Ɔtɛmwɛlɔ wa mɛtɛ wekɔ lo tahame l’Erɔpɛ wa l’Ɛsta
1 Akristo wa l’eleko ka ntondo wakasambishaka Diolelo l’ohetoheto. Vɔ wakangɛnangɛnaka ‘lam’akatahamaka lofulo la [tshumanelo] lushi la lushi.’ (Etsha 16:5) Lam’ele wakasambishaka la dihonga, ɔtɛmwɛlɔ wa mɛtɛ akayɔtɔ polo ndo l’Asiya, l’Afrika la l’Erɔpɛ, ko wakayonga la dinela di’ambetawodi efula.
2 L’etena kɛnɛ k’ekomelo, ɔtɛmwɛlɔ wa mɛtɛ wekɔ lo tatetemala la pama lo wedja wa l’Erɔpɛ wa l’Ɛsta. Lo wedja ɛnɛ wakashimbama olimu aso polo ndo l’ɛnɔnyi wa 1990, ehamelo kekɔ woho w’anyanya ɛlɔ kɛnɛ. Annuaire 1999 mɛnyaka ɔnɛ wedja ehende l’atei a wedja ɛsɔ, mbut’ate Russie la Ukraine, wakalekanya wodja la wodja apandjudi 100000 wakamba olimu Lo bɛtshi dia nkɛtɛ 15 dia lo wodja wa ex-Union Soviétique, tatɛ oma lo 1991, anto ndekana 220000 wamboyakimɔ le Jehowa ndo wambobatizama! Ohamelo ɔsɔ w’esadi esadi akɛnya ohomba wa mbikisha Mbalasa ya Diolelo y’eyoyo ndo Mbalasa ya Nsanganya ya Weke ndo fudia lofulo la waa Bɛtɛlɛ.
3 Oko wakawatewoya l’Olimu Aso wa Diolelo wa Ngɔndɔ ka Divwa 1997, lo akuta waki la Société wendana la wokelo wa Mbalasa ya Diolelo, wambɔsa etenyi kɛmɔtshi dia sɔndja tshumanelo dia lo wedja ɛnɛ wele ohomba wa Mbalasa ya Diolelo wekɔ efula, koko vɔ bu l’ekondjelo k’efula ndo wekɔ la pâ heyama dia kondja falanga. L’asa Ngɔndɔ ka Sato 1996 la ka Dikumi 1998, la Société aketawɔ mbisha Bɛtɛlɛ yalɔmbɔla olimu lo wedja 11 wa l’Erɔpɛ wa l’Ɛsta akuta dia vɔ mbikisha Mbalasa ya Diolelo 359. Wekɔ lo kamba la falanga yakakimɔma dia somba bɛtshi dia nkɛtɛ la diangɔ diendana la wokelo wa Mbalasa ya Diolelo y’eyoyo ndo kimanyiya tshumanelo dia diɔ nɔngɔsɔla Mbalasa nyɛ yambokamaka koko nɔmbaka dia minanda yema. Esato watɛnyawɔ lanɛ anɛ toshaka kanyi lo woho wambokimanyiyama anangɛso wa l’Erɔpɛ wa l’Ɛsta diɛsɛ oma lo weshasha watomɛ anangɛso wa l’États-Unis la wa lo wedja ekina la Société dia wokelo wa Mbalasa ya Diolelo.
