të asamblesë speciale njëditore do të forcohemi që të vazhdojmë të ndjekim një drejtim, i cili na bën vërtet të pasur nga pikëpamja e Perëndisë sonë, Jehovait.