Wekelo wa Dibuku Onto Loleki Woke lo Tena Tshɛ

¹ Lo lomingu la Ngɔndɔ k’Esambele 30, tayotatɛ mbeka dibuku Onto Loleki Woke lo Tena Tshɛ lo wekelo wa dibuku. Ayonga mɛtɛ ɔngɛnɔngɛnɔ dia mbeka lɔsɛnɔ ndo olimu waki Yeso Kristo! Lam’ele dibuku nɛ diakafundama lo yoho yotshikitanyi yema l’abuku akina wakateke, alako amɔtshi wayonga ohomba.

² Lam’ele numɛlɔ ya ndjɛkɛ hayofundami, ekongelo kakatondjama l’Olimu Aso wa Diolelo mɛnyaka totshapita tahomba mbekama. Esangɔ efula ayongaka totshapita tohende kana tosato lo lomingu. Tshapita ya 35, 111 ndo ya 116 yekɔ etale efula, lâsɔ tɔ tayokahanyema lo tenyi efula dia mbekama. L’ɔkɔngɔ w’ɔnangɛso ɔmɔtshi lakoka mbadia tshapita y’otondo (kana edingɔ w’oma l’ɔtɛ wa dui, oko ɛnyɛlɔ lo tshapita ya 35, 111 ndo ya 116), ɔnɔmbɔdi wa wekelo ayoka wembola wele l’ekomelo ka tshapita ndo wɔtɔnɛ la tshapita kana l’etenyi kadishawɔ. Aha mbala tshɛ mbayelana ekadimwelo l’ɔnɔngɔ lo tshapita. Kɔmatɛrɛ ya tshena pe ndo ya shikaa yayoshama lo kɛnɛ kele lo tshapita.

³ Oma lâsɔ, naka wonya wekekɔ, kete avɛsa tshɛ woshilami l’ekomelo ka tshapita kokaka mbadiema. Avɛsa woleki etale kokaka kahanyema woho wa kimanyiya apandjudi wotshikitanyi dia vɔ lawɔ mbadia; oma lâsɔ ko elembetshiyelo mbishama lo kɛnɛ kadishawɔ. L’ekimanyielo ka wembola ɛmɔtshi w’eshika wayondɔlɔngɔsɔla, ɔnɔmbɔdi ayosala di’anto mbisha kɔmatɛrɛ yasha wetshelo yayɛnya diɔtɔnganelo diele lam’asa avɛsa wadishawɔ la tokanyi tɔmɔtshi ta lânde ta lo dibuku. Wembola la kɔmatɛrɛ tshɛ pombaka kimanyiya ampokami dia vɔ kotola yambalo yawɔ efula oya le Yeso Kristo, lo lɔsɛnɔ lande ndo lo wetshelo ande.

⁴ Dibuku Onto Loleki Woke lo Tena Tshɛ tɛkɛtaka dikambo dia lɔsɛnɔ laki Yeso lanɛ la nkɛtɛ tatɛ oma l’etatelo lo ndjela woho wakayetaka akambo. Dia mbohɔ akambo akɔ, mbeyaka monga ohomba efula le onto dia sala oko onto lɛna akambo akɔ, ndo shikikɛ lo wɔɔngɔ ande ahole wakete akambo akɔ. Mbala efula, kanyɔsɛdingolake esato wele l’alangi ndo mbokaka sso lo kartɛ kosangiwɔ l’etatelo ka dibuku nɛ, l’ɔkɔngɔ wa mbɔtwɛlɔ.

⁵ Mbɔtwɛlɔ ka dibuku kayekama lo lomingu la ntondo. L’ɔkɔngɔ wa wadielo w’awui tshɛ wele l’ɔtɛ wa dui wahɔnyi, ɔnɔmbɔdi ayoka wembola wasungana wakandatalɔngɔsɔdi. Wahɔ wayokondja anto oma lo wekelo wa dibuku nɛ ayolemanɛ efula la woho wayodilɔngɔsɔla onto tshɛ. Djekoleko ɔnɔmbɔdi ayohombaka ndjalɔngɔsɔla dimɛna lomingu tshɛ woho wa kimanyiya ase olui wa wekelo wa dibuku dia nyomoleka mbeya onto loleki woke lo tena tshɛ, Nkumɛso ndo Oshimbedi aso Yeso Kristo.