Каломи Худо барои омӯзиш фоиданок аст
1. Барномаи анҷумани ноҳиявии соли хизматии 2014 чӣ ном дорад ва дар он ба кадом савол ҷавоб меёбем?
1 Яҳува Худо аз ҳама муаллими беҳтарин дар олам мебошад (Иш. 30:20, 21). Лекин, Яҳува чӣ тавр моро таълим медиҳад? Ӯ китоберо ба мо додааст, ки аз дигар китобҳо бартарӣ дорад. Ин Каломи илҳомбахшидаи Ӯ — Китоби Муқаддас мебошад. Чӣ тавр таълимоти Худо аз ҷиҳати ҷисмонӣ, зеҳнию фикрӣ, эмотсионалӣ ва рӯҳонӣ ба мо манфиат оварда метавонад? Ҷавоби ин савол дар барномаи анҷумани ноҳиявии соли хизматии 2014 дида баромада мешавад. Номи барномаи анҷуман «Каломи Худо барои омӯзиш фоиданок аст», бар 2 Тимотиюс 3:16 асос меёбад.
2. Фикрҳои асосии барнома ҷавоби кадом саволҳоро пешкаш мекунад?
2 Фикрҳои асосӣ. Фикрҳои асосии барнома ҷавоби саволҳои зеринро пешкаш мекунад:
• Таълимоти Худо ба ҳаёти мо чӣ гуна таъсир мерасонад? (Иш. 48:17, 18).
• Агар барои ба Яҳува пурравақт хизмат кардан вазъиятамонро тағйир диҳем, мо ба чӣ боварӣ дошта метавонем? (Мал. 3:10).
• Муносибати мо ба «таълимоти... бегона» бояд чӣ гуна бошад? (Ибр. 13:9).
• Чӣ тавр мо ба тарзи таълими Исо пайравӣ карда метавонем? (Мат. 7:28, 29).
• Чаро онҳое, ки дар ҷамъомад таълим медиҳанд, бояд худро таълим диҳанд? (Рум. 2:21).
• Каломи Худо дар кадом соҳаҳои ҳаёт ба мо манфиат меорад? (2 Тим. 3:16).
• Чӣ тавр «ба ларза» овардани халқҳо ба одамон таъсир мерасонад? (Ҳаҷ. 2:6, 7).
• Яҳува нисбати мо дар чӣ дилпур аст? (Эфс. 5:1).
• Чаро барои дар таълими Яҳува мондан, бояд саъю кӯшиш ба харҷ диҳем? (Луқ. 13:24).
3. Чаро барои мо муҳим аст, ки ба барномаи анҷуман ташриф орем ва онро бодиққат гӯш кунем?
3 Пештар дар 2 Тимотиюс боби 3, пеш аз навиштани суханони мавзӯи барномаи анҷуман, Павлус аломатҳои замонҳои сахт, ки охирзамонро тасвир мекунад, номбар кард. Ӯ чунин навишт: «Одамони бад ва фиребгарон боз ҳам бадтар гардида, дигаронро гумроҳ хоҳанд кард ва худашон гумроҳ хоҳанд шуд» (2 Тим. 3:13). Барои гумроҳ нашудан, то чӣ андоза ба мо муҳим аст таълимоти Худоро гӯш кардан ва қабул намудан! Аз ин рӯ, биёед ба ин барномаи саривақтӣ ташриф орем ва онро бодиққат гӯш кунем.