4 Lo 1998, Bulgarie akonge l’ehamelo ka % 12, ndo anangɛso wakangɛnangɛna efula lam’akashile Mbalasa kawɔ ka ntondo ka Diolelo lo Ngɔndɔ ka Nɛi k’ɔnɔnyi akɔ ɔsɔ. La Croatie, ehamelo kakayala ka % 4, ndo nshi nyɛ anangɛso wa lɛkɔ wekɔ lo mbika Mbalasa ya Diolelo nkina nto dia ntɔla ɔtɛmwɛlɔ wa mɛtɛ otsha la ntondo. La Hongrie, tshumanelo 144 diekɔ la Mbalasa ya Diolelo 80. Dikambo sɔ mɛnyaka dia lo tshumanelo 235 dia lo wodja ɔsɔ, 61 lo lokama diekɔ la dihole diawɔ hita di’ɔtɛmwɛlɔ. La Macédoine, ekongelo ka wokelo wa Mbalasa ya Diolelo amboshidiya mbalasa hiende y’eyoyo lɛkɔ, ndo nkina yekɔ lo mbikama. L’asa Ngɔndɔ ka Samalo la k’Enanɛi 1999, wakashidiya Mbalasa ka Diolelo kele la woke wa mbalasa hiende l’osomba wa Skopje. Mbalasa kɛsɔ kokaka nongola tshumanelo samalo.
5 Ɔnɔnyi wetshi ɔnɛ, yedikɔ ya l’atei atei y’anto 260 wakabatizamaka lomingu tshɛ la Russie! Lo ndjela woho watsha wedja ekina, Bɛtɛlɛ ka la Russie ambɔlɔngɔsɔla Kɔmite ya Wokelo 12 l’ɛtshi kawɔ ka woke ka nkɛtɛ, dia vɔ sukɛ oyango wele lawɔ wa mbikisha Mbalasa ya Diolelo. Lo lɛkɛ la nɔrdɛ, mbut’ate la St. Petersburg, wekɔ lo mbika Mbalasa ka ntondo ka Nsanganya ya Weke, mbalasa kakoka mbɔtɔ anto 1 600. Lo dihole diele mbalasa kɛsɔ, wayokisha ndo Mbalasa ya Diolelo tshanu yele l’ahole wa mbidjasɛ 200 l’ɔm’ɔmɔ. Dia sukɛ kana kotsha ehomba wa lo nyuma w’anangɛso wa l’Ukraine, Mbalasa ya Diolelo 84 yamboshila mbikama ndo 80 yekɔ lo mbikama.
6 Shi ehamelo kɛsɔ ka lo wedja wa l’Erɔpɛ wa l’Ɛsta ngɛnyangɛnyaka etema aso? Oyadi lo dihole diakɔna diasɛnaso, ohamelo w’ɔtɛmwɛlɔ wa mɛtɛ toholaka di’ɔnɛ Nzambi kema la shɔnɔdi ndo ɔnɛ oma lo solo diande dia lotutsha, ‘lemba la woke’ l’anto wayoshimbamela. (Eny. 7:9; 2 Pet. 3:9) Ande diɛsɛ diele laso dia mbidja lonya lo yɛdikɔ ya tshitshɛ l’ehamelo ka lo nyuma k’ɔlɔngɔswamelo waki Nzambi lee! Tukedi 28:27 toshikikɛka ɔnɛ “one latushaka usi wula, hatuyalaka la uhumba.” Oma lo woho wetawɔso la lolango laso shamɛ dia kimɔ falanga dia dinyadinya nyɛ yakatombe lo wokelo wa mvudu, ‘tamboyɛdima’ lo diangɔ dia l’emunyi, ndo anto tshɛ wambokondja diaaso dia monga l’ɔngɛnɔngɛnɔ waya oma lo mbosha ndo mboka ɔlɔ wa mɛna woho watahame ɔtɛmwɛlɔ wa mɛtɛ l’andja w’otondo.—2 Kor. 8:14, 15; Etsha 20:35.
[Caption on page 3]
[Pictures on page 3]
Săcele, Roumanie
Maardu, Estonie
Sevnica, Slovénie
Tiszavasvári, Hongrie
[Caption on page 4]
[Pictures on page 4]
Jūrmala, Lettonie
Taurage, Lituanie
Tallinn, Estonie
[Caption on page 5]
[Pictures on page 5]
Prievidza, Slovaquie
Mátészalka, Hongrie
Belgrade, Yougoslavie
[Caption on page 6]
[Pictures on page 6]
Ruma, Yougoslavie
Vranov nad Topl’ou, Slovaquie
Tornakalns, Lettonie