Tɔlɛmiya Dihole Di’ɔtɛmwɛlɔ Wa Jehowa
1 Wonya watelɛ onto ɔmɔtshi lakande, sho tɔlɛnyaka diangɔ diande, tasala tshɛ di’aha nanya ndoko ema. Ndo hatotofukutanyaka diangɔ oko wakadilɔngɛ kanga luudu. Ko naka lo luudu l’onto sho salaka ngasɔ, kete hoke lo luudu la Jehowa? Sho la dia mbeya woho wa ndjâlɔmbɔla lo luudu lande. (Osam. 15:1; 1 Tim. 3:15) Oyadi nsanganya yaso y’Akristo yekɔ lo salema lo Mbalasa ka Diolelo, lo luudu l’onto ɔmɔtshi, kana lo luudu lɔmɔ l’anto tshɛ, efula kaso tɔlɛmiyaka nshi tshɛ dihole diaso di’ɔtɛmwɛlɔ, lo diɔsa oko luudu la Jehowa, ɔnɛ lele “lutumbu landi leko la diko dia kete ndu ladiku di’ulungu.”—Osam. 148:13.
2 Anangɛso amɔ hawoleke nɛnya nsanganya; vɔ mbidjaka londjo efula kana salaka oko awui watama lɔkɔ kema ohomba. Epalanga ɛmɔtshi totetemalaka la sawola awui w’anyanya la soko, lo dihole diatowolongolaka anto, lo komba kana l’andja wa Mbalasa ka Diolelo lâsɔ ko losanganya lakashidi la tatɛ. Lam’ashawɔ ɔna dikɛnda kosɛnde dia nde mbolamaka, mbala mɔtshi vɔ akɔ ahende ndjomɛka kɛnya ko hawoyoleka ndjela losanganya. Wakɛnyi akɛnda wakɛnya l’ɔkɔngɔ a losanganya l’andja wa Mbalasa ka Diolelo, wadja londjo hakoke, wakɛnya ndo karate lam’asawɔ. Esangɔ ɛmɔtshi vɔ fukutanyaka asukanyi kana anangɛso lo lɔyɛnga la mbidɛdɛ kana ndawɔlawɔ l’asa ekala ndo lo tasokolaka epalanga w’anto.
3 Tatongake la Lɔsɛndji la Ngasɔ Nto: Naka sho mbeyaka nɛmɔ ndo ekila k’ɔtɛmwɛlɔ aso, kete mɛtɛ hatotofukutanya ampokami la tɔhɔtɛhɔtɛ, la ndɛ, la tɔma bazɔka, la shishashisha akatshi, la tombatombaka wonya tshɛ otsha lo komba kana lo komaka nshi tshɛ l’ɔkɔngɔ lo nsanganya. Ambutshi wele la dilɛmiɛlɔ ndo la lowando hawotshike anawɔ dia vɔ mbidja odihe mindo, ahɔndɔ wâlewɔ lo wa mɛsa kana pele dia Mbalasa ka Diolelo la dia luudu lasalawɔ wekelo wa dibuku. Lo wedi okina, sho tshɛ mbetawɔka ɔnɛ akambo wa sɔnyi, ɛyɔkayɔka la sawosawo di’awui a mindo, oyadi ngande, bu la dihole kânga yema lo nsanganya yaso.—Ef. 5:4.
4 Naka tayohɔka nshi tshɛ oyango wa nsanganya yaso y’Akristo, kete ndo sho ndo anaso tayɔlɛmiyaka ɔtɛmwɛlɔ wa Jehowa, dihole ‘diakatasɔnɛ dia sanganaka.’—Osam. 84:10.