Ditshupiso Tsa Bukana ya Seboka sa Bophelo le Tshebeletso
© 2024 Watch Tower Bible and Tract Society of Pennsylvania
LA 2-8 SEPTEMBER
MATLOTLO A TSWANG BIBELENG PESALEME YA 79-81
Bontsha Hore o Rata Lebitso la Jehova le Kganyang
Thekollo—ke Mpho e Molemo e Tswang ho Ntate
5 Re ka bontsha jwang hore re rata lebitso la Jehova? Ka tsela eo re itshwarang ka yona. Jehova o batla hore re halalele. (Bala 1 Petrose 1:15, 16.) Sena se bolela hore re rapele yena feela, le hore re mo mamele ka dipelo tsohle tsa rona. Esita le ha re hloriswa re etsa sohle seo re ka se kgonang ho phela ka melaomotheo ya hae e lokileng. Ha re etsa dintho tse ntle, re etsa hore lesedi le kganye mme seo se tlisetsa lebitso la Jehova thoriso. (Mat. 5:14-16) Re bontsha hore re a halalela ka ho phela ka tsela e bontshang hore melao ya Jehova e molemo le hore diqoso tsa Satane ke mashano. Jwalo ka batho ba sa phethahalang, ha re etsa diphoso re a baka mme re kgaotsa ho etsa dintho tse sa kgahliseng Jehova.—Pes. 79:9.
ijwbv 3 ¶4-5
Baroma 10:13—“Ya Rapelang Lebitsong la Morena”
Ka Bibeleng polelwana e reng “bitsa lebitso la Jehova” ha e bolele feela ho tseba lebitso la Modimo le ho le sebedisa ha re rapela. (Pesaleme ya 116:12-14) Ha e le hantle e bolela ho tshepa Modimo le ho balehela ho yena ha re hloka thuso.—Pesaleme ya 20:7; 99:6.
Lebitso la Modimo le ne le le bohlokwa ho Jesu Kreste. Mantswe a hae a pele thapelong ya mohlala a re: “Ntate wa rona ya mahodimong, lebitso la hao le halaletswe.” (Matheu 6:9) Jesu o ile a boela a re haeba re batla ho fumana bophelo bo sa feleng, re lokela ho tseba, ho mamela le ho rata Monga lebitso leo.—Johanne 17:3, 6, 26.
Matlotlo a Patilweng
it-2-E 111
Josefa
Lebitso la Josefa le Entswe la Bohlokwa. Ka ha Josefa o ne a nkuwa e le wa bohlokwa hara bara ba Jakobo, ho ne ho loketse hore ka dinako tse ding lebitso la hae le sebediswe ho emela maloko ohle a Iseraele (Ps 80:1) kapa bao e neng e tla ba karolo ya mmuso o ka leboya. (Ps 78:67; Amo 5:6, 15; 6:6) Hape lebitso la hae le hlahella boprofeteng ba Bibele. Boprofeta ba Ezekiele bo bontsha hore Josefa o ne a tla fuwa dikarolo tse pedi tsa naha. (Eze 47:13) E nngwe ya dikeiti tsa motse wa “Jehova o Teng Moo” e rehelletswe ka lebitso la Josefa (Eze 48:32, 35), tlaleho e nngwe ha e bua ka ho momahana ha batho ba Jehova, Josefa o hlaloswa e le morena wa karolo e nngwe ya setjhaba le Juda e le morena wa karolo e nngwe. (Eze 37:15-26) Boprofeta ba Obadia bo bontshitse hore “ba ntlo ya Josefa” ba ne ba tla nka karolo ha ho fediswa “ba ntlo ya Esau” (Ob 18) le boprofeta ba Zakaria bo bontshitse ha Jehova a pholosa “ditloholo tsa Josefa.” (Zak 10:6) Ho ena le Efraime, Josefa o hlahella e le e mong wa maloko a Iseraele ya moya.—Tshe 7:8.
Taba ya hore lengolong la Tshenolo 7:8 ho buuwa ka Josefa e fana ka boikutlo ba hore boprofeta boo Jakobo a ileng a bua ka bona pele a shwa bo ne bo tlo phethahala ho Iseraele ya moya. Ka hoo, ya Matla ya Thusitseng Jakobo e leng Jehova Modimo, o ile a fana ka Kreste Jesu e le Modisa ya Molemo ya ileng a fana ka bophelo ba hae molemong wa “dinku.” (Joh 10:11-16) Hape Kreste Jesu ke lejwe la sekgutlo la motheo leo tempele ya Modimo e entsweng ka Iseraele ya moya e hahilweng hodima lona. (Ef 2:20-22; 1Pe 2:4-6) Kreste Jesu eo e leng Modisa le Lejwe o dutse le ya Matla ohle.—Joh 1:1-3; Dik 7:56; Heb 10:12; bapisa le Ge 49:24, 25.
LA 9-15 SEPTEMBER
MATLOTLO A TSWANG BIBELENG PESALEME YA 82-84
Ananela Dintho Tseo o di Etsetsang Jehova
wp16.6 8 ¶2-3
Ithute ho Dinonyana Tsa Lehodimo
Baahi ba Jerusalema ba ne ba tseba mafokotsane haholo ka ha a ne a tlwaetse ho haha dihlaha tsa wona marulelong a matlo a bona. Mafokotsane a mang a ne a hahile dihlaha tsa wona tempeleng ya Solomone. Ho ka etsahala hore mafokotsane ana a ne a hahile dihlaha tsa wona moo tempeleng hobane e ne e le sebaka se sireletsehileng bakeng sa ho hodisa madinyane.
Mongodi wa Pesaleme ya 84 e leng e mong wa bara ba Kora, ya neng a tla ho tla sebeletsa tempeleng ka mora dikgwedi tse ding le tse ding tse tsheletseng o ile a bona dihlaha tsa wona ha a ne a tlile tempeleng. O ne a lakatsa eka a ka be a dula ntlong ya Jehova ka mehla jwalo ka mafokotsane ao. O ile a bina a re: “Tabernakele ya hao e kgolo e ntle hakaakang, Jehova wa mabotho! Moya wa ka o labalabetse mme o hloretse mabala a Jehova. Esita le nonyana e fumane ntlo, lefokotsane le iphumanetse sehlaha, moo le behileng madinyane a lona—aletare ya hao e kgolo, Jehova wa mabotho, Morena wa ka le Modimo wa ka!” (Pesaleme ya 84:1-3) Na wena le bana ba hao le labalabela ho ba phuthehong ya batho ba Modimo?—Pesaleme ya 26:8, 12.
w08 7/15 30 ¶3-4
Iketsetse Dipakane Tseo o ka di Finyellang, o Tle o Thabe
Botsofadi kapa ho kula di ka nna tsa re sitisa ho etsa dintho tse ding tshebeletsong ya Jehova. Haeba o motswadi, o ka nna wa ba le maikutlo a hore ha o rue molemo o mokaalo thutong ya botho kapa dibokeng tsa Bokreste ka hobane o qeta nako ya hao e ngata le matla o hlokomela bana ba banyenyane. Le ha ho le jwalo, na ho ka etsahala hore ebe ka dinako tse ding ho nahana haholo ka dintho tseo o sitwang ho di etsa ho ka o sitisa ho bona seo o ntseng o ka se finyella?
