Kutia e pyetjes

◼ Si të sigurohemi që pjesët në mbledhjet e kongregacionit të bëhen brenda kohës së caktuar?

Koha kalon shpejt kur jemi duke folur për diçka të bukur me miqtë. Prandaj mund të jetë e vështirë t’i zhvillojmë pjesët e mbledhjeve brenda kohës së caktuar. Çfarë mund të na ndihmojë?

Fillo në kohë. Kur mblidhet i gjithë kongregacioni, mund të jetë e dobishme ta ftosh auditorin të zërë vend një ose dy minuta më përpara, kështu që mbledhja të fillojë në kohën e caktuar dhe me rregullsi. (Ekl. 3:1) Mbledhjet që bëhen në grupe më të vogla, si mbledhjet për shërbim, nuk duhen shtyrë për të pritur ata që mund të vijnë me vonesë.

Përgatitu mirë. Një faktor kyç për të mos dalë nga koha është të përgatitemi që më përpara. Mbaje të qartë në mendje cili është synimi i caktimit që të është dhënë. Identifiko pikat kryesore dhe nxirri në pah ato. Mos u ngatërro me hollësi të vogla. Bëje të thjeshtë fjalimin. Nëse pjesa përfshin edhe demonstrime ose intervista, dëgjoji që më përpara ato. Sipas mundësive, kontrolloje kohëzgjatjen e fjalimit duke e praktikuar me zë.

Ndaje materialin. Çfarëdo caktimi të kesh, fjalim a diskutim me auditorin, ndoshta do të jetë e dobishme ta ndash materialin në disa pjesë. Vendos se sa kohë do të lësh për secilën pjesë dhe shënoje këtë te shënimet e tua. Pastaj kontrolloje kohën gjatë prezantimit. Kur bën diskutim me auditorin, mos bjer në grackën që të kërkosh kaq shumë komente në pjesën hyrëse saqë të të duhet të nxitosh kur të trajtosh një material më të rëndësishëm që vjen më pas. Drejtuesit e Studimit të Kullës së Rojës duhet të lënë mjaft kohë për të shqyrtuar kutinë e pyetjes në fund. Gjithashtu, duhet të bëjnë kujdes që të mos hyjnë në kohën e caktuar për këngën përmbyllëse dhe për lutjen.

Përfundo në kohë. Nëse një mbledhje ka disa pjesë, siç është Mbledhja e Shërbimit, secili orator duhet t’i kushtojë vëmendje kohës kur e fillon dhe kur e mbaron pjesën e tij. Çfarë mund të bëhet nëse ka rrezik që mbledhja të zgjatë përtej kohës së caktuar? Një ose më shumë vëllezër mund ta shkurtojnë pak kohën e caktuar për pjesën e tyre duke u përqendruar te pikat kryesore dhe duke hequr disa hollësi. Aftësia për të vepruar kështu është tipar i një mësuesi të aftë.

Ne që jemi në auditor mund ta ndihmojmë vëllanë që drejton pjesën duke dhënë përgjigje të shkurtra e të drejtpërdrejta. Pra, të gjithë mund të bëjmë pjesën tonë që mbledhjet të bëhen «siç ka hije dhe me rregull».​—1 Kor. 14:40.