Onde wɛ ambokambaka mbala kɛmɔtshi oko ombatshi mboka wa pondjo?

1. Naa diɛsɛ diakonge l’anto efula, ko kakɔna kakayongaka ohomba le amɔtshi?

¹ Aya ɛnɔnyi efula wele nunu di’anto wekɔ la diɛsɛ dia woke dia “mbetsha antu la nsambisha [l]ukumu l’[o]lolo” oko ekambi wa lo tena tshɛ. (Etsha 5:42) Koko, ambatshi mboka amɔtshi wakayotshika nkamba oko ambatshi mboka l’ɔtɛ w’ɛkɔkɔ wotshikitanyi. Naka wɛ akakambe mbala kɛmɔtshi oko ombatshi mboka wa pondjo, onde wɛ ambɔsɛdingola akambo wele layɛ nshi nyɛ dia menda kana wɛ koka monga ombatshi mboka nto?

2. Lande na kahomba wanɛ waki ambatshi mboka ntondo nsɛdingola akambo wele la wɔ kakianɛ?

² Akambo wele la so tshikitanaka: Mbeyaka monga ko dikambo diakakokonya dia ntshika olimu w’ombatshi mboka diaya bu nto. Ɛnyɛlɔ, naka wɛ akatshike olimu w’ombatshi mboka l’ɔtɛ wakiyɛ kokotshaka wenya 90 wakalɔmbamaka lo ngɔndɔ, onde wɛ hakoke nyomokamba olimu ɔsɔ lam’ele wenya wahomba kimɔma wambokitshakitshama lo 70? Onde wɛ hayokamba elimu efula wa l’emunyi oko wakayakambaka ntondo, kana aya bu l’ɛkɛndɛ efula wa lo nkumbo waki la yɛ etena kakayatshike olimu w’ombatshi mboka? Kadiyɛso kɛmɔtshi kakatshike olimu w’ombatshi mboka l’ɔtɛ wa hemɔ, akayongaka l’akoka wa nyomôkamba etena kakandakotsha ɛnɔnyi 89. Etena kakandɛnyi dia ambeta ndekana ɔnɔnyi ko nde hatate, nde akɛnyi dia yonge yande yayowokimanyiya dia nde nkamba oko ombatshi mboka nto!

3. Ngande wakoka ase nkumbo nkamba kâmɛ dia nkimanyiya ɔmɔtshi la lo nkumbo kawɔ dia monga ombatshi mboka?

³ Ondo wɛ atakambaka oko ombatshi mboka, koko onto ɔmɔtshi la lo nkumbo kayɛ akatshike nkamba olimu akɔ dia nkimanyiya ose nkumbo ɔmɔtshi, ɛnyɛlɔ oko ombutshi waya osombe. (1 Tim. 5:4, 8) Naka ngasɔ, onde wɛ kana ase nkumbo akina hawokoke nsala tshɛ dia nkimanyiya ɔnɛ laki ombatshi mboka? Lande na kahanyakɛtshanya dikambo sɔ kâmɛ? (Tuk. 15:22) Naka ase nkumbo nkamba kâmɛ dia ɔmɔtshi la l’atei awɔ nkamba oko ombatshi mboka, kete vɔ tshɛ kokaka mbɔsa oko ndo vɔ mbokambi olimu akɔ.

4. Kayotota naka taya kema l’akoka wa nyomokamba olimu w’ombatshi mboka nto?

⁴ Tɔkɔmɔke naka akambo wele la yɛ nshi nyɛ hawokosha diaaso dia nkamba oko ombatshi mboka nto. Nsaki kele la yɛ ka nsala dikambo sɔ ngɛnyangɛnyaka Jehowa. (2 Kor. 8:12) Kamba la diewo diakayakondja lam’akiyɛ ombatshi mboka l’olimu w’esambishelo. Ɛnya nsaki kele la yɛ ka nkamba olimu ɔsɔ lo dɔmbɛlɔ ndo onga suke dia ntana waaso wa nyomokongɛ akambo wele la yɛ. (1 Joa. 5:14) Ondo l’edjedja ka wonya, Jehowa mbeyaka ndjokodiholɛ ‘soko dia woke diasha diaaso l’olimu’ dia wɛ nyomokondja ɔngɛnɔngɛnɔ lo nkamba olimu w’ombatshi mboka wa pondjo nto!—1 Kor. 16:9.