Dilemo tse dikete tse fetileng, Molevi e mong o ile a bua ka takatso eo a neng a ena le yona eo ho neng ho ke ke ha etsahala hore a e finyelle. O ne a ena le tlotla e kgethehileng ya ho sebetsa tempeleng ka dibeke tse pedi selemo le selemo. Le ha ho le jwalo, o ile a bua ka takatso ya hae e babatsehang ya ho dula ka mehla haufi le aletare. (Pes. 84:1-3) Ke eng e ileng ya thusa monna eo ya tshepahalang hore a kgotsofale? O ile a hlokomela hore esita le ho qeta letsatsi le le leng feela mabaleng a tempele e ne e le tlotla e kgethehileng haholo. (Pes. 84:4, 5, 10) Ka ho tshwanang, ho ena le ho nahana feela ka dintho tseo re sitwang ho di etsa, re lokela ho leka ho lemoha le ho ananela seo re ka kgonang ho se etsa.
Jehova o o Nka o le Motho wa Bohlokwa
12 Haeba o a kula, kgodiseha hore Jehova o utlwisisa ka moo o ikutlwang ka teng. Mo kope ho re a o thuse hore o shebe boemo ba hao ka tsela e nepahetseng. Bala mantswe a kgothatsang ao Jehova a o ngolletseng ona ka Bibeleng. Nahana haholo ka ditemana tse bontshang hore Jehova o nka bahlanka ba hae e le ba bohlokwa. Ka hoo ha o ntse o etsa jwalo, o tla bona hore Jehova o mosa ho bahlanka ba hae ba mo sebeletsang ka botshepehi.—Pes. 84:11.
Matlotlo a Patilweng
it-1-E 816
Dikgutsana
Ka ha ho ne ho le bonolo ho se nkele hloohong batho ba hlokahalletsweng le ba sa kgoneng ho ikemela, ha Jehova a hlalosa boemo ba Baiseraele o ne a sebedisa lentswe “dikgutsana” ho bontsha hore ba na le kamano e ntle le yena kapa tjhe. Ha setjhaba se ne se ena le kamano e ntle le Modimo se ne se hlokomela dikgutsana. Ha ho ne ho sena toka naheng, setjhaba se ne se sa hlokomele dikgutsana mme lena e ne e le letshwao le bontshang hore setjhaba se lahlile Modimo. (Ps 82:3; 94:6; Esa 1:17, 23; Jer 7:5-7; 22:3; Eze 22:7; Zak 7:9-11; Mal 3:5) Jehova o ne a sa rate batho ba neng ba hatella dikgutsana. (De 27:19; Esa 10:1, 2) Jehova o itlhalosa e le Molopolli (Pr 23:10, 11), Mothusi (Ps 10:14) le Ntate (Ps 68:5) wa tsona. Jehova ke yena ya fanang ka kahlolo molemong wa tsona (De 10:17, 18), ke yena ya ba hauhelang (Hos 14:3), ke yena ya ba pholosang (Ps 146:9), hape ke yena ya etsang hore ba dule ba phela.—Jer 49:11.
E nngwe ya dintho tse kgethollang Bakreste ba nnete ke ka moo ba nahanelang batho ba hlokahalletsweng ke balekane kapa batswadi ba bona. Morutuwa Jakobo o ile a ngolla Bakreste a re: “Mofuta wa borapedi o hlwekileng ho Modimo Ntate wa rona ke ona: Ho hlokomela dikgutsana le bahlolohadi ha ba ena le mathata le hore motho a se ke a silafatswa ke tsela eo batho ba sa mameleng ba phelang ka yona.”—Jak 1:27.
LA 16-22 SEPTEMBER
MATLOTLO A TSWANG BIBELENG PESALEME YA 85-87
Thapelo e re Thusa Hore re Mamelle
w12 5/15 25 ¶10
Na o Bonahatsa Kganya ya Jehova?
10 E le hore re bonahatse kganya ya Modimo, ho hlokahala hore re boele re ‘phehelle thapelong.’ (Bar. 12:12) Re lokela ho rapela hore Jehova a re thuse hore re mo sebeletse ka tsela eo a e amohelang. E le hore re finyelle seo, re lokela ho kopa Modimo hore a re fe moya o halalelang, tumelo e eketsehileng, matla a hore re hlole diteko le hore re kgone ho ‘tshwara lentswe la nnete ka nepo.’ (2 Tim. 2:15; Mat. 6:13; Luka 11:13; 17:5) Feela jwalo ka ha ngwana a tshepa ntate wa hae, le rona re lokela ho tshepa Ntate wa rona ya lehodimong e leng Jehova. Haeba re kopa hore a re thuse hore re mo sebeletse ka botlalo, re ka kgodiseha hore o tla fela a etse jwalo. E se e ka le ka mohla re ke ke ra nka hore re a mo kgathatsa! Ho ena le hoo, ha re rapela re lokela ho mo rorisa, re mo lebohe, re kope hore a re tataise haholoholo ha re thulana le diteko re be re kope hore a re thuse hore re mo sebeletse ka tsela e tla tlotlisa lebitso la hae le halalelang.—Pes. 86:12; Jak. 1:5-7.
Jehova o Araba Dithapelo Tsa Rona Jwang?
17 Bala Pesaleme ya 86:6, 7. Mopesaleme Davida o ne a kgodisehile hore Jehova o utlwa dithapelo tsa hae ebile o a di araba. Le wena o ka kgodiseha jwalo ka yena. Mehlala eo re buileng ka yona sehloohong sena e a re tiisetsa hore Jehova a ka re fa bohlale le matla a ho mamella mathata. A ka sebedisa Bakrestemmoho le rona kapa batho ba sa mo sebeletseng ho re thusa.
