Gaguanúlú náa aguʼ, guʼni gaʼduunʼ rí mikrína

1, 2. a) Nguáná, náa mínaaʼ ga̱jma̱a̱ náá numuu niʼnirámáʼ Pablo carta rí ni̱jkha̱ inún bi̱ Efesios rá. b) Ndiéjunʼ graxe̱ guriʼña̱a̱ rá.

ÍNDO̱ apóstol Pablo nixtáa náa guʼwá ejua̱a̱nʼ dí nirígá náa Roma nindoo maxnún tsiaki̱i̱ a̱ngui̱i̱n. Mú, na̱nguá xóo maʼga̱ gáʼñúún, ikha jngóo niniraʼmáʼ mbaʼa cartas mu maxnún. Mbá dí ikhaa nindxu̱u̱ dí nixnún cristianos bi̱ nikúwá náa Éfeso nákha tsiguʼ 60 o 61 (Efes. 1:1; 4:1).

² Niʼni má guwáʼ tsiguʼ dí Pablo nixtáa rataráʼa náa Éfeso ga̱jma̱a̱ niʼsngáa ajngáa rí májánʼ (Hech. 19:​1, 8-10; 20:​20, 21). Ikhaa ra̱ʼkhá tháán nindoo kaʼñún a̱ngui̱i̱n ga̱jma̱a̱ nindoo mambáñún mu muguajún jmbu má xúʼko̱ náa Jeobá. Mú, náá numuu dí niʼnirámáʼ náa inún a̱ngiu̱lú bi̱ kaxtaʼwíin ga̱jma̱a̱ numuu aguʼ ma̱ngaa rí mikrína xá. Ndiéjunʼ gándoo gájmañulú xúgiáánʼ bi̱ nindxu̱lú cristianos ga̱jma̱a̱ numuu consejo rí nixnún xá. Náa artículo rígi̱ muriʼña̱a̱ a̱jma̱ graxe̱ rígi̱.

RÍ MIKRÍNA NANINDXU̱U̱ AGUʼ

3. Ndiéjunʼ xkri̱da nijmuu Pablo náa capítulo 5 ndrígóo Efesios rá.

³ Pablo niʼthúún cristianos bi̱ nikúwá náa Éfeso: “Nákha ginii nini̱ndxa̱la mikrína, mú rí xúgi̱ nindxa̱la aguʼ” (Efes. 5:8). Pablo nijmuu xóo xkri̱da ajngáa aguʼ ga̱jma̱a̱ mikrína mu maʼthúún a̱ngiu̱lú afesios dí ikhiin niʼngu̱u̱n niriʼkumijnáa. Ginii kayuuʼ, guʼyáá náá numuu niʼthúún “nákha ginii nini̱ndxa̱la mikrína”.

4. Ndíjkha niʼthí dí bi̱ efesios nikúwi̱i̱n náa religión dí minduwaʼ rá.

⁴ Nikúwá náa religión minduwaʼ. Nákha xóó tséjmañún dí gajkhun ga̱jma̱a̱ xóó tsénindxu̱ún cristianos, bi̱ efesios nunimbu̱ún náa religión dí minduwaʼ ga̱jma̱a̱ nagún náa xa̱bu̱ xawan. Náa Éfeso nirígá guʼwá náa nduyamajkuíí diosa Ártemis, ninindxu̱u̱ mbá dí maʼni juwan guʼwá dí xa̱bu̱ nduyáá dí ra̱ʼkhá tháán mitsaanʼ dí rígá náa xúgíʼ numbaaʼ. Xa̱bu̱ nagún ikhí mu mbuyamajkún mbaʼin xándú. Ra̱ʼkhá tháán mba̱a̱ mbújkha̱a̱ eda̱a̱ xa̱bu̱ bi̱ nugujua̱ xtiʼkhuu guʼwá náa nduyamajkuíí Ártemis (Hech. 19:​23-27). Ma̱ngaa, xa̱bu̱ bi̱ kúwá ikhí najmaʼnuuʼ numuu rí najmañún nuni̱ xawan (Hech. 19:19).

