Re Metsoalle e ke Keng ea Aroloa

TRACY ke ntja ea ka e ntataisang, e lilemo li leshome, e tšoana, mofuta oa Labrador retriever. Ka thuso ea eona ke khona ho finyella libakeng tsohle ka katleho. E boetse e mpha botsoalle le khatholoho. Kahoo hase ho makatsang hore ebe ke e rata hakana le hore ebe re metsoalle e ke keng ea aroloa.

Ka linako tse ling, e se ka boikemisetso, batho ba hlōleha ka tsela eo Tracy le ka mohla e ke keng ea hlōleha ka eona. Ka mohlala, ka letsatsi le leng, ke ile ka siea Tracy lapeng ’me ka tsamaea le motsoalle. Re ne re bua re thabile ha ka tšohanyetso ke oela fatše. Motsoalle oa ka o ne a lebetse hore ke sefofu, ’me ha aa ka a ntemosa hore ho na le sekhetše. Sena se ka be se sa etsahala haeba Tracy e ne e le lehlakoreng la ka.

Ka le leng, Tracy e ile ea hla ea pholosa bophelo ba ka. Ke ne ke tsamaea ke theosa ka seterata ha ka tšohanyetso teraka e qala ho tsoa taolong ebile e lebile ho ’na. Ke ne ke khona ho utloa molumo oa enjine ea eona empa ke sa bone moo e lebileng teng. Tracy e ile ea bona le ho hlokomela kotsi eo ’me ea nkhulela moo ho sireletsehileng.

Ke Sefofu, Empa Kea Bona

Ke hlahetse ka boroa ho Sweden ka 1944, ’me ke bile sefofu ho tloha ha ke tsoaloa. Ke ile ka romeloa sekolong seo bana ba lifofu ba lulang ho sona, moo ke ileng ka ithuta ho bala le ho ngola Braille. ’Mino e ile ea e-ba karolo ea bohlokoa bophelong ba ka, haholo-holo ho bapala piano. Ka mor’a ho qeta sekolong se phahameng, ke ile ka tsoela pele ho ithuta lipuo le ’mino Univesithing ea Göteborg.

Leha ho le joalo, bophelo ba ka bo ile ba fetohela ruri ha Lipaki tsa Jehova tse peli li ne li nketela mohahong oa univesithi. Ka mor’a nakoana ke ile ka qala ho kopanela libokeng tsa Lipaki ’me ka ba ka qala ho abelana le ba bang seo ke ithutang sona. Ka 1977, ke ile ka tšoantšetsa boinehelo ba ka ho Jehova Molimo ka kolobetso ea metsing. Le hoja ke le sefofu, ka ho ithuta Lentsoe la Molimo, ke ile ka fumana ntho e ’ngoe ea bohlokoa ka ho fetisisa—pono ea moea.

Kajeno ke inka ke le molemo haholo ho feta ba khonang ho bona ka mahlo a nama empa e le lifofu moeeng. (Bapisa le Johanne 9:39-41.) Ke motlotlo ka ho ba le pono e hlakileng ea kelello ka lefatše le lecha la Molimo leo ho lona, ho ea ka tšepiso ea hae, mahlo a lifofu a tlang ho bona—e, leo ho lona maloetse ’ohle a ’mele a tlang ho phekoloa le leo ho lona esita le bafu ba tlang ho tsosoa!—Pesaleme ea 146:8; Esaia 35:5, 6; Liketso 24:15.

Le hoja ke sa nyaloa ’me ke foufetse, ke itsoella pele hantle haholo ka tšehetso e tšepahalang ea Tracy. Ha nke ke hlalose kamoo e nthusang kateng ho phetha mosebetsi oa ka oa boipheliso le ho etsa tšebeletso ea ka ke le e mong oa Lipaki tsa Jehova. (Matheu 24:14; Liketso 20:20; Baheberu 10:25) Empa pele, e-re ke otle mabalankoe ka Tracy.

E Ile ea Khethoa Bakeng sa Koetliso e Khethehileng

Ha Tracy e le likhoeli li robeli, e ile ea hlahlobeloa ho bona hore na e ka tšoanelehela ho ba ntja e tataisang. E ile ea ipaka e khutsitse, e ruteha habonolo, ’me e sa tšosoe habonolo ke lerata la tšohanyetso. Ka hona, e ile ea isoa lelapeng le leng ka nakoana e le hore e ithute bophelo bo tloaelehileng ba lelapa. Hamoraonyana, ha e se e hōlile ka ho lekaneng, e ile ea romeloa sekolong sa koetliso ea lintja tse tataisang.

