Kongresi Krahinor i Dëshmitarëve të Jehovait për vitin 2007 «Ndiqni Krishtin!»
1, 2. (a) Si i inkurajoi Moisiu izraelitët që të përfitonin nga mbledhja së bashku? (b) Çfarë përgatitjesh duhet të fillojmë të bëjmë që tani?
1 Moisiu e udhëzoi popullin e Izraelit dhe të ardhurit që të mblidheshin çdo shtatë vjet dhe t’u lexohej Ligji. Me ç’qëllim? «Që të dëgjojë e të mësojë.» (Ligj. 31:10-12) Jehovai e kuptonte nevojën e popullit të tij që të mblidhej në grupe të mëdha. Së afërmi, populli i Jehovait do të mblidhet përsëri me rastin e Kongresit Krahinor treditor me temë: «Ndiqni Krishtin!»
2 A keni filluar me përgatitjet? A ju duhet të merrni leje nga punëdhënësi? A mund t’i ndihmoni studentët biblikë ose familjarët jobesimtarë që edhe ata ta ndjekin kongresin bashkë me ju? A ka të tjerë në kongregacion që kanë nevojë për ndihmë për të qenë të pranishëm? A po planifikoni të shkoni në një kongres tjetër e jo tek ai ku është caktuar kongregacioni juaj? Mos keni nevojë për të rezervuar një dhomë në hotel? Informacionet e mëposhtme do t’ju ndihmojnë gjatë përgatitjeve.
3. (a) Si po përmbushet Isaia 25:6 sot? (b) Çfarë është vënë re në lidhje me pjesëmarrjen ditën e premte dhe çfarë duhet të bëjë secili prej nesh?
3 Të jemi të pranishëm në të tria ditët: Jehovai siguron ushqim frymor me bollëk për popullin e tij. (Isa. 25:6) Këtu përfshihet edhe banketi frymor që shërbehet gjatë kongreseve vjetore. Është vënë re se të premten pjesëmarrja është më e ulët sesa ditët e tjera. Vini si synim të jeni në të tria ditët përtëritëse të kongresit që organizata e Jehovait ka përgatitur për ne. Nëse duhet të merrni leje nga punëdhënësi, atëherë lutjuni Jehovait. Pastaj ‘merrni guxim’ dhe flisni me punëdhënësin sapo të njoftohet data e kongresit ku jeni caktuar. (1 Sel. 2:2; Neh. 2:4, 5) Mund ta keni më të lehtë ta bindni, në qoftë se i shpjegoni që kongresi vjetor është pjesë e adhurimit tuaj. Duke i thënë kohë më parë, ai do ta ketë më të lehtë të marrë masat e duhura që t’jua plotësojë kërkesën.
4. Si mund t’i parapërgatitim studentët biblikë ose familjarët tanë jobesimtarë për në kongres?
4 Ndihmoni studentët biblikë dhe familjarët tuaj: Sa bukur do të ishte që studentët biblikë të jenë përkrah jush duke ndjekur kongresin dhe të provojnë drejtpërsëdrejti ngrohtësinë e vëllazërisë sonë të krishterë «në kongregacionin e madh»! (Psal. 22:25) Informojini kohë më parë, në mënyrë që të planifikojnë për të ardhur në kongres. Tregojini arsyet se përse ju pëlqen të shkoni në kongres. Parapërgatitini studentët për çka bëhet në një kongres, duke u treguar videokasetat tona ku ka pamje nga kongrese të mëparshme, në mënyrë të veçantë videokasetën Të bashkuar nga mësimi hyjnor që disponohet në disa gjuhë. Bëjuani të ditur planet tuaja edhe pjesëtarëve të familjes që nuk janë besimtarë. Ndoshta do të gjejnë mundësinë të shohin dramën ose të ndjekin të paktën një ditë të kongresit me ju.
5, 6. (a) Si mund ta shfaqim frymën e bujarisë që tregohet te 1 Timoteut 6:18? (b) Çfarë masash merren për të ndihmuar ata që kanë nevojë për vend strehimi?
