Paggamit ng Aklat na Mabuhay Magpakailanman sa mga Pagdalaw Muli
1 Inihalintulad ni apostol Pablo yaong mga nagpapakita ng interes sa katotohanan sa mga murang halaman, na nangangailangan ng regular na pagdidilig at paglilinang. (1 Cor. 3:6-9) Gayundin sa ngayon, ang mga interesado ay nangangailangan ng mapagmahal na pangangalaga na ating ibinibigay kapag tayo ay gumagawa ng mga pagdalaw muli upang linangin ang kanilang espirituwal na paglaki.
2 Ang mga indibiduwal na ating dinadalaw ay kadalasang nangangailangan ng mga paalaala upang kanilang matandaan ang mga puntong ating pinag-usapan nang nakaraang dalaw. Kaya sa bawat pagdalaw makabubuting repasuhin sa maikli kung ano ang inyong huling pinag-usapan.
3 Sa pagdalaw muli, maging nakapaglagay man o hindi ng aklat na “Mabuhay Magpakailanman,” nanaisin ninyong gamitin ang tuwirang paglapit na ito upang mapasimulan ang pag-aaral:
◼ “Maraming mga taong nakausap namin ang nakasumpong ng mga kasagutan sa kanilang mga katanungan sa Bibliya sa pamamagitan ng paggamit ng aklat na ito.” Pagkatapos na bumaling sa talaan ng mga nilalaman, maaari ninyong itanong: “Sa anong paksa kayo higit na interesado?” Bumaling sa paksang gusto niya at ipakita sa maybahay kung papaanong ang bawat parapo ay may numero at may katumbas na tanong sa ibaba ng pahina. Saklawin lamang ang ilang punto at gumawa ng tiyak na kaayusan para bumalik muli.
4 Ang iba pang paglapit ay maaaring:
◼ “Ako’y tunay na nasiyahan sa ating pag-uusap noong nakaraang linggo. Maraming tao ang interesadong makaalam kung bakit kami patuloy na dumadalaw sa kanilang tahanan. Sa palagay ko’y magiging interesado kayo sa komento sa pahina 29 ng aklat na ito. [Basahin ang parapo 11 mula sa aklat na Mabuhay Magpakailanman.] Batay sa sinasabi dito, ano ang kailangan upang maging kalugod-lugod sa Diyos ang ating pagsamba? [Hayaang sumagot.] Noong kaarawan ni Jesus, may mga nag-akala na ang kanilang relihiyon ay kalugod-lugod sa Diyos. Pansinin ang sinasabi hinggil sa kanila sa parapo 2 ng kabanatang ito.”
5 Sa pagsubaybay sa nailagay na aklat na “Mabuhay Magpakailanman,” maaari ninyong sabihin:
◼ “Noong huli kong pagdalaw, ating pinag-usapan ang mga kalagayan sa daigdig na nangangailangan ng pagbabago. Naisip na ba ninyo kung bakit pinahihintulutan ng Diyos ang kabalakyutan?” Hayaang sumagot at bumaling sa pahina 99, parapo 2, na binibigyang pansin ang mga tanong sa pag-aaral. Basahin at talakayin ang parapo, na tinitingnan ang mga kasulatan. Maaaring dagdagan ninyo ito sa pamamagitan ng pagbaling sa mga ilustrasyon sa aklat, halimbawa, sa mga pahina 78, 84-5, 119, 147, 149-53, at 156-8.
6 Kung Saan Nakapag-iwan ng Tract: Kung minsan isang tract ang naiwan sa unang pagdalaw. Kapag kayo ay bumalik, maaari ninyong talakayin ang isa o dalawang parapo mula sa tract lakip na ang mga kasulatang binanggit. Pagkatapos ay ipakita kung papaanong ang isa sa mga kasulatan ay tinatalakay nang higit na detalyado sa aklat na Mabuhay Magpakailanman.
7 Habang patuloy nating dinidiligan ang mga murang halaman ng Kristiyanong pananampalataya na nasa ating pangangalaga, palalaguin ito ng Diyos sa kaniyang ikapupuri at ikaluluwalhati.—1 Cor. 3:7.