5. Ndíjkha niʼthí rí bi̱ efesios nini rí tséjmaa kayuuʼ rá.

⁵ Nikúwá runi̱ dí tséjmaa. Xa̱bu̱ bi̱ nikúwá náa Éfeso ninigu̱u̱nʼ muni̱ xúgíʼ rí tséjmaa, náa ndxa̱a̱ rí nuni̱ nanigu̱u̱nʼ muthi ga̱jma̱a̱ numuu rí nubúúnʼ xkawiʼ kayuuʼ xa̱bu̱ rí asndu tsétiñu̱u̱nʼ (Efes. 5:3). Xóo muʼthá, na̱nguá eʼni gawúúnʼ ga̱jma̱a̱ numuu rí nuni̱ (Efes. 4:​17-19). Tsixmiéjúún ga̱jma̱a̱ numuu xóo eku̱mu̱u̱ Jeobá, numuu rí na̱nguá eyááʼ dí nindxu̱u̱ májánʼ ga̱jma̱a̱ dí ra̱májánʼ. Ikhaa jngóo Pablo niʼthúún rí ku̱ma̱ ndrígu̱ún rígá náa “mikrína ga̱jma̱a̱ kúwá wájíʼ náa vida rí kaʼyoo Dios”.

6. Ndíjkha niʼthúún Pablo bi̱ efesios “rí xúgi̱ nindxa̱la aguʼ” rá.

⁶ Tikhuun xa̱bu̱ Éfeso nigájni̱i̱n náa religión rí minduwaʼ, ikha jngóo Pablo niʼthún: “Rí xúgi̱ nindxa̱la aguʼ numuu rí kuwáanʼ mbóó gajmiála Tátá” (Efes. 5:8). Nigíʼdi̱i̱ nikúwíin xó má naʼthí náa ajngá rawuunʼ Jeobá dí ninindxu̱u̱ xóo mbá aguʼ rí nixnún ikha (Sal. 119:105). Niniña̱a̱nʼ runi̱ xúgíʼ dí raʼkhí dí nuni̱ náa religión minduwaʼ ga̱jma̱a̱ xúgíʼ enii dí tséjmaa. Ndiyaridáá Dios ga̱jma̱a̱ nini̱ xó má eʼngo̱o̱ mu mbuyamajkuíí ga̱jma̱a̱ muni̱ rí ikhaa nanigu̱u̱ʼ (Efes. 5:1).

7. Xú kaʼnii eʼmbríguii xóo nikúwá cristianos bi̱ Éfeso ga̱jma̱a̱ xóo kuwáánlú ikháanʼ rá.

⁷ Xúʼko̱ má mangáánʼlú nákha xóó tséjmañulú dí gajkhun nikuwáanʼ náa religión rí nindxu̱u̱ minduwaʼ. Mbáa tikhuáánʼ nu̱ʼni̱ ndxa̱a̱ rí naʼni religión minduwaʼ o mbáa tikhuun ninigu̱u̱nʼ mubúúnʼ xkawiʼ kayuuʼ gajmiún eʼwíinʼ. Mú índo̱ nijmañulúʼ ga̱jma̱a̱ numuu Jeobá niriʼkui̱i̱ xóo kuwáánʼ ga̱jma̱a̱ nigíʼdi̱i̱ niʼnimbu̱lúʼ ikha ndrígóo dí naʼthí ga̱jma̱a̱ numuu rí nindxu̱u̱ májánʼ ga̱jma̱a̱ dí ra̱májánʼ. Rúʼko̱ nimbáyulúʼ mu makuwáánʼlú itháan májánʼ (Is. 48:17). Maski ajndu xúʼko̱, nguáná naʼniulú gakhi̱i̱ rí mu̱ʼni̱ tsíngumi̱jna̱ náa rí mikrína “ga̱jma̱a̱ rí majngruigulú xóo e̱ji̱i̱n aguʼ”. Guʼyáá rí ma̱ndoo mambáyulú.

