Ruaj mendjen!
1. Çfarë teme ka asambleja qarkore për vitin e shërbimit 2013 dhe cili është qëllimi i saj?
1 Jezui i udhëzoi dishepujt ta donin Jehovain me gjithë zemrën, shpirtin dhe mendjen e tyre. (Mat. 22:37, 38) Kongreset dhe asambletë e këtij viti kanë për qëllim të na ndihmojnë të forcojmë njeriun tonë të brendshëm. Siç mund ta mbani mend, tema e kongresit krahinor ishte «Ruaj zemrën!» Asambleja speciale njëditore për vitin e shërbimit 2013 mban temën «Ruaj ndërgjegjen!» Kurse asambleja qarkore që do të fillojë muajin e ardhshëm, do të ketë temën «Ruaj mendjen!» dhe bazohet te Mateu 22:37. Kjo asamble synon të ndihmojë secilin prej nesh që të analizojmë mendimet, me qëllim që të jenë më të këndshme për Jehovain.
2. Përgjigjet e cilave pyetje duhet të kërkojmë gjatë programit?
2 Çfarë do të trajtohet? Ndërsa dëgjojmë programin e asamblesë qarkore, duhet të kërkojmë përgjigjet e këtyre pyetjeve, që janë pikat kryesore:
• Çfarë të bëjmë që ‘të mos mendojmë si njerëzit’?
• Si mund t’i ndihmojmë jobesimtarët të heqin velin që u verbon mendjen?
• Çfarë qëndrimi mendor duam të kemi?
• Çfarë dobish kemi kur meditojmë siç duhet?
• Si mund ta lejojmë Jehovain të na modelojë mënyrën e të menduarit?
• Si i kontribuojnë lumturisë familjare burri, gruaja, prindërit dhe fëmijët?
• Si mund të jemi gati për ditën e Jehovait?
• Çfarë do të thotë të mbledhim forcat mendore për aktivitet?
• Çfarë dobish nxjerrin ata që e zbatojnë atë që mësojnë?
3. Pse është e rëndësishme t’i ndjekim të dyja ditët, të jemi të vëmendshëm dhe ta zbatojmë atë që mësojmë?
3 Satanai po bën çmos që të na korruptojë mendjen. (2 Kor. 11:3) Prandaj, duhet të mbrojmë mendjen dhe të kontrollojmë mendimet. Duhet të vazhdojmë të pasqyrojmë mendjen e Krishtit dhe të luftojmë kundër ndikimit të kësaj bote të paligjshme. (1 Kor. 2:16) Prandaj, merrni masa që të ndiqni të dyja ditët e asamblesë qarkore dhe jini të vëmendshëm. Nëse zbatojmë informacionet jetësore që do të dëgjojmë, do të arrijmë të mbledhim forcat mendore që t’i shërbejmë me zell Mbretërisë.—1 Pjet. 1:13.