18 Le hoja Jehova a sa arabele dithapelo tsa rona ka tsela eo re e lebeletseng, re a tseba hore o a di araba. O re fa dintho tseo re di hlokang ka nako eo re di hlokang ka yona. Ka hoo o dule o rapela Jehova o tshepile hore o tla o utlwa. O kgodisehe hore Jehova o tla o thusa hona jwale le hore o tla “kgotsofatsa dintho tsohle tse phelang” lefatsheng le letjha.—Pes. 145:16.
Matlotlo a Patilweng
it-1-E 1058 ¶5
Pelo
Ho Sebeletsa ka “Pelo Yohle.” E le hore pelo ya sebele e sebetse hantle e lokela ho ba e felletseng empa pelo ya tshwantshetso e ka arohana. Davida o ile a rapela a re: “Etsa hore ke tshabe lebitso la hao ka pelo ya ka yohle,” sena se ka bolela hore pelo ya motho e ka arohana ho latela dintho tseo a di ratang le dintho tseo a tshabang ho di etsa. (Ps 86:11) Motho ya jwalo a ka ba le ‘pelo e sa fellang’ e leng hore o ba foofo tseleng eo a sebeletsang Modimo ka yona. (Ps 119:113; Tshe 3:16) Motho a ka ba le dipelo tse pedi ka hore a leke ho sebeletsa benghadi ba babedi kapa a bua ntho e itseng empa ha e le hantle a bolela se fapaneng. (1Kr 12:33; Ps 12:2) Jesu o ile a kgalemela batho bao ba dipelo di pedi ka matla a ba a ba bitsa baikaketsi.—Mat 15:7, 8.
LA 23-29 SEPTEMBER
MATLOTLO A TSWANG BIBELENG PESALEME YA 88-89
Ha ho na Bobusi bo ka Bapiswang le ba Jehova
Tshehetsa Puso ya Jehova!
5 Ho na le lebaka le leng le bontshang hore Jehova o a tshwaneleha ho ba Mmusi. O sebedisa bolaodi ba hae ka toka e phethahetseng. O re: “Ke nna Jehova, Ya bontshang mosa o lerato, toka le ho loka lefatsheng; etswe ke kgahliswa ke dintho tsena.” (Jer. 9:24) Ha a itshetleha ka melao e ngotsweng ke batho ba sa phethahalang hore e mo thuse ho kgetholla se nepahetseng le se fosahetseng. Ke yena mohlodi wa toka e phethahetseng ka hoo o fana ka melao e lokileng. “Ho loka le kahlolo ke sebaka se tiisitsweng sa terone ya [hae],” ka lebaka leo re ka kgodiseha hore melao, melaomotheo le diqeto tsa hae di lokile. (Pes. 89:14; 119:128) Ka lehlakoreng le leng, ho sa tsotellehe dipuonyana tsa Satane tsa hore Jehova o haellwa ke bokgoni ba ho busa, Satane o hlolehile ho etsa hore ho be le toka lefatsheng.
Tshehetsa Puso ya Jehova!
10 Jehova ha a buse batho ka ho ba hatella empa o tenyetseha le maemo. Ka hoo batho ba ba le bolokolohi ebile ba a thaba tlasa puso ya hae. (2 Bakor. 3:17) Ha Davida a bua ka puso eo o ile a re: “Ho hlompheha le bokgabane di ka pela hae, Matla le thabo di sebakeng sa hae.” (1 Likron. 16:7, 27) Le mopesaleme Ethane o ile a ngola a re: “Ho thaba batho ba tsebang mohoo wa thabo. Jehova, ba ntse ba tsamaya leseding la sefahleho sa hao. Ba ithabela lebitsong la hao letsatsi lohle ba phahamiswa ho lokeng ha hao.”—Pes. 89:15, 16.
11 Haeba re dula re nahanisisa ka molemo wa Jehova re tla kgodiseha hore puso ya hae e molemo ka ho fetisisa. Re tla ikutlwa jwalo ka mopesaleme ya ileng a re: “Letsatsi mabaleng a hao le molemo ho feta a sekete sebakeng se seng.” (Pes. 84:10) Mantswe ao ke nnete. Jwalo ka Moqapi le Mmopi, Jehova o tseba seo re se hlokang e le hore re thabe mme ka mehla o re etsetsa dintho tse re kgotsofatsang. Ha re mo mamela re tla thaba ebile re tla itswela molemo, le haeba ditaelo tsa hae di hloka hore re etse boitelo.—Bala Esaia 48:17.
w14 10/15 10 ¶14
Eba le Tumelo e sa Thekeseleng Mmusong
14 Nahana ka seo Jehova a ileng a se tshepisa Morena Davida wa Iseraele ya boholoholo ha a etsa selekane sa Davida. (Bala 2 Samuele 7:12, 16.) Jehova o ile a etsa selekane sena le Davida ha e ntse e le morena Jerusalema, mme a mo tshepisa hore Mesia o tla hlaha lesikeng la hae. (Luka 1:30-33) Jehova o ile a boela a totobatsa leloko leo peo e neng e tla hlaha ho lona le hore mojalefa wa Davida o ne a tla ba le “tokelo ya molao” ya ho busa Mmusong wa Bomesia. (Ezek. 21:25-27) Jesu o ne a tla tiisa borena ba Davida ka thata “ho isa nakong e sa lekanyetswang.” Ha e le hantle, peo ya Davida “e tla ba teng ho isa nakong e sa lekanyetswang, le terone ya hae jwalo ka letsatsi.” (Pes. 89:34-37) Puso ya Bomesia e ke ke ya eba le bobodu, mme ditlhohonolofatso tsa yona e tla ba tsa ka ho sa feleng!
Matlotlo a Patilweng
cl 281 ¶4-5
“Ke Wena Feela ya Tshepahalang”
4 “Botshepehi” ka moo bo sebedisitsweng ka teng ka Mangolong a Seheberu ke mosa oo ka lerato o kgomarelang ntho o sa e tlohele ho fihlela morero wa wona ka yona o finyeletswe. Motho ya tshepahalang ke ya lerato. Ka ho thahasellisang, mopesaleme o bitsa kgwedi “paki e tshepahalang mahodimong” ka ha e hlaha bosiu bo bong le bo bong. (Pesaleme ya 89:37) Ka kutlwisiso ena, kgwedi e a tshepahala, e ka tsheptjwa. Empa kgwedi e ke ke ya tshepahala ka kutlwisiso eo motho a tshepahalang ka yona. Hobaneng? Hobane botshepehi ba motho ke ponahatso ya lerato—ntho eo dintho tse sa pheleng di sitwang ho e bonahatsa.