Sekolong sena Tracy e ile ea ithuta ho etsa se hlokoang ho ntja e tataisang, e leng ho thusa mong’a eona oa ka moso ho fumana menyako, methati ea ho nyoloha, likeiti le litselana tsa maoto. E ile ea boela ea ithuta ho tsamaea litseleng tse phetheselang le ho tšela literata. Hape e ile ea rutoa ho ema moo ho khetšemelang, ho hlompha matšoao a sephethephethe le ho qoba litšitiso tse kotsi. Ka mor’a likhoeli tse ka bang hlano tsa koetliso, e ne e se e loketse mosebetsi. Ke nakong eo ke ileng ka tseba Tracy.

Seo Tracy e Nketsetsang Sona

Hoseng ho hong le ho hong Tracy ea ntsosa e le hore ke e fepe. Joale re itokisetse ho ea mosebetsing. Moo ke sebetsang teng e ka ba sebaka sa ho tsamaea metsotso e 20 ho tloha foleteng ea ka. Ke ’nete hore ke tseba tsela empa mosebetsi oa Tracy ke ho nthusa hore ke fihle teng ke sa thula likoloi, batho, lipalo tsa mabone kapa ntho leha e le efe e ’ngoe. Ha re fihla, e botha tlas’a deske ea ka. Joale, nakong ea lijo tsa motšehare, re atisa ho otlolla maoto.

Mantsiboea, ha re se re khutlile mosebetsing, ho qaleha karolo ea rōna ea bohlokoa ka ho fetisisa ea letsatsi. Ke nakong eo Tracy e ntataisang mosebetsing oa boboleli ba ntlo le ntlo le ho nkisa malapeng ao ke khannang lithuto tsa Bibele ho ’ona. Batho ba bangata ba na le botsoalle ho eona, baa e phaphatha le ho e haka ’me ka linako tse ling ba mpha lijo tse monate bakeng sa eona. Re boetse re ba teng libokeng tsa Bokreste beke e ’ngoe le e ’ngoe. Ha li e-tsoa bana ba rata ho lumelisa Tracy le ho e haka e leng ntho eo e e thabelang haholo.

Kea hlokomela hore Tracy e mpa e le ntja feela le hore ka letsatsi le leng e tla shoa. Sena se bolela hore qetellong ke tla tlameha ho fumana ntja e ’ngoe e ntataisang. Empa, ha hajoale, re mathe le leleme ’me rea hlokana. Ha Tracy e le sieo pel’a ka, ha ke itšepe, ’me le eona ea ferekana le ho hloka botsitso ha e sitoa ho ntataisa.

Ho Hlokahala Kutloisiso

Ho makatsang ke hore ka linako tse ling batho ba leka ho re arohanya. Ba nka hore Tracy ke ntja feela e tloaelehileng kapa ntja e ruetsoeng monate ’me ha ba utloisise kamano ea rōna e tebileng. Batho bana ba lokela ho utloisisa hore ho ’na Tracy ke seo setulo sa likooa se leng sona ho motho ea holofetseng. Ho re arohanya ho tšoana le ho nkamoha mahlo.

Ha ba bang ba utloisisa kamano e teng pakeng tsa ka le Tracy, mathata a tla fokotseha. Ka mohlala, setulo sa likooa sea amoheleha empa, ka bomalimabe, hase kamehla ho leng joalo ka ntja e tataisang. Batho ba bang ba tšaba lintja kapa ba mpa ba sa li rate feela.

Se fumanoang bukaneng e buang ka lintja tse tataisang, e hatisitsoeng ke Swedish Association for the Visually Handicapped, se molemo haholo. E re: “Ntja e tataisang ke thuso ea ho tsamaea ho motho ea foufetseng. E, e feta moo. Ke thuso e phelang. . . . Ke motsoalle eo le ka mohla a ke keng a u soetsa.”

Ka sebele, Tracy e sebeletsa e le mahlo a ka lefifing, ’me e nthusa ho phela bophelo bo tloaelehileng kamoo ho ka khonehang kateng hona joale. Leha ho le joalo, ke kholisehile hore haufinyane, lefatšeng le lecha leo Molimo a le tšepisitseng, ke tla khona ho bona limakatso tsohle tsa pōpo tse hlollang. Kahoo, hona joale ke ikemiselitse ho boloka pono ea ka ea moea.

Joale, ke sikile Tracy, re se re loketse ho mamela k’hasete ea morao-rao ea tokollo ea makasine ea Molula-Qhooa (oa Senyesemane).—Joalokaha ho boletse Anne-Marie Evaldsson.