Маъракаи махсус дар моҳи сентябр. Омӯзиши Китоби Муқаддасро сар мекунем

Дар моҳи сентябр мо сахт кӯшиш мекунем, ки брошураи «То абад зинда бошед!»-ро истифода бурда ба ҳама касоне, ки дар хизмат вомехӯрем, омӯзиши Китоби Муқаддас пешкаш кунем. Воизон метавонанд дар ин моҳ пешрави ёвар шуда 30 соат хизмат кунанд. Ин маъракаи махсус чӣ тавр мегузарад?

• Дар суҳбати аввал. Саҳифаи охири брошураро истифода бурда шавқи шахсро ба Китоби Муқаддас бедор кунед ва чӣ тавр гузаштани омӯзишро нишон диҳед. Дар бораи касоне, ки пештар ҳамроҳашон дар бораи Китоби Муқаддас гап зада будед, аз он ҷумла боздидҳоятон, фаромӯш накунед. Онҳо дар гузашта ба омӯзиш розӣ нашуда бошанд ҳам, шояд, ба онҳо брошураи «То абад зинда бошед!» ва тарзи нави омӯзиш маъқул шавад. Мо брошураи навро дар таги дари касоне, ки дар хона нестанд, намемонем ва онро ба онҳое, ки шавқ зоҳир накарданд, ба воситаи нома намефиристем. Кумитаи хизматии ҷамоат метавонад дар давоми ин моҳ барои хизмат вохӯриҳои иловагиро ташкил диҳад.

• Дар мавридҳои дигар. Агар ҷамоати шумо аробачаҳои адабиётдорро истифода барад, дар он брошураи «То абад зинда бошед!»-ро монед. Ба шахсоне, ки брошураро гирифтан мехоҳанд, фаҳмонед, ки омӯзиши он бепул аст. Ба онҳо кӯтоҳакак нишон диҳед, ки омӯзиши брошура чӣ тавр мегузарад ё гапзанон кунед, ки дафъаи дигар нишон медиҳед. Нозири хизматӣ метавонад воизони ботаҷрибаро таъйин кунад, то ба маҳаллҳои кории минтақаашон рафта, омӯзиши Китоби Муқаддасро пешкаш кунанд. Шумо ҳамчунин метавонед ба ҳамкоронатон ё ба касоне, ки ҳангоми хизмати ғайрирасмӣ вомехӯред, омӯзиши Китоби Муқаддасро пешкаш намоед.

Исо ба мо фармуда буд, ки шогирд тайёр кунем ва онҳоро таълим диҳем (Мт 28:19, 20). Бигзор ин маъракаи махсус ва брошураи «То абад зинда бошед!» ба мо дар иҷрои амри Исо кумак кунад.