5 Ho ya ka kutlwisiso ya Mangolo, botshepehi bo na le boikutlo bo mofuthu. Ho bo bonahatsa ka bohona ho bontsha hore ho na le kamano e itseng pakeng tsa motho ya bontshang tshobotsi ena le eo e bontshwang ho yena. Botshepehi bo jwalo ha bo fetofetohe. Ha bo tshwane le maqhubu a lewatle a akgotswang ke meya ya difefo. Ho ena le hoo, botshepehi, kapa lerato le tshepahalang, bo na le botsitso le matla a ho hlola ditshitiso tse thata ka ho fetisisa.
LA 30 SEPTEMBER–LA 6 OCTOBER
MATLOTLO A TSWANG BIBELENG PESALEME YA 90-91
O Tshepe Jehova Haeba o Batla ho Phela ha Lelele
Batho Ba Batla Ho Phela Nako E Telele
Borasaense ba bangata ba re le hoja ho na le meriana e mengata e etsang hore batho ba se ke ba tsofala, empa ha e etse hore batho ba phele nako e telele ho ya ka moo ba lokelang ho phela ka teng. Ke nnete hore ho tloha dilemong tsa bo 1800 batho ba se ba kgona ho phela nako e teletsana. Sena se a kgonahala hobane ba hlwekisa mmele le mahae a bona, ba sebedisa meriana e ba thusang hore ba se ke ba kula le e fodisang malwetse hore ba phele nako e telele. Ditsebi tse sebetsang ka diphatsa tsa lefutso di dumela hore batho ha ba sa phela nako e telele ho ya ka moo ba neng ba lokela ho phela ka teng.
Dilemo tse ka bang 3 500 tse fetileng, mongodi e mong wa Bibele e leng Moshe o ile a re: “Matsatsi a dilemo tsa rona ke dilemo tse mashome a supileng; haeba e le ka lebaka la matla a kgethehileng e ba dilemo tse mashome a robedi. Empa le ha ho le jwalo a tsitlella kgathatsong le dinthong tse kotsi; etswe a lokela ho feta ka pele, mme re a fofa.” (Pesaleme ya 90:10) Ho sa tsotellehe hore na batho ba etsa boiteko bofe ba ho leka ho eketsa nako ya ho phela, bophelo bo ntse bo le jwalo ka ha Moshe a ile a bo hlalosa.
Ka lehlakoreng le leng, diphoofolo tse ding tse kang red sea urchin le mefuta e meng ya quahog clam di kgona ho phela dilemo tse ka hodimo ho 200 mme le difate tse ding tse kgolo tse kang sa sequoia di kgona ho phela dilemo tse diketekete. Ha re bapisa dilemo tseo rona re di phelang le tsa dibopuwa tse ding, na ha re ipotse hore, ‘Na bophelo boo ke bona phetho?’
wp19.1 5, lebokose
Lebitso la Modimo ke Mang?
Ena ke potso eo batho ba bangata ba ipotsang yona. Mohlomong le wena o kile wa ipotsa yona. O ka nna wa ipotsa wa re: ‘Haeba hona le motho ya bopileng lehodimo le lefatshe le dintho tsohle tse ho tsona, jwale ke mang ya bopileng Modimo?’
Borasaense le bona ba a dumela hore lehodimo le lefatshe di na le qalo. Seo ba se buang se dumellana le Bibele ha e re: “Tshimolohong Modimo o ile a bopa mahodimo le lefatshe.”—Genese 1:1.
Lehodimo le lefatshe ha di a iketsa, ebile ho ne ho ke ke ha kgoneha hore di iketse. E le hore ntho ebe teng, ho lokela hore hobe le motho ya e etsang. Haeba ho sena mmopi, ho ka be ho sena dintho tsohle tseo re di bonang ho akarelletsa le rona. Ka hoo, ho na le mmopi! Eo e seng motho wa nama le madi jwalo ka rona hape o matla ohle mme lebitso la hae ke Jehova.—Johanne 4:24.
Bibele ha e bua ka Modimo e re: “Pele dithaba di tswalwa, kapa o qala ho hlahisa lefatshe le naha e behang jwalo ka ha eka ke ka bohloko ba pelehi, esita le ho tloha nakong e sa lekanyetswang ho isa nakong e sa lekanyetswang o Modimo.” (Pesaleme ya 90:2) Ka lebaka leo, Modimo haesale a le teng. Yaba “tshimolohong,” o bopa lehodimo le lefatshe.—Tshenolo 4:11.
Lerato le re Thusa ho Hlola Tshabo
16 Satane o a tseba hore re rata bophelo. O re re ka tela ntho le ha e le efe, esita le setswalle sa rona le Jehova hore feela re phele. (Jobo 2:4, 5) Empa ntho ena eo Satane a e buang ha se nnete. Ka ha ke yena “ya nang le mokgwa wa ho baka lefu,” o sebedisa tshabo eo re nang le yona ka lefu e le ho etsa hore re se ke ra sebeletsa Jehova. (Baheb. 2:14, 15) Ka dinako tse ding batho ba susumetswang ke Satane, ba leka ho re tshosa ka hore ba tla re bolaya haeba re sa furalle tumelo ya rona. Maemong a mang, Satane a ka nka monyetla haeba re kula ebe o leka ho etsa hore re se ke ra mamela Modimo. Dingaka kapa ditho tsa lelapa tseo eseng Dipaki di ka re hatella hore re tshele madi e leng ntho e kgahlanong le melao ya Modimo. Kapa motho e mong a ka re susumetsa hore re amohele mokgwa wa phekolo o sa dumellaneng le melaomotheo ya Bibele.
17 Le hoja re sa batle ho shwa, re a tseba hore Jehova a ke ke a tlohela ho re rata le ha re ka shwa. (Bala Baroma 8:37-39.) Ha metswalle ya Jehova e shwa o a e hopola. O e hopola jwalo ka ha eka e ntse e phela. (Luka 20:37, 38) Hape o hlolohelwa ho e tsosa. (Jobo 14:15) Jehova o re rekile ka theko e phahameng haholo e le hore re “be le bophelo bo sa feleng.” (Joh. 3:16) Re a tseba hore Jehova o re rata haholo ebile o a re tsotella. Ka hoo, ha re kula kapa re tshoswa ka hore re tla bolawa, ha re fetohele Jehova empa re itshetleha ka yena hore a re tshedise a be a re fe bohlale le matla. Ke yona ntho eo Valérie le monna wa hae ba ileng ba e etsa.—Pes. 41:3.
