Kongresi krahinor i Dëshmitarëve të Jehovait për vitin 2005 «T’i bindemi Perëndisë»
1 Si Mësuesi ynë i Madh, Perëndia Jehova merr masa që ne të mblidhemi për të mësuar rrugët e tij. (Isa. 30:20, 21; 54:13) Këtë e bën nëpërmjet klasës së skllavit të besueshëm dhe të matur, që organizon mbledhje të tilla si kongresi i përvitshëm krahinor. (Mat. 24:45-47) Ne ndihemi si psalmisti David, i cili këndoi: «Mes turmave të mbledhura do të të bekoj, o Jehova!» (Psal. 26:12, BR) Davidi e kuptonte qartë vlerën e mësimeve të Jehovait dhe ishte i vendosur të bashkohej me popullin e Tij, kudo që do të mblidhej.
2 A do të jesh edhe ti «mes turmave të mbledhura»këtë vit, për të ndjekur Kongresin Krahinor «T’i bindemi Perëndisë»? Nëse po, informacionet e mëposhtme do të të ndihmojnë gjatë përgatitjeve që do të bësh për kongresin.
3 Planifiko që tani për të qenë i pranishëm çdo ditë: «Planet e atij që ngulmon sjellin me siguri përfitim». (Prov. 21:5, BR) A nuk tregon ky varg se është e rëndësishme të planifikojmë pa u vonuar, që të ndjekim kongresin? Për t’u siguruar se nuk do të humbasësh asgjë nga programi frymor e përtëritës, është e mençur të fillosh që tani të marrësh masat e duhura për të qenë i pranishëm në të tria ditët. Nëse duhet t’i kërkosh leje punëdhënësit tënd, bëje këtë menjëherë. Nëse duhet të bisedosh për planet e tua me bashkëshortin jobesimtar, mos e lër këtë për momentin e fundit. Çfarëdolloj problemi që të kesh, kërkoji ndihmë Jehovait në lutje, duke pasur besim se me ndihmën e tij «planet e tua do të realizohen». (Prov. 16:3) Për më tepër, do të ishte e përshtatshme të ndihmoje edhe studentët biblikë me përgatitjet e tyre, në mënyrë që edhe ata të jenë të pranishëm në çdo sesion.
4 Strehimi: Për dobinë tuaj, në qytetin ku do mbahet kongresi, tashmë janë marrë masa për strehimin. Pasi të jetë trajtuar në Mbledhjen e Shërbimit kjo pjesë, në tabelën e informacionit do të vendoset një listë e strehimeve të rekomanduara të hoteleve që janë gjetur. Ju lutemi, rezervoni dhoma vetëm në hotelet që janë në listë dhe pranoni të paguani vetëm tarifat e treguara. Bashkëpunimi juaj do t’i japë mundësi zyrës së degës që çdo vit të sigurojë hotele të cilësisë së lartë me tarifa të reduktuara. Kini parasysh se hotelet e mira, nuk janë patjetër ato që ndodhen më afër vendit ku do të mbahet kongresi. Përpara se të telefononi për të bërë rezervimin, rishikoni pikat që ndodhen në kutinë me titull: «Si mund të mbështetni organizimin për strehimin». Kur të telefononi, ndiqni hapat që tregohen në kutinë: «Cila është mënyra më e mirë për të rezervuar një dhomë hoteli?»
5 Nevoja të veçanta: Apostulli Pavël i përshkroi disa vëllezër si «një ndihmë fuqizuese» për të. (Kolos. 4:7-11) Një mënyrë se si e ndihmuan Pavlin, ishte duke i bërë disa shërbime. Në lidhje me kongresin, si mund të jeni edhe ju «një ndihmë fuqizuese» për të tjerët? Lajmëtarët e moshuar, të sëmurët, ata që janë në shërbimin e plotkohor dhe të tjerë, mund të kenë nevojë për të udhëtuar ose për t’u strehuar. Përgjegjësinë kryesore për këta lajmëtarë e kanë të afërmit e tyre. (1 Tim. 5:4) Por, nëse këta nuk mund t’i ndihmojnë, atëherë të bashkëkrishterët mund t’u vijnë në ndihmë. (Jak. 1:27) Mbikëqyrësit e studimit të librit duhet të sigurohen që, individët me nevoja të veçanta në grupin e tyre, t’i kenë planifikuar gjërat mjaft kohë para kongresit.
6 Në qoftë se një lajmëtar plotëson një kërkesë strehimi për ata me nevoja të veçanta, Komiteti i Shërbimit i Kongregacionit do ta shqyrtojë këtë kërkesë, duke përdorur udhëzimet që ndodhen në formularin e saj. Ata duhet të shqyrtojnë nëse mund të kujdesen vetë si kongregacion për këtë nevojë. Kjo masë vlen vetëm për ata lajmëtarë që kanë një qëndrim të mirë, dhe për fëmijët e tyre që kanë sjellje të mirë. Në rast se Reparti i Strehimit ka ndonjë pyetje për ndonjërën nga kërkesat për ata me nevoja të veçanta, do të lidhet me sekretarin e kongregacionit.
