Programi i asamblesë speciale njëditore

Tema e programit të asamblesë speciale njëditore për vitin e shërbimit 2009 është «Ki kujdes ta përmbushësh si duhet shërbimin» dhe bazohet te Kolosianëve 4:17. Si të krishterë, e marrim seriozisht këtë nxitje. Qëllimi ynë është ta përmbushim shërbimin me besnikëri, ashtu si Jezui. (Gjoni 17:4) Edhe apostulli Pavël la një shembull të shkëlqyer për ne në këtë drejtim. Ai ishte i vendosur ta çonte deri në fund vrapimin që kishte nisur për sa i përket shërbimit.—Vep. 20:24.

Fjalimi i mbikëqyrësit qarkor do të tregojë se si i kapërcejnë vështirësitë në shërbim lajmëtarë të ndryshëm. Pastaj, fjalimi «Kultivoni atë që keni mbjellë» do të na tregojë si mund t’i ndihmojmë vërtet ata që janë «të prirur për jetën e përhershme». (Vep. 13:48) Oratori vizitues në fillim do të shqyrtojë varg për varg 2 Korintasve 6:1-10, në fjalimin me temë «Si e rekomandojmë veten si shërbëtorë të Perëndisë? Pasdite, ai do të flasë për temën «Vlerësojeni shumë shërbimin». Pa dyshim do të inkurajohemi nga pjesët «Të rinj e të moshuar kënaqen në shërbim» dhe «Të rinj që përmbushin shërbimin». Ata që dëshirojnë ta simbolizojnë kushtimin e tyre me pagëzimin në ujë në një nga asambletë e ardhshme, duhet të flasin sa më shpejt me mbikëqyrësin drejtues. Një pjesë e rëndësishme në asamble dhe kongrese është edhe shqyrtimi i Kullës së Rojës. Merrni me vete kopjen tuaj që është për t’u studiuar javën e asamblesë speciale njëditore.

Për të përmbushur shërbimin, duhet të bëjmë çmos që interesat ose veprimtaritë e tjera të mos i zënë vendin asaj që na ka besuar Jehovai. Inkurajimi nga Shkrimet që jep kjo asamble speciale njëditore, do të na ndihmojë të kuptojmë se ç’duhet të bëjmë që të mos shpërqendrohemi dhe të analizojmë shërbimin që bëjmë për ta përmbushur sa më mirë.