Matlotlo a Patilweng
Na Motho e Mong le e Mong o na le Lengeloi le mo Sireletsang?
Bibele ha e rute hore motho e mong le e mong o na le lengeloi le mo sireletsang. Jesu o ile a re: “Iponeleng hore le se ke la nyedisa e mong wa ba banyenyane bana [balatedi ba Kreste]; etswe ke a le bolella hore mangeloi a bona lehodimong ka mehla a bona sefahleho sa Ntate ya lehodimong.” (Matheu 18:10) Le ha ho le jwalo, Jesu o ne a sa re motho e mong le e mong o na le lengeloi, ho e na le hoo, o ne a bolela hore mangeloi a thahasella molatedi e mong le e mong wa hae. Ka hoo, barapedi ba nnete ha ba ipehe kotsing feela hobane ba nahana hore mangeloi a Modimo a tla ba sireletsa.
Empa na seo se bolela hore mangeloi ha a thuse batho? Tjhe. (Pesaleme ya 91:11) Batho ba bang ba na le boikutlo ba hore Modimo o ba file mangeloi a ba sireletsang le ho ba tataisa. Kenneth eo re buileng ka yena qalong ke e mong wa bona. Le hoja re ke ke ra tsitlella ntlheng e itseng, ho ka etsahala hore e be o nepile. Dipaki Tsa Jehova di atisa ho bona ka moo mangeloi a di thusang ka teng ha di ntse di etsa mosebetsi wa ho ruta batho Bibele. Le ha ho le jwalo, ka ha mangeloi ha a bonahale, re ke ke ra hlalosa ka ho toba tsela eo Modimo a a sebedisang ka yona ho thusa batho maemong a fapaneng. Ho sa tsotellehe maikutlo a fapaneng a batho, re etsa hantle ha re leboha ya Matla Ohle ka tataiso eo a tswelang pele ho re fa yona.—Bakolose 3:15; Jakobo 1:17, 18.
LA 7-13 OCTOBER
MATLOTLO A TSWANG BIBELENG PESALEME YA 92-95
Ho Sebeletsa Jehova ke Qeto e Bohlale ka ho Fetisisa eo Motho a ka e Etsang Bophelong
Batjha, le Batla ho Finyella Eng Tshebeletsong ya Modimo?
5 Lebaka le ka sehloohong la hore re ikemisetse ho sebeletsa Jehova, ke hobane re a mo rata ebile re ananela dintho tseo a re etseditseng tsona. Ke ka hoo mongodi e mong wa Pesaleme a ileng a re: “Ke ntho e ntle ho leboha Jehova . . . Etswe o nthabisitse, Jehova, ka lebaka la mosebetsi wa hao; ke hweletsa ka thabo ka lebaka la mesebetsi ya matsoho a hao.” (Pes. 92:1, 4) Wena motjha, ako nahane ka sohle seo Jehova a o etseditseng sona. Ka mohlala, o o file bophelo le Lentswe la hae, e leng Bibele. O boetse o o tlisitse ka phuthehong ya hae, a o thusa hore o be le tumelo, a ba a o fa le tshepo ya ho phela ka ho sa feleng lefatsheng le letjha. Ha re etsa hore ho sebeletsa Jehova ho tle pele bophelong, re tla be re bontsha hore re ananela seo a re etsetsang sona le hore re a mo rata.
Ke Mang ya Susumetsang Tsela eo o Nahanang ka Yona?
8 Jwalo ka motswadi ya molemo, Jehova le yena o batla hore bana ba hae ba kgotsofalle bophelo. (Esa. 48:17, 18) Ka lebaka leo, o re file melaomotheo ya ka moo re lokelang ho itshwara le ho tshwara ba bang ka teng. Ka hoo, sena se re thusa hore re shebe dintho ka tsela eo a di shebang ka yona mme re be le mekgwa e metle eo a e batlang. Empa sena ha se bolele hore Jehova o re thibela ho thabela bophelo. Ho e na le hoo, o re thusa hore re be le matla a ho nahana mme re a sebedise e le hore re etse dintho hantle. (Pes. 92:5; Liprov. 2:1-5; Esa. 55:9) Ho ekelletsa moo, ho nahana jwalo ka Jehova ho tla re thusa hore re etse diqeto tse hantle mme re thabe. (Pes. 1:2, 3) Ruri tsela eo Jehova a nahanang ka yona e molemo.
Jehova o o Nka o le Motho wa Bohlokwa
18 Le ha re ntse re tsofala, re ka kgodiseha hore ho ntse ho ena le mosebetsi oo Jehova a ka re fang wona. (Pes. 92:12-15) Jesu o ile a re le hoja re ka bona eka dintho tseo re di etsang ha se tsa bohlokwa, empa Jehova o nka ntho e nngwe le e nngwe eo re mo etsetsang yona e le ya bohlokwa. (Luka 21:2-4) Ka hoo, ameha ka dintho tseo o kgonang ho di etsa. Ka mohlala, o kgona ho bua ka Jehova, ho rapella Bakrestemmoho le ho kgothatsa batho ba bang e le hore ba dule ba tshepahala. Jehova o o nka o le mosebetsimmoho, e seng hobane o ena le bokgoni empa hobane o ikemiseditse ho mo mamela.—1 Bakor. 3:5-9.
Matlotlo a Patilweng
cl 176 ¶18
‘O! Botebo ba Bohlale ba Modimo!’
18 Hlokomela tsela eo ka yona moapostola Pauluse a ileng a hlalosa ka moo bohlale ba Jehova bo ikgethang ka teng: “O! botebo ba maruo le bohlale le tsebo ya Modimo! Dikahlolo tsa hae ke tse ke keng tsa batlisiswa hakaakang mme ditsela tsa hae ke tse ke keng tsa fuputswa hakaakang!” (Baroma 11:33) Ka ho qala temana ena ka lekgotsa “O!,” Pauluse o ne a bontsha maikutlo a tebileng—e leng tshabo e nang le tlhompho e tebileng ntlheng ena. Lentswe la Segerike leo a ileng a le kgetha bakeng sa “botebo” le amana haufi le lentswe le sebediswang bakeng sa “mohohlo.” Ka hoo, mantswe a hae a fana ka setshwantsho se hlakileng kelellong. Ha re nahanisisa ka bohlale ba Jehova, ho tshwana le ha re nyarela ka mohohlong o molelele, o se nang moo o fellang teng, o tebileng hoo le ka mohla re ke keng ra utlwisisa boholo ba wona, re se re sa re letho ka ho o hlalosa ka ho qaqileng. (Pesaleme ya 92:5) Na eo ha se kgopolo e kokobetsang?
