BATJHA BA A BOTSA
Nka Sebetsana le Bohloko ba ho Hlokahallwa Jwang?
Na o hlokahalletswe ke wa lelapa kapa motswalle haufinyane? Haeba ho jwalo, sehlooho sena se ka o thusa hore o sebetsane le bohloko boo o bo utlwang.
Sehloohong sena
Na ke utlwile bohloko ho feta tekano?
Batho ba bangata ba utlwa bohloko haholo ka nako e telele.
Olivia ya dilemo di 15 o re: “Ha hona letsatsi le fetang ke sa nahane ka ntatemoholo wa ka. Le hoja ho se ho fetile dilemo tse pedi a se a hlokahetse, ho thata hore ke bue ka yena ke sa lle.”
Alison ya dilemo di 22 o re: “Nkgono wa ka o ne a dula a ntshehetsa haeba ho ne ho ena le dintho tseo ke batlang ho di finyella empa ha a bona ha ke di finyella. Ka mehla ha ke atleha ke utlwa bohloko hobane ha a sa phela.”
Bohloko ba ho hlokahallwa ke motho eo o mo ratang bo etsa hore o be le maikutlo a mangata. Ka mohlala:
Nadine ya dilemo di 24 o re: “Ha malome wa ka a ne a hlokahala ke ne ke sa kgolwe mme ke ile ka dula ke ntse ke sa kgolwe ka nako e telele. Leo e ne e le lekgetlo la pele motho eo ke mo tlwaetseng haholo a hlokahala. Dintho di ile tsa etsahala ka ho panya ha leihlo mme di ile tsa nkama ha bohloko.”
Carlos ya dilemo di 21 o re: “Ke ile ka halefela ntatemoholo wa ka haholo ha a ne a hlokahala hobane o ne a sa itlhokomele le hoja re mo kopile hore a itlhokomele.”
Adriana ya dilemo di 21 o re: “Nna le ausi wa ka re ne re le siyo ha ntatemoholo wa rona a hlokahala. Ntho ena e ile ya etsa hore ke ikutlwe ke le molato.”
Jared ya dilemo di 17 o re: “Banyalani bao e neng e le metswalle ya lelapa leso ba ile ba hlokahalla kotsing ya koloi. Nako le nako ha emong wa lelapa a ne a tsamaya, ke ne ke tshoha ke nahana hore le yena a ka hlokahala.”
Julianna ya dilemo di 19 o re: “Ha nkgono wa ka a ne a hlokahala dilemong tse tharo tse fetileng, ke ile ka ikwahlaela hore e be ha ke a ba le nako e ngata ke ena le yena ha a ntse a phela.”
Ho kwata, ho se kgolwe, ho ikutlwa o le molato, ho tshoha le ho ikwahlaya ke maikutlo a tlwaelehileng ao motho ya utlwileng bohloko a ka bang le ona. Haeba o ena le maikutlo a tshwanang le ao, kgodiseha hore ha nako e ntse e ya o tla ba hantle. Empa hona jwale keng e ka o thusang hore o sebetsane le bohloko ba ho hlokahallwa?
O ka sebetsana le bohloko ba ho hlokahallwa jwang?
Bua le motswalle. Bibele e re motswalle wa nnete ke “ngwaneno eo o ka mo tshepang dinakong tsa mahlomola.” (Diproverbia 17:17) Ho bolella motho e mong hore na o ikutlwa jwang ho ka o thusa hore o fumane thuso eo o e hlokang.
Yvette ya dilemo di 21 o re: “Ho utlwa bohloko ha se mohlolo. Ka dinako tse ding o ka tshaba ho bontsha batho hore o utlwile bohloko empa sena se ka etsa hore o tetebele le ho feta. Ke ka hoo ho leng bohlokwa ho bua le motho e mong.”
Hopola moratuwa wa hao ya hlokahetseng. Bibele e re “motho ya lokileng o bua dintho tse ntle hobane ho tletse tsona ka letlotlong la pelo ya hae.” (Luka 6:45) O ka ngola dintho tse ntle tseo o di hopolang ka yena kapa wa etsa albamo.
Jeffrey ya dilemo di 24 o re: “Ka mora hore motswalle wa ka a hlokahale, ke ile ka ngola dintho tsohle tseo a ileng a nthuta tsona. Ho etsa jwalo ho ile ha nthusa hore ke ithute mohlaleng wa hae le ho sebetsana le bohloko boo ke neng ke bo utlwile.”
Itlhokomele. Bibele e re ho ikwetlisa ho na le molemo. (1 Timothea 4:8) Etsa bonnete ba hore o ja hantle, o a ikwetlisa le hore o robala dihora tse lekaneng.
Maria ya dilemo di 27 o re: “Ha o utlwile bohloko ha o nahane hantle, jwale ke ha bohlokwa hore o dule o phetse hantle mmeleng. Etsa bonnete ba hore o robala dihora tse lekaneng ebile o ja hantle.”
Thusa batho ba bang. Bibele e re: “Ho fana ho thabisa haholo ho feta ho fuwa.”—Diketso 20:35.
Carlos o re: “Leka ho thusa batho ba bang haholoholo batho ba hlokahalletsweng ke batho bao ba ba ratang. Ho etsa jwalo ho tla o thusa ho hopola hore ho na le batho ba bang ba ntseng ba utlwa bohloko jwalo ka wena.”
Bolella Jehova hore na o ikutlwa jwang. Bibele e re Jehova o ‘utlwa thapelo.’ (Pesaleme ya 65:2) Hape e re Jehova “o fodisa bao dipelo tsa bona di utlwileng bohloko. O tlamisa maqeba a bona.”—Pesaleme ya 147:3.
Jeanette ya dilemo di 22 o re: “Kopa Jehova hore a o tshehetse a be a o kgothatse. Matsatsi a mang a thata ho feta a mang empa Jehova o dula a ena le rona.”
O se ke wa lebella mohlolo. Hopola hore re utlwa bohloko ka ditsela tse fapaneng. Bibele e re Jakobo “o ile a hana ho tshediseha” ha a ne a nahana hore mora wa hae o hlokahetse. (Genese 37:35) O se ke wa makala ha o bona o nka nako e telele ho fola.
Taylor ya dilemo di 23 o re: “Le hoja ho se ho fetile dilemo tse 15 nkgono wa ka a se a hlokahetse, ho na le dintho tse ngata tse nkgopotsang yena.”
Nahana o se o robehile lesapo. Ho bohloko ebile ho ka nka nako hore o fole. Ngaka e tlo o jwetsa fela dintho tseo o lokelang ho di etsa ho fihlela o fola.
Ho a tshwana le haeba o utlwile bohloko ka lebaka la ho hlokahallwa ke motho eo o mo ratang. Ho nka nako hore bohloko boo bo fole. Ka hoo, o be le mamello. Sheba dikeletso tse hlahang sehloohong sena mme o shebe hore na ke dife tse tla o thusa.