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

XÁKUWÁANʼ NÁA MIKRÍNA

8. Xó má eʼthí Efesios 5:​3-5, ndiéjunʼ rí ndiyóoʼ munigaʼduunʼ bi̱ efesios rá.

⁸ (Atraxnuu Efesios 5:​3-5). Mu a̱ngiu̱lú Éfeso ni xákúwá náa rí mikrína ndiyóoʼ rí muni̱ gaʼduunʼ xúgíʼ rí tséjmaa rí Jeobá tsénigu̱u̱ʼ. Mú raʼkháa i̱ndó ndiyóoʼ muniña̱a̱nʼ rubúúnʼ xkawiʼ kayuuʼ gajmiún eʼwíinʼ, ma̱ngaa ndiyóoʼ muniña̱a̱nʼ ruthi ajngáa dí tsaga. Pablo niʼni marmáʼáan a̱jkiu̱ún dí ndayóoʼ muni̱ gaʼduunʼ xúgíʼ rígi̱ a mu nandún makuwá “náa maʼtáñajunʼ Cristo ga̱jma̱a̱ Dios”.

9. Ndíjkha rí ndayóoʼ muʼnigaduunʼ mbá xúgíʼ rí kanda̱wo̱o̱ʼ ga̱jma̱a̱ rí tsaga rá.

⁹ Ikháánʼlú mangáanʼ gíʼmaa mu̱ʼni̱ tsumáá mu xúʼni̱ “dí ragíʼdoo numuu dí rígá náa mikrína” (Efes. 5:11). Índo̱ mbáa xa̱bu̱ ndaʼyoo, naʼdxawuun ga̱jma̱a̱ naʼthí xúgíʼ enii rí mitsaga rúʼko̱ gáʼni dí maʼga̱nú makudaminaʼ aʼkhá mbiiʼ (Gén. 3:6; Sant. 1:​14, 15). Mbá xkri̱da, mbá guéjmi̱i̱n Testigos niri̱ya̱ʼ mbá grupo mu muxuʼmamijná mensaje. Nákha ndiʼkúú nigi̱ʼdi̱i̱ nutamijná ga̱jma̱a̱ numuu Dios, mú mañu mañuu nigi̱ʼdi̱i̱ nitamijná ga̱jma̱a̱ numuu rí nubúúnʼ xkawiʼ kayuuʼ xa̱bu̱. Nda̱wa̱á tikhuun nithi dí rúʼko̱ niʼni dí maʼga kagui̱i̱n muxuʼdamíjna̱ aʼkhá mbiiʼ.

10. Ndiéjunʼ endooʼ maʼni Gixa̱a̱ rá. (Efesios 5:6.)

¹⁰ Mbá tsáʼkhá rí najmuu Gixa̱a̱, naʼni dí xa̱bu̱ xúyáá ndiéjunʼ nindxu̱u̱ dí májánʼ ga̱jma̱a̱ dí ra̱májánʼ (Is. 5:20; 2 Cor. 4:4). Ikha jngóo tséʼniulú tsiánguá dí náa numbaaʼ rígi̱, nandún kuyáá dí ikháánʼ nduʼyáá dí nindxu̱u̱ ra̱májánʼ (2 Ped. 2:19). Náa xúgíʼ películas, programa dí nanújngoo náa tele ga̱jma̱a̱ dí rígá náa Internet ikhiin nanujgurámún rí naʼthí náa xtángoo ndrígóo Jeobá. Gixa̱a̱ nandoo dí makumulú rí na̱nguá má nindxu̱u̱ raʼkhí dí xóo nuni̱ ga̱jma̱a̱ xóo kúwá xa̱bu̱ náa numbaaʼ, nindxu̱u̱ xóo ikhiin nandoo nuni gagimijná (atraxnuu Efesios 5:6).