7 Pjesëmarrja në një kongres tjetër: Për shkak të rrethanave, mund të kërkoni që të merrni pjesë në një kongres tjetër, në vend se në kongresin ku është caktuar kongregacioni juaj. Në qoftë se keni nevojë për informacione në lidhje me një kongres tjetër, ju lutemi, flitni me sekretarin e kongregacionit tuaj. Në anën e pasme të kërkesës së strehimit për ata me nevoja të veçanta, janë radhitur sipas datës kongreset krahinore që do të zhvillohen në Shqipëri dhe Kosovë, si edhe adresat e vendeve ku do të zhvillohen ato. Postojeni kërkesën në adresën e duhur dhe në zarf vini edhe adresën tuaj të shkruar me germa shtypi. Sigurohuni që në kërkesë të keni shënuar datat e kongresit në të cilin doni të merrni pjesë. Reparti i Strehimit për atë kongres do t’ju dërgojë listën e tij më të fundit të strehimeve të rekomanduara.
8 Kërkohen vullnetarë: Jezui la një shembull të përsosur, sepse ishte i përulur dhe tregohej i vëmendshëm ndaj nevojave të të tjerëve. (Luka 9:12-17; Gjoni 13:5, 14-16) Edhe ata që dalin vullnetarë për të dhënë ndihmën e tyre në kongres, pasqyrojnë të njëjtën frymë. Për të plotësuar nevojat e reparteve të kongresit, Komiteti i Kongresit shumë shpejt do të kërkojë vullnetarë për të bashkëpunuar me të. Një nevojë të veçantë ka për pleq kongregacioni, që të dalin vullnetarë dhe të pranojnë caktimet që u propozohen. Fryma e tyre e gatishmërisë lë një shembull të mirë për të gjithë kongregacionin.—1 Pjet. 5:2, 3.
9 Çfarë shohin të tjerët?: Një administratore hoteli tha: «Ju jeni klientët tanë të preferuar. Në krahasim me të tjerët silleni shumë më mirë. Të gjithë ata që punojnë në pastrimin e dhomave, tregojnë për mirësjelljen me të cilën i trajtoni dhe për bakshishet që u jepni. Në fakt, të gjithë dëshirojnë të punojnë në fundjavën që vini ju!» Përfaqësuesi i një hoteli tjetër komentoi: «E kemi shumë më të lehtë të punojmë me Dëshmitarët e Jehovait.» Ndoshta këto komente janë bërë edhe si rezultat i sjelljes sate shembullore. Imagjino se sa i lumtur duhet të ndihet Jehovai kur sheh se sillemi në atë mënyrë që sjell lavdërime të tilla!—1 Pjet. 2:12.
10 Nëpërmjet ‘kujdestarit të besueshëm’, Perëndia Jehova ka bërë të mundur që populli i tij të mblidhet edhe këtë verë, për të marrë mësime frymore. (Luka 12:42) Përgatitjet për të ndjekur të tria ditët kërkojnë përpjekje, por ia vlejnë. Kongresi Krahinor i këtij viti, «T’i bindemi Perëndisë», pa dyshim do të na bëjë më të vendosur për t’i shërbyer Jehovait tani e në përjetësi. Qofshim të vendosur për të ndjekur këshillën e psalmistit: ‘Bekoni Perëndinë në kuvende!’—Psal. 68:26.
[Kutia në faqen 3]
Oraret e programit
E premte dhe e shtunë
9.30 - 17.05
E diel
9.30 - 16.10
[Kutia në faqen 4]
Si mund të mbështetni organizimin për strehimin?
◼ Qëndroni vetëm në hotelet e shënuara në listën e strehimeve të rekomanduara të këtij viti. Mos u telefononi hoteleve që nuk janë në listë dhe mos i pyetni nëse kanë ndonjë tarifë të veçantë për kongresin. Hotelet që nuk janë në listë shpesh thonë se kanë një tarifë të veçantë për Dëshmitarët e Jehovait.
◼ Në rast se nuk ka dhoma të lira, pasi t’u keni telefonuar të gjitha hoteleve të shënuara në listë ose në qoftë se keni ndonjë problem me ndonjë hotel, njoftoni sekretarin e kongregacionit. Ai duhet të lidhet me Repartin e Strehimit të kongresit, duke përdorur informacionin në krye të listës. Në vend që t’i telefononi një hoteli që nuk është në listë, ju lutemi, pritni sa të merrni një listë të përditësuar për kongresin.
◼ Rezervoni aq dhoma sa do të përdorni.
◼ Për të garantuar rezervimin, nëse kërkohet nga hoteli, dërgoni një paradhënie për çdo dhomë të rezervuar.
◼ Mbani rezervimin e parë.
◼ Nëse kongregacioni ka asamblenë qarkore atë javë që do të lexohet letra për kongresin ku jeni caktuar, sekretari mund të bëjë një kopje të listës së strehimeve të rekomanduara dhe t’ua japë mbikëqyrësve të studimit të librit, për t’ua treguar grupeve të tyre. Nuk duhet të bëhen kopje të listës së strehimeve të rekomanduara për çdo lajmëtar.
[Kutia në faqen 4]
Cila është mënyra më e mirë për të rezervuar një dhomë hoteli?
1. Merrni në telefon hotelet gjatë orarit të rregullt të punës, duke përdorur numrat e telefonit të shënuar në listën e strehimeve të rekomanduara.
2. Bëjuni të ditur se do të ndiqni kongresin e Dëshmitarëve të Jehovait.
3. Jepni datat kur do të regjistroheni në hotel dhe kur do të largoheni prej tij.
4. Në rast se nuk ka dhoma të lira, telefononi një hotel tjetër të shënuar në listë.
5. Sigurohuni që të paguani tarifën që tregohet në listën e strehimeve. Mos pranoni një tarifë më të lartë.
6. Bëni rezervimin dhe kërkoni një konfirmim për të.
7. Nëse kërkohet, jepni një paradhënie sipas mënyrës së caktuar nga hoteli.