Toyele ɛnyɛlɔ kakasha Yeso
“Lambunyusha [ɛnyɛlɔ k]a ndu nyu ntsha, uku unyutshedimi.”—JOANI 13:15.
1. Lande na kele Yeso ɛnyɛlɔ ka dimɛna kahomba Akristo mbokoya?
LO ƆKƆNDƆ w’otondo w’ana w’anto, paka onto ɔtɔi oto mbaki kosala pɛkato lo lɔsɛnɔ lande l’otondo. Onto akɔ ko: Yeso. Lâdiko wa Yeso, “nduku untu leko lahatshaka kolo.” (1 Khumi ya Dikanga 8:46; Romo 3:23) Diakɔ diɔsa Akrito wa mɛtɛ Yeso oko ɛnyɛlɔ ka kokele kahombawɔ ndjela. Lo Nisana 14, 33 T.D., yema tshitshɛ la ntondo ka nyɔi kande, Yeso ndamɛ akatɛ ambeki ande dia vɔ mbôkoya. Nde akate ate: “Lambunyusha [ɛnyɛlɔ k]a ndu nyu ntsha, uku unyutshedimi.” (Joani 13:15) L’otsho w’ekomelo ɔsɔ, Yeso akashile toho efula tahomba Akristo sala la wolo dia mbôkoya. Tayanga sɛdingola lo sawo nɛ toho tɔmɔtshi l’atei atɔ.
Ohomba wa okitshakitsha
2, 3. Lo toho takɔna taki Yeso ɛnyɛlɔ ka kokele ka okitshakitsha?
2 Etena kakakeketsha Yeso ambeki ande dia ndjela ɛnyɛlɔ kakandasha, nde aki lo tɛkɛta lo yoho ya lânde dikambo dia okitshakitsha. Lo waaso efula, nde akalake ambeki ande dia monga la okitshakitsha, ndo l’otsho wa Nisana 14, nde akɛnya okitshakitsha ande lo sola ekolo w’apɔstɔlɔ ande. Oma lâsɔ Yeso akate ate: “Ku naka dimi Khumadiondjo la Umbetsha lakanyotshisha ekulu, ndu nyu nyambuhumba mbotshanya ekulu.” (Joani 13:14) L’ɔkɔngɔ diko, nde akatɛ apɔstɔlɔ ande dia vɔ ndjela ɛnyɛlɔ kakandasha. Ɔsɔ aki mɛtɛ ɛnyɛlɔ ka dimɛna efula ka okitshakitsha!
3 Ɔpɔstɔlɔ Paulo tewoyaka dia la ntondo ka nde ndja la nkɛtɛ, Yeso ‘akasɛnaka lo efanelo ka Nzambi.’ Koko nde akayanya oma lo lotombo ndo akakome onto la tshitshɛ. Ndo nto, “ndi akayakitshakitsha, akayala la ukitanyia edja ndu lu nyoi, ee, nyoi ka l’utamba [w’asui].” (Filipi 2:6-8) Ohokanyiya dikambo sɔ yema. Yeso, onto loleki woke l’andja w’otondo oma lale Jehowa, aketawɔ dia monga l’ɛse ka andjelo, dia mbotɔ oko ɔna l’ashashi laheye ndjakokɛ, dia mbodiama ndo kitanyiya ambutshi wele bu kokele, ndo l’ekomelo ndjovɔ oko ondjakanyi. (Kolosai 1:15, 16; Heberu 2:6, 7) Ande okitshakitsha waki la nde lee! Onde onto koka mbokoya ‘dionga’ sɔ ndo monga la ‘yimba y’okitshakitsha? (Filipi 2:3-5) Eelo, koko bu dikambo dia wɔdu.
