Woho wakokaso mɛnya lowando laso
lo woshasha woleki woke wakatosha Nzambi
1. Lande na keso la lowando l’efula otsha le Jehowa?
1 Lo ‘weshasha w’ɛlɔlɔ’ waki Jehowa, tshungo k’Ɔnande la ngandji mbele woshasha woleki woke. (Jak. 1:17) Tɔ telaka ɛtshɔkɔ efula, mbidja ndo edimanyielo ka pɛkato yaso. (Ef. 1:7) L’ɔtɛ wa dikambo sɔ mbeso la lowando nshi tshɛ le nde. Lo nshi ya Eohwelo, sho ndjatshungwɛka etena lo yoho ya lânde dia nkana yimba lo woshasha w’oshinga wolo ɔsɔ.
2. Ngande wakokɛ wɛ la nkumbo kayɛ ndeka monga la lowando lo tshungo?
2 Kimanyiya ase nkumbo dia vɔ monga la lowando: Dia nkimanyiya ase nkumbo kayɛ dia vɔ monga la lowando, lo mingu ya la ntondo ka Eohwelo kayosalema lo Ngɔndɔ ka sato 30, lande na kahanyavusola akambo amɔtshi wendana la tshungo etena kasalanyu Ɔtɛmwɛlɔ wa lo nkumbo wa la dikɔlɔ? Ndo nto, nyɔsɛdingolake lushi tshɛ wadielo wa lânde wa Bible wendana la Eohwelo lo nkumbo. Kana yimba lo ɛlɔlɔ wamboyokondja oma lo tshungo ndo lo shɛngiya yamonga la tshungɔ kakɔ lo woho wɔsayɛ Jehowa, woho wayaɔsayɛ wɛmɛ, wɔsayɛ anto akina ndo wɔsayɛ nshi yayaye. Wɛ ayɛna nto ohomba mbeka esambo ehende w’eyoyo wayembama lo Eohwelo.—Osam. 77:12.
3. Yoho yakɔna yakokaso mɛnya lowando laso?
3 Woho wa mɛnya lowando laso: Lowando lele la so lo tshungo ayototshutshuya dia nsambisha anto akina awui wendana la Jehowa ndo la ngandji ka woke kakandatoke lo totomɛ Ɔnande. (Osam. 145:2-7) Lo Ngɔndɔ ka sato, ka nɛi ndo ka tanu, nkumbo mɔtshi yayɛnya lowando lawɔ lo nsala dia ɔmɔtshi l’atei awɔ monga ombatshi mboka wa tshanda. Naka hanyokoke nsala dikambo sɔ, shi nyu kokaka ‘ndjatshungwɛ etena’ ka nyomoleka nsambisha? (Ef. 5:16) Lowando lɔsɔ layototshutshuya nto dia sho nkimanyiya anto akina dia vɔ ndjosangana kâmɛ la so lo Eohwelo. (Eny. 22:17) Totate mfunda nkombo y’anto wembolaso, ambeki aso wa Bible, ewotɔ aso, asekaso wa l’olimu ndo nkombo y’asukanyi aso wayotelɛ ndo oma lâsɔ toyasha tshɛ l’okahanyelo w’akatshi wa leeta wa lânde wendana la Eohwelo.
4. Lo toho takɔna takokaso nkamba dimɛna la nshi ya Eohwelo?
4 Nshi ya Eohwelo toshaka waaso w’eyoyo wa sho mɛnya Jehowa woho wandolaso woshasha wakandasha anto tshɛ. Nyɛsɔ tokambe la etena kɛnɛ dia mfudia ndo mɛnya lowando lele la so lo tshungo ndo lo “ongonyi wa Kristu waheyama mbedika.”—Ef. 3:8.