LA 14-20 OCTOBER
MATLOTLO A TSWANG BIBELENG PESALEME YA 96-99
“Le Bolele Ditaba Tse Monate”
w11 3/1 6 ¶1-2
Ditaba Tse Molemo ke Eng?
BAKRESTE ba lokela ho bolella ba bang “ditaba tse molemo tsa mmuso,” ba ba hlalosetse hore Mmuso oo ke puso e tla ba teng lefatsheng nakong e tlang, e tla busa lefatshe ka toka. Empa polelwana “ditaba tse molemo” e boetse e sebediswa ka ditsela tse ding ka Bibeleng. Ka mohlala, ho na le moo ho buuwang ka “ditaba tse molemo tsa poloko” (Pesaleme ya 96:2); “ditaba tse molemo tsa Modimo” (Baroma 15:16); le “ditaba tse molemo mabapi le Jesu Kreste.”—Mareka 1:1.
Ka mantswe a bonolo feela, ditaba tse molemo di akarelletsa nnete yohle eo Jesu a ileng a bua ka yona le eo barutuwa ba hae ba ileng ba ngola ka yona. Pele Jesu a nyolohela lehodimong, o ile a bolella balatedi ba hae: “Ka hona eyang mme le etse batho ba ditjhaba tsohle barutuwa, le ba kolobetse ka lebitso la Ntate le la Mora le la moya o halalelang, le ba rute ho boloka dintho tsohle tseo ke le laetseng tsona.” (Matheu 28:19, 20) Ka hona, mosebetsi wa Bakreste ba nnete hase feela ho bolella ba bang ka Mmuso; ba boetse ba lokela ho leka ho etsa barutuwa.
w12 9/1 16 ¶1
Ho Tla Etsahalang Letsatsing la Kahlolo?
Jwalo ka ha ho bontshitswe setshwantshong sena se ka ho le letona, batho ba bangata ba nahana hore ka Letsatsi la Kahlolo batho ba dibilione ba tla tliswa ka pela terone ya Modimo e le hore ba tlo ahlolwa ho ya ka diketso tsa bona tsa pele—ba bang ba putswe ka bophelo lehodimong ha ba bang ba hlokofatswa diheleng. Le ha ho le jwalo, Bibele e bontsha hore morero wa Letsatsi la Kahlolo ke ho fedisa ho hloka toka. (Pesaleme ya 96:13) Modimo o kgethile Jesu hore e be Moahlodi ya tla tlisetsa batho toka.—Bala Esaia 11:1-5; Diketso 17:31.
w12 9/15 12 ¶18-19
Ho Tla ba le Kgotso Nakong ya Dilemo Tse Sekete—Le ka Mora Tsona!
18 Satane o ile a senya kgotso eo ha a ne a susumetsa batho hore ba fetohele bobusi ba Jehova. Le ha ho le jwalo, ho tloha ka 1914, Mmuso wa Mesia o nnile wa nka bohato ba ho etsa hore ho boele ho be le kgotso hape. (Baef. 1:9, 10) Nakong ya Puso ya Dilemo Tse Sekete, dintho tse hlollang tseo hona jwale di sa “bonweng” di tla phethahala. Jwale ho tla latela “bofelo,” e leng qetello ya Puso ya Kreste ya Dilemo Tse Sekete. Ka mora moo ho tla etsahalang? Le hoja Jesu a filwe “matla ohle lehodimong le lefatsheng,” ha a rate maemo. Ha a ikemisetsa ho ikgapela boemo ba Jehova. Ka boikokobetso o “nehelana ka mmuso ho Modimo le Ntatae.” O tla sebedisa boemo ba hae bo ikgethang “thorisong ya Modimo.”—Mat. 28:18; Bafil. 2:9-11.
19 Ka nako eo, bafo ba Mmuso wa Modimo ba lefatsheng ba tla be ba se ba phethahetse. Ba tla latela mohlala wa Jesu mme ka ha ba ikokobeditse, ba tla amohela bobusi ba Jehova ba sa qobellwe. Ba tla ba le monyetla wa ho bontsha hore ba batla ho etsa seo ka hore ba atlehe ho feta tekong ya ho qetela. (Tshen. 20:7-10) Ka mora moo, marabele ohle—a batho le a dibopuwa tsa moya—a tla timelletswa ruri. Ka sebele eo e tla ba nako ya thabo le nyakallo e kgolo! Lelapa lohle la bokahohleng le tla rorisa Jehova ka thabo, mme Jehova e tla ba “dintho tsohle ho e mong le e mong.”—Bala Pesaleme ya 99:1-3.
Matlotlo a Patilweng
it-2-E 994
Pina
Mantswe ana “pina e ntjha” ha a hlahe feela ho Pesaleme empa a boetse a hlaha mangolong a Esaia le moapostola Johanne. (Ps 33:3; 40:3; 96:1; 98:1; 144:9; 149:1; Esa 42:10; Tshe 5:9; 14:3) Ho hlokomelehile hore boholo ba nako ha ho buuwa ka “pina e ntjha” ke hobane ho ena le phetoho tseleng eo Jehova a etsang dintho ka yona bobusing ba hae. Ke ka hoo Pesaleme ya 96:10 e reng: “Jehova ke Morena.” Pina ena e ntjha e bua ka diphetoho tse etsahetseng mmusong wa Modimo le dintho tseo e di bolelang lehodimong le lefatsheng.—Ps 96:11-13; 98:9; Esa 42:10, 13.
LA 21-27 OCTOBER
MATLOTLO A TSWANG BIBELENG PESALEME YA 100-102
Bontsha Hore o Ananela Lerato la Jehova
O ka Etsang e le Hore o Itokisetse ho Kolobetswa?
18 Ho rata Jehova ke ntho e ntle ka ho fetisisa. (Bala Diproverbia 3:3-6.) Ha o rata Modimo haholo, o ke ke wa kgaotsa ho mo sebeletsa ha o kopana le mathata. Hangata Bibele e bua ka lerato leo a ratang bahlanka ba hae ka lona. Ka lebaka la lerato lena leo Jehova a nang le lona, le ka mohla a ke ke a lahla bahlanka ba hae ebile a ke ke a kgaotsa ho ba rata. (Pes. 100:5) Modimo o re bopile re tshwana le yena. (Gen. 1:26) O ka bontsha lerato le tshwanang le la Modimo jwang?