5 Ndihmoni vëllezërit dhe motrat: Apostulli Pavël i këshilloi ata të krishterë që ishin të pasur ‘të punonin për të mirën, të ishin të pasur në vepra të shkëlqyera, të ishin dorëgjerë, gati për të ndarë me të tjerët’. (1 Tim. 6:17, 18) Mund ta tregojmë frymën bujare që nxiti Pavli nëse mendojmë për të moshuarit dhe të sëmurët, për ata në shërbimin e plotkohor, për familjet me një prind dhe ndoshta për të tjerët në kongregacion të cilët kanë nevojë për ndihmë që të ndjekin kongresin. Kjo përgjegjësi bie së pari mbi të afërmit e tyre që janë në të vërtetën, por gjithashtu, pleqtë dhe të tjerët mund të tregohen të vëmendshëm ndaj nevojave të tyre e t’u japin me dashuri ndihmën e duhur.—Gal. 6:10; 1 Tim. 5:4.
6 Në rast se dikush në kongregacion ka nevojë të gjejë një vend strehimi, Komiteti i Shërbimit i Kongregacionit duhet të vendosë nëse lajmëtari kualifikohet për të plotësuar formularin Kërkesë strehimi për ata me nevoja të veçanta. Para se formulari t’i dorëzohet Repartit të Strehimit, duhet të shikoni me kujdes udhëzimet që jepen në formular dhe në letrën që më 14 dhjetor 2006 iu dërgua të gjithë trupave të pleqve.
7. Çfarë udhëzimesh jepen nëse kemi nevojë të ndjekim një kongres tjetër dhe jo atë ku është caktuar kongregacioni ynë?
7 Nëse do të ndiqni një kongres tjetër: Kulla e Rojës e 1 marsit 2007 do të përmbajë një listë të të gjitha kongreseve në gjuhën shqipe. Nëse keni nevojë për listën e strehimeve të rekomanduara ose ndonjë informacion shtesë për ndonjë kongres të caktuar, mund t’i dërgoni një letër Komitetit të Kongresit përkatës, duke përdorur adresën që sekretari i kongregacionit do të gjejë në faqen e pasme të formularit Kërkesë strehimi për ata me nevoja të veçanta. Që Komiteti i Kongresit të mund t’ju kthejë përgjigje, sigurohuni që bashkë me letrën të futni një zarf me pullë ku keni shkruar edhe adresën tuaj.
8. Çfarë udhëzimesh duhet të ndjekim kur bëjmë rezervimin e hotelit? (Shih kutinë: «Hapat për të bërë rezervimin në hotel.»)
8 Rezervimi në hotel: Në fund të Mbledhjes së Shërbimit për javën që fillon më 1 janar, ose sapo të dërgohet nga Komiteti i Kongresit, në tabelën e informacionit të kongregacionit do të vendoset lista e strehimeve të rekomanduara të hoteleve që janë në dispozicion. Ndiqni udhëzimet që jepen në kutinë «Hapa për të bërë rezervimin në hotel». Në qoftë se nuk gjeni dhomë të lirë pasi u keni telefonuar të gjitha hoteleve në listë, ose nëse keni ndonjë problem me një hotel të caktuar, flisni me sekretarin e kongregacionit. Ai duhet të lidhet me Repartin e Strehimit të Kongresit duke ndjekur udhëzimet në krye të listës. Mos i telefononi zyrës së degës. Nëse hotelet në listë nuk kanë dhoma të tjera në dispozicion me ato tarifa, ju lutemi, më mirë pritni derisa të vijë lista e përditësuar e hoteleve, sesa t’i telefononi një hoteli që nuk është në listë.
9, 10. (a) Çfarë përgatitjesh bëhen para se ne të mbërrijmë në vendin e kongresit? (b) Si mund ta tregojmë vlerësimin dhe mirënjohjen për të gjithë punën që bëhet për ne? (Lexoni Hebrenjve 13:17.)
9 Bashkëpunoni me rregullimet: Kur mbërrijmë në vendin e kongresit, është më se e dukshme që është bërë një punë e madhe për mikpritjen tonë. Vëllezërit e dashur që shërbejnë si përcjellës na përshëndetin, na japin programet dhe na ndihmojnë të gjejmë vendet. Motrat dhe vëllezërit kanë pastruar vendin e kongresit dhe kanë ngritur një platformë të bukur. Ndonëse nuk i shohim, përpjekje të mëdha janë bërë edhe për të përgatitur pjesët e programit, për të gjetur hotelet dhe për t’u kujdesur për gjëra të vogla të panumërta.