4. Akambo akɔna wakonya di’onto ndjala la lotamanya, ko lande na kele lotamanya ekɔ wâle efula?
4 Dionga diotshikitanyi l’okitshakitsha ko lotamanya. (Tukedi 6:16-19) L’ɔtɛ wa lotamanya lande, Satana akakɔshama. (1 Timote 3:6) Lotamanya monɛmaka esadi eto l’etema w’anto, ndo naka lɔ lambonɛma ekɔ wolo efula mbolinya. Anto wekɔ la lotamanya l’ɔtɛ wa wodja awɔ, lokoho lawɔ la demba, diangɔ diele lawɔ, kalasa yakawɔtɔ, awui wasalawɔ, dihole diele lawɔ lo tshunda di’anto, olangala awɔ wa demba, akoka wele lawɔ l’awui wa tɔkɛnyɔ, ndo l’ɔtɛ w’akambo akina. Koko, ndoko dikambo ɔtɔi l’atei w’akambo asɔ diele ohomba le Jehowa. (1 Koreto 4:7) Ndo naka akambo asɔ tokonyaka dia monga la lotamanya, kete vɔ nanyaka diɔtɔnganelo diele lam’asaso la nde. “Kuyanga [Jehowa] eko ladiku, ndi atukanelaka kanga ndjakitshakitsha. Keli ndi atulimbitelaka kanga utaku uma l’etali.”—Osambu 138:6; Tukedi 8:13.
Tonge l’okitshakitsha l’atei w’anangɛso l’akadiyɛso
5. Lande na kele ekɔ ohomba efula dia dikumanyi monga l’okitshakitsha?
5 Woho wasukɛso olimu waki Jehowa ndo kɛnɛ kasalaso l’olimu ɔsɔ kâmɛ ndo ɛkɛndɛ wele laso l’etshumanelo hahombe tokonya akanga wa lotamanya. (1 Ekondo 29:14; 1 Timote 6:17, 18) Lo mɛtɛ, lo yɛdikɔ yayotonga l’ɛkɛndɛ wa weke, mbayotoleka monga l’ohomba wa ndjala l’okitshakitsha. Ɔpɔstɔlɔ Petero akalake dikumanyi di’aha vɔ ‘mbahemɛ wanɛ wele sango diaki Nzambi, koko wonge bɛnyɛlɔ di’ɔlɔlɔ le ɛkɔkɔ.’ (1 Petero 5:3) Dikumanyi sɔnamaka dia monga ekambi ndo bɛnyɛlɔ, aha dia vɔ monga nkumi ndo ewandji.—Luka 22:24-26; 2 Koreto 1:24.
6. L’akambo akɔna wa lo lɔsɛnɔ l’Okristo wahombaso monga l’okitshakitsha?
6 Aha tsho dikumanyi mbahomba monga l’okitshakitsha. Petero akafundɛ ɛlɔngɔlɔngɔ wakoka monga la lotamanya l’ɔtɛ wa yimba y’osadi yele lawɔ ndo alemba wa wolo wele lawɔ lo mbaɛdika l’esombe w’anto ate: “Nyuyalotsha la ndjakitshakitsha, ne dia nkambanela, ne dia [Nzambi] atutunaka akanga w’utaku, keli atushaka wane wayakitshakitsha ngandji ka mamba.” (1 Petero 5:5) Eelo, ekɔ ohomba di’onto tshɛ monga la woho wa okitshakitsha waki la Yeso. Pombaka monga l’okitshakitsha dia sambisha lokumu l’ɔlɔlɔ, djekoleko etena kahomanaso la wendjudi kana l’ɔlɔshamelo. Pombaka monga l’okitshakitsha dia mbetawɔ dako kana dia tshikitanya lɔsɛnɔ laso dia ndeka ndjasha l’olimu w’esambishelo. Ndo nto, sho pombaka monga l’okitshakitsha, la mbetawɔ ndo la dihonga etena kakikɛso emamatanya, ɔlɔshamelo w’oma le lɛɛta kana ɛhɛnyɔhɛnyɔ wa wolo.—1 Petero 5:6.
7, 8. Naa toho tɔmɔtshi takokaso monga l’okitshakitsha?
7 Ngande wakoka onto tondoya di’aha monga la lotamanya ndo monga la ‘yimba y’okitshakitsha lo mbɔsa dia anto akina mboleka’? (Filipi 2:3) Nde pombaka ndjaɔsa woho wawɔsa Jehowa. Yeso akɛnya yoho ya dimɛna yahombaso ndjaɔsa lam’akandate ate: “Ndu nyu, lam’ayunyushidiya ntsha paka akambu tshe wakawanyosengola, kanyuti nyati: Ekambi w’anyanya mbesu. Shu tambutsha akambu waki lasu dia ntsha.” (Luka 17:10) Tatohɛke dia kɛnɛ tshɛ kakokaso sala kekɔ anyanya lo kiɛdika la kɛnɛ kakasale Yeso. Koko, Yeso aki l’okitshakitsha.