11. Xó ma experiencia ndrígóo Angela, ndíjkha dí gíʼdoo numuu muʼnimbulú consejo rí na̱ʼkha̱ náa Efesios 5:7 rá. (Atayáá ma̱ngaa xtiʼkhuu.)

¹¹ Gixa̱a̱ nandoo dí mambájxulú gajmiúlú xa̱bu̱ bi̱ tsénimbu̱ún xtángoo ndrígóo Jeobá. Ikha jngóo, Pablo niʼthúún xa̱bu̱ bi̱ kúwá náa Éfeso rí xambajxu̱u̱n gajmiún bi̱ nuni̱ dí ra̱májánʼ. Niʼthún: “Xúnila xóo eni̱ ikhiin” (Efes. 5:7). Mu ikháanʼ ndayóoʼ muñeumíjna̱lú itháan ki xóo bi̱ efesios, numuu dí raʼkháa i̱ndó mambajxulúʼ gajmiúlú xa̱bu̱ bi̱ nduʼñún rí asndu ma̱ngaa ma̱ndoo muʼtámíjná gajmiúlú náa Internet. Mbáa ndxájulú bi̱ na̱ʼkha̱ náa Asia bi̱ mbiʼyuu Angelaa naʼthí rí gamíi nindxu̱u̱ dí mata̱ʼa̱ʼ náa Internet, ikhaa naʼthí: “Mañu mañúú narugoo idaaʼ. Nijkhánú nimbájxuʼ gajmíʼ xa̱bu̱ bi̱ na̱nguá enimbu̱ún consejo ndrígóo Jeobá. Ga̱jma̱a̱ nijkhánú nindxa̱ʼwáminaʼ dí na̱nguá má nindxu̱u̱ mbiʼ rí matani̱ dí tsénigu̱u̱ʼ Jeobá”. ¡Ra̱ʼkhá tháán májánʼ dí a̱ngiu̱lú bi̱ kuya̱ edxuu nimbayuʼ mariʼkuminaaʼ! Ikhaa naʼthí: “Rí xúgi̱ naniminaʼ mandxaʼwáminaʼ i̱ndó rí nanigu̱u̱ʼ Dios, ra̱ʼkhá dí na̱ʼkha̱ náa Internet”.

12. Ndiéjunʼ guʼni á mu nandulúʼ muʼnimbulú xtángoo ndrígóo Jeobá rá.

¹² Maski ajndu xa̱bu̱ numbaaʼ nuthi̱ rí muʼni xúgíʼ enii dí xkawiʼ na̱nguá má nindxu̱u̱ ra̱májánʼ, mú xúniʼñáaʼ maguma nduwáánʼ; numuu dí rúʼko̱ nindxu̱u̱ nduwaʼ (Efes. 4:​19, 20). Gurajximijnalú: “Lá na̱ni̱ mbá tsiakii mú xámbájxu̱ gajmíʼ compañeriúʼ náa escuela, náa nañajunʼ o eʼwíinʼ xa̱bu̱ bi̱ tsénimbu̱ún xtángoo ndrígóo Jeobá ráʼ. Lá tsémiñuu mata ga̱jma̱a̱ nambáyúu kisngáa ndrígóo Biblia maski ajndu xa̱bu̱ nuthu̱nʼ rí tséyamajkhuu rí nuni xáʼ.” Ma̱ngaa xóo ma eʼthí náa 2 Timoteo 2:​20-22, rí náa congregación ma̱ngaa gíʼmaa muraʼwíin májánʼ bi̱ mambájxulú gajmiúlú. Garmáʼáan a̱jkiu̱lú dí raʼkháa xúgíinʼ ma̱ndoo mumbayulúʼ mu mu̱ʼni̱ ñajuunʼ Jeobá.