10 Për çdo kongres, shumë veta punojnë muaj të tërë për të bërë gjërat e nevojshme, e madje edhe familjet e tyre kontribuojnë duke u lënë kohë të lirë që ata të merren me çështje kaq të rëndësishme. A nuk i vlerësojmë sakrificat që bëhen për dobinë e secilit prej nesh? Mund ta tregojmë mirënjohjen tonë, duke ndjekur udhëzimet në këtë artikull dhe ndonjë drejtim tjetër që mund të marrim para kongresit. (Hebr. 13:17) Bashkëpunimi me gatishmëri i të gjithëve bën që çdo gjë «të ndodhë si ka hije dhe me rregull».—1 Kor. 14:40.
11. (a) Pse janë kaq të rëndësishme sot mbledhjet e popullit të Jehovait? (b) Çfarë mund të bëjë secili prej nesh tani?
11 Ndërsa ‘e shohim se dita po afrohet’, mbledhjet e popullit të Perëndisë janë gjithnjë e më të rëndësishme. (Hebr. 10:25) Në kongreset tona të krishtere, klasa e skllavit të besueshëm dhe të matur siguron informacionet, të cilat na ndihmojnë ‘të përmbushim me kujdes të gjitha fjalët’ që Jehovai dëshiron të ndjekim. (Ligj. 31:12) Filloni që tani të bëni planet për të ndjekur të tria ditët e Kongresit Krahinor me temë «Ndiqni Krishtin!», dhe kështu të nxirrni dobi nga mësimet frymore dhe nga shoqëria e këndshme.
[Kutia në faqen 3]
Oraret e programit
E premte dhe e shtunë
9.20 - 17.05
E diel
9.20 - 16.10
[Kutia në faqen 4]
Hapat për të bërë rezervimin në hotel:
1. Merrni në telefon hotelet gjatë orarit normal të punës, duke përdorur numrat e telefonit të shënuar në listën e strehimeve të rekomanduara.
2. Bëjuni të ditur se do të ndiqni kongresin e Dëshmitarëve të Jehovait.
3. Jepni datat kur do të regjistroheni në hotel dhe kur do të largoheni prej tij.
4. Në rast se nuk ka dhoma të lira, telefononi një hotel tjetër të shënuar në listë.
5. Mos pranoni një tarifë më të lartë se ajo e treguar në listë.
6. Bëni rezervimin dhe kërkoni një konfirmim për të.
7. Nëse kërkohet, jepni një paradhënie sipas mënyrës së caktuar nga hoteli.
Udhëzime:
◼ Qëndroni vetëm në hotelet e shënuara në listën e strehimeve të rekomanduara.
◼ Mos telefononi në hotele që nuk janë në listë, për të pyetur nëse kanë tarifa të reduktuara për rastin e kongresit. Telefonojuni VETËM hoteleve që janë në listë.
◼ Hotelet nuk do të pranojnë rezervime për rastin e kongresit, para se të bëhet Mbledhja e Shërbimit për javën që fillon më 1 janar 2007. Para kësaj date, mos telefononi për të bërë rezervimin e hotelit.
◼ Pranoni vetëm tarifat që tregohen në listë.
◼ Çdo dhomë e rezervuar duhet të jetë në emër të atij që do të qëndrojë në atë dhomë.
◼ Për të bërë rezervimin përdorni numrat e telefonit që jepen në listën e hoteleve. Mos e bëni rezervimin nëpërmjet internetit, nëse në listë nuk thuhet një gjë e tillë.
◼ Që të veprojmë në përputhje me rregullat e mbrojtjes kundër zjarrit, mos e kaloni numrin e të rriturve që lejohet të qëndrojë në dhomën e hotelit, siç tregohet edhe në listën e hoteleve.
◼ Mos i thoni sekretarit të kongregacionit që nuk ka më dhoma në dispozicion, nëse nuk keni folur me TË GJITHA hotelet në listë.
◼ Mbani rezervimin e parë.—Mat. 5:37.
◼ Nëse doni të anuloni rezervimin, bëjeni sa më shpejt të jetë e mundur. Sigurohuni që të merrni një konfirmim për këtë.