19 O ka qala ka ho ananela dintho tseo Jehova a o etseditseng tsona. (1 Bathes. 5:18) Letsatsi le leng le le leng ipotse, “Jehova o bontshitse jwang hore o a nthata?” Etsa bonnete ba hore o leboha Jehova ha o mo rapela, ka ho kgetheha o lebohe dintho tseo a o etseditseng tsona. Jwalo ka moapostola Pauluse, elellwa hore Jehova o o etsetsa dintho tse molemo hobane a o rata. (Bala Bagalata 2:20.) Ipotse, ‘Na le nna ke batla ho mo bontsha hore ke a mo rata?’ Ho rata Jehova ho tla o thusa ho tswela pele o hlola diteko le ho mamella mathata. Lerato leo le tla o susumeletsa hore o sebeletse Jehova ka mehla le hore o bontshe hore o a mo rata letsatsi le leng le le leng.
“Ebang Bohlale Mme le Fadimehe”
10 Tse ding tsa dintho tse kotsi tseo re lokelang ho di qoba di akarelletsa ho bapala ka maikutlo a motho wa bong bo fapaneng ka ho etsa dintho tse ka etsang hore a nahane hore re a mo rata, ho nwa haholo, ho ja ho tlola, ho bua dintho tse utlwisang batho ba bang bohloko, ho shebella dintho tse nang le ntwa, pornography le dintho tse ding tse kang tseo. (Pes. 101:3) Sera sa rona Diabolose se dula se batla menyetla ya ho senya setswalle sa rona le Jehova. (1 Pet. 5:8) Haeba re se hlokolosi, Satane a ka re susumetsa hore re be le mekgwa e mebe e kang mohono, ho se tshepahale, meharo, lehloyo, boikakaso le bohale. (Bagal. 5:19-21) Qalong re ka nna ra nahana hore dintho tsena ha di kotsi hakaalo. Empa haeba re sa potlakele ho tlohela mekgwa ena, e ka hola kapele jwalo ka lehola yaba e re bakela mathata.—Jak. 1:14, 15.
w11 7/15 16 ¶7-8
Na o Tla Mamela Ditemoso Tse Hlakileng Tsa Jehova?
7 Ke dintho dife tse bontshang hore re qoba mesuwe ya bohata? Ha re e amohele matlung a rona ebile ha re e dumedise. Hape, ha re bale dingolwa tsa yona, ha re e shebelle thelevisheneng, ha re bale dintho tseo e di ngotseng Inthaneteng ebile ha re arabisane le yona Inthaneteng. Ke hobaneng ha re ema re tiile jwalo? Re ema re tiile ka lebaka la lerato. Re rata “Modimo wa nnete,” ka hoo ha re thahaselle dithuto tse sothilweng tse hanyetsang Lentswe la hae la nnete. (Pes. 31:5; Joh. 17:17) Re boetse re rata mokgatlo wa Jehova o re rutileng dinnete tse hlollang—tse akarelletsang lebitso la Jehova le seo le se bolelang, morero wa Modimo ka lefatshe, boemo boo bafu ba leng ho bona le tshepo ya tsoho. Na o a hopola hore na o ile wa ikutlwa jwang ha o qala ho ithuta dinnete tsee esita le dinnete tse ding tsa bohlokwa? Ka hoo, o se ke wa dumela hore mesuwe ya bohata e o furallise mokgatlo o o rutileng dinnete tsena.—Joh. 6:66-69.
8 Ho sa tsotellehe hore na mesuwe ya bohata e reng, re ke ke ra e latela! Ha re na lebaka la ho mamela batho ba tshwanang le didiba tse psheleng hobane ho etsa jwalo ho ka fella ka hore re qhekellwe re be re swetsehe. Ho ena le hoo, a re ikemisetseng ho dula re tshepahala ho Jehova ha mmoho le mokgatlo oo e leng kgale o tima lenyora la rona ka metsi a hlwekileng le a nyorollang a nnete, a tswang Lentsweng le buduletsweng la Modimo.—Esa. 55:1-3; Mat. 24:45-47.
Matlotlo a Patilweng
it-2-E 596
Nonyana e Bitswang Pelican
Ha nonyana ena e qeta ho ja, e a fofa e ya moo e ilo dula teng e lenngwe. E dula moo e hlorile e suntse hlooho pakeng tsa mapheo ebile e sa sisinyehe. Ha o e sheba o le holenyana o tla bona eka ke lejwe le lesweu. Nonyana ena e dula e hlorile tjena ka dihora tse ngata. Ke ka hoo mopesaleme a ileng a bapisa ho hlonama ha hae le nonyana ena ha a ne a ngola a re: “Ke mong jwalo ka letata la naheng.” (Ps 102:6) Mona ha hothwe “naheng” ha ho buuwe ka lehwatata empa ho buuwa ka sebaka se hole le moo batho ba dulang teng, seo ho sona ho dulang ho ena le metsi. Ka dinako tse itseng selemong, dinonyana tsena di fumaneha ka leboya Kgohlong ya Jordane matamong a diretse. Mefuta e meraro ya dinonyana tsena e fumaneha Iseraele. Nonyana e tsebahalang haholo ke e tshweu ya botjhabela (Pelecanus onocrotalus), athe e tshweu e nang le matheba a matsho (Pelecanus crispus) le e nang le bopinki (Pelecanus rufescens) tsona di fumaneha ka sewelo.
Dinonyana tsena di rata ho ya dibakeng tse se nang baahi, tse tloheletsweng feela, moo di ka dulang ho se na motho ya di kgathatsang. Ha nonyana ena e fihla sebakeng se jwalo, e iketsetsa sehlaha, moo e tla qhotsetsa mahe a yona teng le moo e tla phomola teng ha e tswa tshwasa ditlhapi. Bibele e sebedisa nonyana ena ho tshwantshetsa sebaka se tlo fediswa hobane nonyana ena e rata dibaka tseo ho tsona ho se nang baahi. Ha Esaia a tshwantshetsa ho timetswa ha Edomo o ile a bolela esale pele hore dinonyana tsena di ne di tla dula naheng eo. (Esa 34:11) Sofonia o ile a profeta hore dinonyana tsena di ne di tla dula dipilareng tsa Ninive e leng ntho e neng e bontsha hore motse oo o ne o tlo fediswa ka ho feletseng, o sale o se na baahi.—Sof 2:13, 14.