GAJNGRUIGÚLÚ MÁ XÚʼKO̱ XÓO E̱JI̱I̱N AGUʼ

13. Ndiéjunʼ eyoo gáʼthúu̱n rí majngruigulú má xúʼko̱ xóo e̱ji̱i̱n aguʼ rá. (Efesios 5:​7-9.)

¹³ Nda̱wa̱á dí nixnún consejo cristianos bi̱ nikuwa náa Éfeso rí muʼni gaʼduunʼ má xúʼko̱ rí mikrína, Pablo niʼthúún: “Gajngruigala xóo e̱ji̱i̱n aguʼ” (atraxnuu Efesios 5:​7-9). Ndiéjunʼ eyoo gáʼthúu̱n rá. Xó muʼthá, rí musngájma xúgíʼ mbiʼi rí nindxu̱lú mbáa cristiano bi̱ gajkhun. Mu muʼni rígi̱, ndayóoʼ muraxnuu ga̱jma̱a̱ muʼnigajmaa Biblia xúgíʼ mbiʼi ma̱ngaa i̱ʼwáʼ i̱yi̱ʼ dí naguwíi xuajñuu Dios. Índo̱ gúʼnigajma̱a̱, gúgíʼ májánʼ edxu̱lúʼ majmañulú náa xkri̱da ga̱jma̱a̱ kiʼsngáa ndrígóo Jesucristo bi̱ nindxu̱u̱ “aguʼ náa numbaaʼ” (Juan 8:12; Prov. 6:23).

14. Xú kaʼnii gándoo gámbáyulú espíritu santo rá.

¹⁴ Á mu nandulúʼ majngruigulú má xúʼko̱ xóo e̱ji̱i̱n aguʼ ndayúlú espíritu santo ndrígóo Dios. Náá numuu rá. Numuu rí naʼni gakhi̱i̱ maraxtaa náa mbá numba dí rígá wéñuuʼ rí tséjmaa (1 Tes. 4:​3-5, 7, 8). Espíritu santo ma̱ndoo mambáyulúʼ munigaʼduunʼ ku̱ma̱ dí rígá náa numbaaʼ rí tsémbánii ga̱jma̱a̱ rí naniguuʼ Dios. Ma̱ngaa ma̱ndoo mambáyúlú muʼni “rí májánʼ, rí jmbu ga̱jma̱a̱ rí gajkhun” (Efes. 5:9).

15. Ndiéjunʼ gándoo muʼni mu mundrígúlú espíritu santo rá. (Efesios 5:​19, 20.)

¹⁵ Jesús niʼthí dí Jeobá “maxnúún espíritu santo bi̱ gúnda̱ʼa̱a̱” (Luc. 11:13). Ikha jngóo mu ma̱ndoo makhánulúʼ, guʼtákáñíí Jeobá rí maxnúlú, ma̱ngaa nakánulú índo̱ nuʼni mba̱a̱ Jeobá náa reunión gajmiúlú a̱ngiu̱lú (atraxnuu Efesios 5:​19, 20). Espíritu santo ma̱ndoo mambáyulú makuwáánʼ xó má naniguuʼ Dios.

16. Ndiéjunʼ gámbáyulú mu muraʼwíí májánʼ dí muʼnilú rá. (Efesios 5:​10, 17.)

¹⁶ Índo̱ gúraʼwíí mbá dí gíʼdoo numuu muʼni, gíʼmaa mbuʼyáa “ndiéjunʼ rí nandoo Jeobá” ga̱jma̱a̱ nda̱wa̱á mugíʼ muʼni (atraxnuu Efesios 5:​10, 17). Índo̱ nduʼyáʼ ikha dí na̱ʼkha̱ náa Biblia mu mambáyúlú, xúʼko̱ nusngajmá dí nandulúʼ mbuʼyáá xóo endxa̱ʼwáminaʼ Jeobá ga̱jma̱a̱ numuu dí nandulúʼ muʼni. Á mu nuʼnimbulú ikha rígi̱, xúʼko̱ ma̱ndoo muraʼwíí májánʼ dí muʼni.

