Onde Sho Kokaka Nyomoleka Tombola Jehowa lo Mɔmbi?

¹ Davidi, omembi w’esambu, aki la saki ka tombola Jehowa l’otema ɔtɔi lo yoho yasungana lande, diɔ diakɔ diakandate ate: “Layukaka [Jehowa, NW] lusaka la wuki l’unyo, ee, dimi layûtumbulaka l’atei ului w’antu.” (Osam. 109:30) Mɔmbi ekɔ ngɔndɔ ka dimɛna efula ka ‘nyomoleka mbotombola’ lo ndjasha efula l’olimu. (Osam. 71:14) Onde tɔsakɔ tɛdikɔ dia ndjâla l’atei w’efula ka wanɛ wasala ɔsɔku lam’ɔtɔwɔ l’ɔnɔngɔ w’ambatshi mboka wa tshanda oka?

² Toyalɔngɔsɔlɛ Mako Kakianɛ: Tukedi 21:5 toholaka ɔnɛ: “Tukanyi ta kanga kolamelu, tatûkundjiyaka diango efula.” Lâsɔ sho pombaka mbutɛ Jehowa dikambo diakɔ lo dɔmbɛlɔ, lo mendɛka ntondo lende lo asangwelo aso. (Tok. 3:​5, 6) L’ɔkɔngɔ tɔsɛdingole ekongelo kaso l’ɔlɔlɔ tshɛ dia shikikɛ etshikitanelo wahomba salema dia momba kânga wenya ehende lo lushi dikambo di’olimu w’esambishelo. Naka sho ‘ndjatshungwela’ etena oma lo wesanu ekina, kete tayonyomoleka ndjasha l’esambishelo.​—⁠Ef. 5:⁠16.

³ Tewoyanake ndo Tokimanyiyanake: Ɔpɔstɔlɔ Paulo akate dikambo di’anto amɔtshi ɔnɛ vɔ ‘mbakokeketsha’ dia nde kotsha olimu ande. (Kol. 4:11) Tote wanɛ wakombola kamba olimu w’ombatshi mboka wa tshanda lo Mɔmbi awui wasangoyaso dia sala. Osukɔ awɔ ndo ekimanyielo kawɔ ayotosha diaaso dia mbishana tokanyi t’ɛlɔlɔ lo nyuma. Omendji w’olimu kokaka kadimola lo wembola aso w’endana la sanganya y’esambishelo ndo mbilo yakoka kambema olimu.

⁴ Anto amɔtshi wekɔ la diaaso dia ndjâla ambatshi mboka wa tshanda oma l’ekimanyielo la osukɔ wa nkumbo yawɔ. Elimu wa lo luudu kokaka kahanyema wenya ɛmɔtshi lo woho wotshikitanyi. Ondo ayonga ohomba nyomenda etena kakashikikɛma dia shidiya elimu akɔ. Ɔkɛtshanyelo l’atei a nkumbo mbeyaka tokimanyiya dia sho kotsha oweso aso. Dia awui asɔ nɔngana, sho pombaka mbewoyanaka awui ɔlɔlɔ ndo kambaka kâmɛ.

⁵ Totetemale la Mbɛkama: Tatokanyiyake esadi esadi ɔnɛ awui wele laso hawotosha diaaso dia ndjâla ambatshi mboka wa tshanda. Ɛlɔngɔlɔngɔ l’esekaseka wakɔtɔ lo kalasa, wanɛ wambolongola pasiɔ, wa mama ya kamba elimu wa la ngelo, ewandji wa nkumbo wakamba olimu lo tena ndo lo tena wakayalambola la lolango dia ndjâla ambatshi mboka wa tshanda lo Mɔmbi. Vɔ wekɔ la mbetawɔ l’ɛtɛkɛta waki omembi w’esambu wata ɔnɛ: “Diandu nsunganaka uma le untu l’uluwanyi,” ɔnkɔnɛ vɔ kɔmɛna wolo dia mbidja weolo wa lâdiko walɔmbama dia mbetsha wenya 60 l’olimu. (Osam. 33:⁠1) Koyanga sho hatokoke ndjâla l’atei w’ambatshi mboka wa tshanda, lande na kahatakoke sangana l’ɔngɛnɔngɛnɔ awɔ lo nyomoleka sambisha na?

⁶ Le anto efula, kamba olimu w’ombatshi mboka wa tshanda lo Mɔmbi akayala nna dia woke dia mbɔtɔ l’olimu w’ombatshi mboka wa pondjo. Vɔ wakɛnyi dia bu wolo kamba olimu w’ombatshi mboka wa pondjo nɛ dia wamboshilaka la fudia lotumu lawɔ.

⁷ Mɛtɛ, Mɔmbi ekɔ ngɔndɔ kasungana dia mbidiya olimu wa Teokrasi. Ngɔndɔ kakɔ kekɔ la wikɛndɛ etanu, kɛdikɛdi nshi ya samalo tshanu la nshi ya mingu tshanu. Sho mbeyaka tatɛ elimu aso kɔlɔmɔ ndo kamba kânga la dikɔlɔ. Sho kombolaka sala la weolo aso tshɛ dia tombola Jehowa Nzambi kaso. Olimu w’ombatshi mboka wa tshanda lo Mɔmbi ekɔ yoho yoleki ɔlɔlɔ ya mɛnya lowando laso l’etsha ande efula wa ngandji ka mamba oya le so.