LA 28 OCTOBER–LA 3 NOVEMBER
MATLOTLO A TSWANG BIBELENG PESALEME YA 103-104
“O a Hopola Hore re Lerole”
Etsisa Jehova ka Hore o Fetohe le Maemo
5 Jehova o fetoha le maemo hobane a ikokobeditse ebile a le mohau. Ka mohlala, o ile a bontsha hore o ikokobeditse ha a ne a tlo fedisa batho ba kgopo ba Sodoma. Jehova o ile a roma mangeloi hore a yo bolella monna ya lokileng Lota hore a balehele dithabeng. Lota o ne a tshaba ho ya moo. Ka hoo, o ile a kopa Jehova hore a dumelle yena le lelapa la hae hore ba balehele Zoware e leng motse o monyenyane o neng o lokela ho timetswa. Jehova a ka be a ile a phehella Lota hore a latele ditaelo tsa hae feela jwalo ka ha a mo file tsona. Ho ena le hoo, o ile a mamela kopo eo ya Lota le hoja e ne e bolela hore ha a sa tla fedisa Zoware. (Gen. 19:18-22) Dilemo tse ngata ha morao, Jehova o ile a bontsha baahi ba Ninive mohau. O ile a romela moprofeta Jonase hore a yo bolella batho ba kgopo ba Ninive hore ba tlo fediswa ha mmoho le motse wa bona. Empa ha batho ba Ninive ba tlohela diketso tsa bona tse kgopo, Jehova o ile a ba utlwela bohloko yaba ha a fedise motse.—Jon. 3:1, 10; 4:10, 11.
Tshepa Jehova Jwalo ka Samsone
16 Le hoja Samsone a ile a fumana ditholwana tse bosula ka lebaka la phoso ya hae, ha a ka a kgaotsa ho leka ho etsa thato ya Jehova. Le haeba re ka etsa phoso yaba re a kgalemelwa kapa re lahlehelwa ke mosebetsi o itseng ka mokgatlong wa Jehova, ha re a lokela ho tela. Re lokela ho hopola hore Jehova o dula a ikemiseditse ho re tshwarela. (Pes. 103:8-10) Le ha re entse diphoso, Jehova a ka tswela pele a re sebedisa feela jwalo ka ha a ile a sebedisa Samsone.
17 Nahana ka mohlala wa morabo rona e motjha ya bitswang Michael. O ne a phathahane ka ho sebeletsa Jehova, e le mohlanka ya sebeletsang ebile e le pulamadiboho ya ka mehla. Ka maswabi o ile a etsa phoso e ileng ya etsa hore a qetelle a amohuwe mesebetsi yohle eo a neng a e etsa ka phuthehong. O re: “Pele ho moo, ke ne ke phathahane haholo ka ho sebeletsa Jehova. Yaba ka ho panya ha leihlo, ke se ke utlwa eka ha ho sa na letho leo nka hlolang ke mo etsetsa lona. Ha ho mohla nkileng ka nahana hore Jehova a ka ntahla empa ke ne ke ipotsa hore na ebe setswalle sa ka le yena se tla ke se tshwane le pele. Hape ke ne ke ipotsa hore na ho na le mohla ke tla mo sebeletsa ka botlalo ka phuthehong jwalo ka ha ke ne ke ile ka etsa.”
18 Ditaba tse monate ke hore Morabo rona Michael ha a ka a tela. O re: “Ke ile ka sebetsa ka thata ho lokisa kamano ya ka le Jehova ka hore ka mehla ke mo rapele ho tswa pelong, ke ithute ke be ke nahanisise.” Ka mora nako Michael o ile a boela a tshwaneleha hore a ka sebediswa hape ka phuthehong. Hona jwale ke moholo ebile ke pulamadiboho ya ka mehla. O re: “Bana beso ka phuthehong, haholoholo baholo, ba ile ba ntshehetsa le ho nkgothatsa mme ntho eo e ile ya etsa hore ke bone hore Jehova o ntse a nthata. Hona jwale ke kgona ho sebeletsa hape ka phuthehong ka letswalo le kgutsitseng. Dintho tsena tse nketsahaletseng di nthutile hore Jehova o tla tshwarela mang kapa mang ya bakang e le ka nnete.” Re ka kgodiseha hore Jehova o tla re sebedisa a be a re hlohonolofatse le haeba re entse diphoso, ha feela re etsa sohle hore re di tlohele re bile re tswela pele ho mo tshepa.—Pes. 86:5; Diprov. 28:13.
O ka Kgona ho Finyella Dintho Tseo o Rerileng ho di Etsetsa Jehova
2 Haeba o batla ho etsa ntho e itseng empa o eso ka o e finyella, o se ke wa nyahama. Re ntse re lokela ho sebetsa ka thata le ha re etsa dintho tse nyenyane tseo re batlang ho di finyella. Taba ya hore o batla ho finyella seo o se rerileng e a bontsha hore Jehova ke motswalle wa hao wa bohlokwa mme o batla ho mo fa se molemo. Jehova o ananela seo o mo etsetsang sona. Ha a lebella hore o etse dintho tseo o ke keng wa kgona ho di etsa. (Pes. 103:14; Mik. 6:8) Ka hoo, ha o batla ho etsa ntho e itseng, etsa bonnete ba hore o tla kgona ho e finyella. Ka mora ho tseba hore na o batla ho etsang, o ka etsang e le hore o finyelle ntho eo? A re ke re bueng ka dintho tse tla re thusa.
Matlotlo a Patilweng
cl 55 ¶18
Matla a ho Bopa—“Moetsi wa Lehodimo le Lefatshe”
18 Re ithuta eng tshebedisong ya Jehova ya matla a hae a ho bopa? Re hlollwa ke mefuta e sa tshwaneng ya popo. Mopesaleme e mong o ile a howa: “Jehova, mesebetsi ya hao e mengata hakaakang! . . . Lefatshe le tletse dihlahiswa tsa hao.” (Pesaleme ya 104:24) Seo ke nnete hakaakang! Ditsebi tsa baeloji di fumane mefuta e fetang milione ya dintho tse phelang lefatsheng; le ha ho le jwalo, maikutlo a tsona a fapana tabeng ya hore na ebe mohlomong ho ka ba le e meng e dimilione tse 10, e dimilione tse 30, kapa ho feta. Motho ya etsang ditshwantsho a ka nna a iphumana ka nako e nngwe a feletswe ke dikgopolo tsa ho qapa. Ho fapana le hoo, dikgopolo tsa Jehova tsa ho qapa—matla a hae a ho qapa le ho bopa dintho tse ntjha tse fapafapaneng—ka ho hlakileng ke tse ke keng tsa fela.