8 Ndo nto, sho koka nɔmba ekimanyielo ka Jehowa dia sho monga la kanyi ya dimɛna lo dikambo diaso shoamɛ. L’ɛnyɛlɔ k’omembi w’esambo, sho koka nɔmba ɔnɛ: “Umbetsha sambu k’ololo ndu ewu, ne dia dimi latetawoka elembe aye.” (Osambu 119:66) Jehowa ayotokimanyiya dia monga la wɛdimo lo woho wayaɔsaso, ndo ayotɔtshɔkɔla l’ɔtɛ wa okitshakitsha aso. (Tukedi 18:12) Yeso akate ate: “Untu tshe layambiya, ayukitshakitshama. Untu tshe layakitshakitsha, ayumbiyama.”—Mateu 23:12.
Tonge la kanyi ya dimɛna lo dikambo dia ɔlɔlɔ la kɔlɔ
9. Kanyi yakɔna yaki la Yeso lo dikambo dia ɔlɔlɔ la kɔlɔ?
9 Kânga mbakandasɛnɛ kâmɛ l’anto wele bu kokele ɛnɔnyi 33, Yeso ‘kosala pɛkato.’ (Heberu 4:15) Diakɔ diele, lam’akandatɛkɛtaka dikambo dia Mɛsiya, omembi w’esambo akate ate: “We atulangaka sambu k’ololo, atuhetshaka kolo.” (Osambu 45:7; Heberu 1:9) Lo dikambo sɔ nto, Akristo salaka la wolo dia mbokoya Yeso. Vɔ hawotshikitanya tsho ɔlɔlɔ la kɔlɔ; vɔ mpetshaka kɛnɛ kele kɔlɔ ndo nangaka kɛnɛ kele ɔlɔlɔ. (Amose 5:15) Kɛsɔ mbâkimanyiyaka dia ndɔshana la nsaki ya pɛkato yotɔ lawɔ.—Etatelu 8:21; Romo 7:21-25.
10. Dionga diakɔna diayotɛnya naka sho tetemala la ‘tsha kɔlɔ’ aha la ndjatshumoya?
10 Yeso akatɛ ofarisɛ Nikɔdɛmo ate: “Untu tshe latutshaka kolo, atuhetshaka yanyi. Ndi hatuyakaka lu yanyi, watukûtshumuya dia etsha andi. Keli untu tshe latutshaka akambu wa mete, atuyakaka lu yanyi, ne dia etsha andi wenami vati: Wakatshama le [Nzambi].” (Joani 3:20, 21) Ohokanyiya: Joani akate dia Yeso ekɔ ‘osase wa mɛtɛ wahɛtɛ weho tshɛ w’anto.’ (Joani 1:9, 10) Diakɔ diakate Yeso dia naka sho tetemala la ‘ntsha kɔlɔ,’ mbut’ate akambo wa kɔlɔ, wahetawɔma le Nzambi, kete tekɔ lo mpetsha osase. Ohɔsa di’onto ambohetsha Yeso ndo ɛlɛmbɛ ande. Ngasɔ mbasala anto etena katetemalawɔ sala pɛkato aha la ndjatshumoya. Ondo vɔ hawɔfɔnya dia wekɔ lo mpetsha Yeso ndo ɛlɛmbɛ ande, koko lo mɛtɛ, Yeso mbɔsaka dia vɔ wekɔ lo mbohetsha ndo wekɔ lo mpetsha ɛlɛmbɛ ande.