17. Xú kaʼnii gándoo gajmulú májánʼ mbiʼi ndrígulú rá. (Efesios 5: 15, 16; ma̱ngaa atayáá xtiʼkhuu.)

¹⁷ Pablo ma̱ngaa niʼthúún cristianos bi̱ nikúwá náa Éfeso rí mbaʼyóoʼ majmúún májánʼ mbiʼi ndrígu̱ún (atraxnuu Efesios 5:​15, 16). Gixa̱a̱ nanigu̱u̱ʼ mbaʼyulú muʼni dí rígá náa numbaaʼ rí asndu xáguaʼdáá mbiʼi mu muʼni ñajuunʼ Dios (1 Juan 5:19). Ra̱mingíjyúuʼ nindxu̱u̱ rí mbáa cristiano manigu̱u̱ʼ magiʼdoo itháan, rí maʼnigajmaa i̱mba̱ escuela o mañajunʼ ki xóo mbaʼyáʼ maʼni itháán ñajuunʼ Jeobá. Á mu xúʼko̱ eguáʼníílú, xúʼko̱ nusngájma dí kúwáanʼ rundxa̱ʼwa̱míjna̱ xóo má endxaʼwamíjna̱ xa̱bu̱ numbaaʼ. Na̱nguá má nindxu̱u̱ ra̱májánʼ rí maraʼdáá, mú ragíʼmaa magiʼdoo itháan numuu rígi̱ náa vida ndrígulú. Mu ma̱ndoo majngruigulú má xúʼko̱ “xóo e̱ji̱i̱n aguʼ”, gíʼma majmulú májánʼ mbiʼi rí naguanúu, xóo muʼthá, muʼni ñajunʼ rí itháán gíʼdoo numuu.

18. Ndiéjunʼ niʼni Donald mu majmuu májánʼ mbiʼi ndrígóo rá.

¹⁸ Guʼyáʼ xóo muʼni itháán ñajuunʼ Jeobá. Rúʼko̱ nindxu̱u̱ dí niʼni Donald, bi̱ xtáa náa Sudáfrica. Ikha naʼthí: “Ndi̱yo̱o̱ ndiéjunʼ dí ma̱ndoo ma̱ni̱ xóó, ikhú nitakáñuu Jeobá dí mambáyuʼ, nindo̱ʼo̱o̱ dí ma̱ndoo maxkamaa mbá ñajunʼ dí maniñuʼ mataraʼa itháán. Ikhaa nimbáyúʼ niʼngo̱o̱ nixkamaa, ikhú a̱ʼgiu̱ʼ ga̱jma̱a̱ ikhúún niguáʼdi̱i̱ ninixu̱ kájxi̱ ñajuunʼ Jeobá”.

19. Ndiéjunʼ gándoo guʼni mu majngruigulú má xúʼko̱ xóo e̱ji̱i̱n aguʼ rá.

¹⁹ Carta rí niʼnirámáʼ Pablo ga̱jma̱a̱ espíritu santo náa inún bi̱ efesios nimbáñún mu muguajún jmbu náa Jeobá, mangáánʼ ma̱ndoo mambáyulú rí mbiʼi xúgi̱. Xó má ndiʼyáá nambáyulú mu muraʼwíí májánʼ dí muʼni gagimijná ga̱jma̱a̱, muraʼwíin májánʼ bi̱ mambájxulú gajmiúlú, ma̱ngaa naxkajxáánʼ muʼnigajma̱a̱ itháán Biblia numuu rí xúʼko̱ nuniʼñámíjná rí gajkhun dí na̱ʼkha̱ náa Biblia maxnúlú ikha. Ma̱ngaa naʼni marmáʼáan a̱jkiu̱lú rí gíʼdoo wéñuuʼ numuu espíritu santo, dí nambáyulú manindxu̱lú itháan májánʼ xa̱bu̱. A mu nuʼnimbulú consejo ndrígóo Pablo, ma̱ndoo muraʼwíí muʼni rí maʼni maxtáa gagi Jeobá. Rí muʼni xúgíʼ rígi̱, xakuwáánlú náa mikrína ndrígóo numba rígi̱, makuwáánʼ náa aguʼ.