Wekelo Wa Bible Wakonya Anto Ambeki
1 “Kakona kanshimba dimi batizama?,” ɔsɔku mbakambola ɔlɛnga w’Ose Etiyɔpiya l’ɔkɔngɔ wa Filipɔ ‘mbôsambisha lokumu l’ɔlɔlɔ lendana la Yeso.’ (Etsha 8:27-39) Ɔlɛnga ɔsɔ ambotashilaka nanga afundelo wakasambiyama oma le Nzambi, ndo l’ɔkɔngɔ wa nde kondja ekimanyielo ka lo nyuma oma le Filipɔ, nde aki suke dia koma ombeki. Koko aha anto tshɛ mbeya ɔnɛ vamɛ pombaka sɛdingola Afundelo.
2 Diɛsɛ ko, ɔlɔngɔswamelo waki Jehowa ambototondjɛ biukubuku y’oyoyo yele l’ɔtɛ a dui ɔnɛ Un livre pour tous, yɔ keketshaka anto dia vɔ sɛdingola losango lele lo Bible lendana la nshi yaso nyɛ. Awui wele lo biukubuku yakɔ ayokotola yambalo y’anto w’etema ɛlɔlɔ wanɛ wele ondo wakɔtɔ kalasa koko haweye awui efula wa lo Bible. Ehomɔ kɛsɔ ka dimɛna efula kakasalema dia mbasha saki ka vɔ sɛdingola Bible.
3 Lam’amɛso mbeka l’onto Bible, ayonga dimɛna tohodi alako w’amɛna efula wakatombe l’Olimu Aso wa Diolelo wa Ngɔndɔ k’Esambele 1996 lo dikatshi di’okotsha, wɛnya woho wokokiso mbeka l’anto ko vɔ pama l’ekimanyielo ka dibuku Ewo. Lam’ekaso la nde, katendake woho watandahame dia mbeya l’akambo akɔna wahombaso mbidja yimba efula. Tôkeketsha dia nde tayalɔngɔsɔlaki la ntondo ndo tadiaki avɛsa woshawɔ lo Bible. Ekadimwelo washande l’ɛtɛkɛta ande ndamɛ mbeyaka mɛnya woho wandolande akambo wa mɛtɛ l’atei w’otema. Esangɔ efula, wanɛ wadia ekanda ekina waki la Société ko tshɔka ndo lo nsanganya tena tshɛ pamaka esadi esadi. Tôkeketsha dia nde mbutɛka anto kɛnɛ kekande. Towɛnya la lɔngɛnyi tshɛ kɛnɛ kahombande sala dia pama lo nyuma. Hatohombe mbekaka pondjo pondjo l’anto wahɔshi ndoko yɛdikɔ. Ambeki mbahomba mumɛ la mbeka, mbɔsa yɛdikɔ ya nge dia ndjela akambo wa mɛtɛ, ndo ntshɔ tsha la ntondo dia ndjakimɔ le Nzambi ndo batizama.
4 Lo nkumbo mɔtshi, sho mbekaka l’anto efula Bible, onto l’onto lo wonya ande. Koko, tena efula, ayoleka dimɛna mbeka la wɔ Bible mbala ɔtɔi nkumbo k’otondo, nɛ dia dikambo sɔ kakatanyaka nkumbo k’otondo lo nyuma.
5 Yeso totomɛka dui dia sho mbetɛ anto ambeki. (Mat. 28:19) Dia sala dikambo sɔ, sho pombaka mbetsha anto Bible lo yoho yokoki mbâsokoya lo vɔ pama lo yɛdikɔ yokokiwɔ mumbola ɔnɛ “Kakona kanshimba dimi batizama?”
[Caption on page 3]
Sɛdingwama Oma Le Jehowa: Lande Na Kediɔ Ɔlɔlɔ?
1 Onto tshɛ kombolaka monga la demba dia wolo; ngasɔ mbayonga lɔsɛnɔ ɔngɛnɔngɛnɔ efula. Ɔnkɔnɛ, kânga anto waha la hemɔ tɛnanaka l’onganga tena la tena dia menda alemba awɔ. Lande na? Vɔ nangaka têyi hiemɔhemɔ tshɛ yele lawɔ esadi dia tayâsake. Ekɔ ohomba efula nto sho mbidja yimba lo lonyuma laso. Dia mbetawɔma le Jehowa, sho pombaka tshikala ‘nge lo mbetawɔ.’—Tito 1:13.
2 Ɔnɛ kele etena ka sho tshika Jehowa dia nde tɔsɛdingola. Lande na ngasɔ na? Nɛ dia Jehowa ekɔ lo tɛmpɛlɔ kande k’ekila ndo ekɔ lo sɛdingola etema w’anto tshɛ. (Osam. 11:4, 5; Tuk. 17:3) Oko Davidi, sho nɔmbaka Jehowa dia tɔsɛdingola tshɛ: ‘Wɛ Jehowa, ɔsɛdingole ndo opembe; oshishimi tokanyi tami ndo otema ami.’—Osam. 26:2.
3 Nɛ dia demba diaso kema kokele, sho la dia menda dimɛna kɛnɛ kele l’etei kaso kokoki nanya lonyuma laso. Tukedi 4:23 mbishaka dako nɛ: ‘Oleki diangɔ dikina tshɛ diahomba onto nama, lama otema ayɛ, nɛ dia oma lɔkɔ katotombaka tɔkɔkɔ ta lɔsɛnɔ.’
4 Lonyuma laso lekɔ nto lo wâle lale andja ɔnɛ wambolola l’akambo wa kɔlɔ ndo wa mindo. Naka sho ndeka ndjasukanya la dikongɛ nɛ dia kɔlɔ, kete sho mbeyaka ndjomɛ la kanyiya oko diɔ ndo mbokoya waonga w’anto wa l’andja ɔnɛ. Kana nto, sho mbeyaka ndjetawɔ yoho yadiɔ ya lɔsɛnɔ ko ndjokotɔma la yimba yadiɔ.—Ef. 2:2, 3.
5 Dia nde tolanya lo nyuma, Satana mbeyaka pɔhɔla ɔhɛnyɔhɛnyɔ kana wekamu mbala kakɔ ɔtɔi. Koko, tena efula nde tokesaka oma lo kɛnɛ kele l’andja ɔnɛ kakotola anto. Petero totɛka dia sho ‘tetemala monga totshundju ndo mambalɛka,’ nɛ dia Satana ekɔ ‘oko kimbwe kahangiya,’ ‘kayanga onto la ndɛ.’ Wambotokeketsha dia ‘sho mbôtona ndo monga nge lo mbetawɔ.’—1 Pet. 5:8, 9.
6 Ekɔ ohomba efula sho kokɛ lonyuma laso lo mongaka la mbetawɔ ka nge, kahɛtshahɛtshama lushi tshɛ. Ɔpɔstɔlɔ Paulo tolakaka dia sho pembaka mbetawɔ kaso tena tshɛ. Kanga lomba toyelaka alako w’eshika wawosha onganga w’ɔlɔlɔ; woho akɔ mbahombaso nonga Jehowa naka ɔsɛdingwelo ande wa lo nyuma ambotoshola la hemɔ kɛmɔtshi kahombaso sakemɛ. Ɔsɔku, mbayotokoka ‘kamba dia sho kɔlɔngana.’—2 Kor. 13:5, 11.
7 Jehowa ekɔ mɛtɛ Onganga woleki enganga tshɛ. Nde mbeyaka mbishola hemɔ tshɛ. Nde mbeyaka kakɔna mɛtɛ kele laso ohomba. Oma lo Dui diande la “ɔhɔmbɔ wa kɔlamelo,” nde tofundɛka mbo ya pudipudi ya lo nyuma yahombaso ndɛ. (Mat. 24:45, NW; 1 Tim. 4:6) Naka tayɔlɛka mbo ya lo nyuma y’amɛna shɔ tena la tena, lakaso ndo lo nsanganya ya l’etshumanelo, kete tayongaka la lonyuma la wolo nshi tshɛ. Kambaka lo nyuma tena la tena l’olimu w’esambishelo ndo ntumu nkina y’Akristo ekɔ nto la wahɔ efula. Diɔ diakɔ diele, totshikake Jehowa atɔsɛdingolake tena tshɛ teya ɔnɛ nde ayotosha lonyuma la wolo lahombama.