Woho wa monga la kanyi yaki la Yeso lo kɛnɛ kendana la ɔlɔlɔ la kɔlɔ
11. Kakɔna kele ohomba naka talanga monga la kanyi yaki Yeso lo kɛnɛ kendana la ɔlɔlɔ la kɔlɔ?
11 Sho pombaka monga la eokelo ka dimɛna ka woho wɔsa Jehowa kɛnɛ kele ɔlɔlɔ la kɛnɛ kele kɔlɔ. Paka oma lo wekelo w’Ɔtɛkɛta wa Nzambi, mbut’ate Bible mbakondjaso eokelo kɛsɔ. Lam’asalaso wekelo ɔsɔ, sho pombaka nɔmba woho wakalɔmbɛ omembi w’esambo ɔnɛ: “Unimbitshiya esese aye, we [Jehowa]!” (Osambu 25:4) Koko tatohɛke dia Satana ekɔ okesanyi. (2 Koreto 11:14) Le Okristo wele bu la kɛsɔ, nde mbeyaka sala la mayɛlɛ dia kɛnɛ kele kɔlɔ mɛnama diele oko tɔ kɛkɔ ɔlɔlɔ. Diakɔ diele sho pombaka kana yimba efula la kɛnɛ kekaso ndo kitanyiya dimɛna alako w’oma le ‘ɔhɔmbɔ wa kɔlamelo ndo wa kɛsɔ.’ (Mateu 24:45-47) Wekelo, dɔmbɛlɔ, ndo kana yimba la kɛnɛ kekaso ayotokimanyiya dia sho tshunda ndo monga l’atei wa wanɛ “wambekela, la wambuyala la tumba ta ntshikitanya ololo la kolo.” (Heberu 5:14) Oma lâsɔ mbayotokoka mpetsha kɛnɛ kele kɔlɔ ndo nanga kɛnɛ kele ɔlɔlɔ.
12. Dako diakɔna dia lo Bible diatokimanyiya di’aha sala akambo wanyema l’ɛlɛmbɛ?
12 Naka sho mpetsha kɛnɛ kele kɔlɔ, kete hatotetawɔ dia nsaki y’akambo wa kɔlɔ pama l’etema aso. Ɛnɔnyi efula l’ɔkɔngɔ wa nyɔi ka Yeso, ɔpɔstɔlɔ Joani akafunde ate: “Tanyulangaki akambu wa la kete kuyanga diango dia la kete. Naka untu alanga akambu wa la kete, ku ngandji ka Shesu kema l’utema andi. Ne dia akambu wa la kete, saki ka dimba, ndu saki ka ashu, ndu utaku a lumu, vo waha uma le Shesu, keli weko uma la kete.”—1 Joani 2:15, 16.
13, 14. a) Lande na kele ngandji k’akambo wa l’andja ɔnɛ ekɔ wâle le Akristo? b) Ngande wakokaso mbewɔ di’aha nanga akambo wa l’andja ɔnɛ?
13 Anto amɔtshi mbeyaka monga la kanyi y’ɔnɛ aha akambo tshɛ wele l’andja mbele kɔlɔ. Oyadi kânga ngasɔ mbediɔ, andja ndo akambo wa lɔkɔ wakotola mbeyaka esadi eto mbekola timba taso di’aha sho tetemala kambɛ Jehowa. Ndo ndoko ɛngɔ katondja andja ɔnɛ kakoka tosukanya efula la Nzambi. Ɔnkɔnɛ, naka sho pamia ngandji k’akambo wa l’andja, oyadi akambo wakoka monga ko bu kɔlɔ, kete tayoyadja lo wâle. (1 Timote 6:9, 10) Lâdiko dia lâsɔ, akambo efula wa l’andja ɔnɛ wekɔ mɛtɛ kɔlɔ ndo vɔ koka tolanya. Naka sho mendaka filmɛ kana emisiɔ wa lo televiziɔ walekawɔ mɛnya awui wa ngala, eyango wa lomombo la l’emunyi, kana awui wa mindo wa dieyanelo, sho mbeyaka ndjokoma lo mbetawɔ akambo asɔ ko l’ɔkɔngɔ diko vɔ ndjonga ohemba le so. Naka sho mbekesanɛ l’anto waleka ndjasha paka dia nyanga yoho ya lɔsɛnɔ ya dimɛna kana pamia awui awɔ w’okanda, kete awui asɔ mbeyaka ndjonga akambo woleki ohomba le so.—Mateu 6:24; 1 Koreto 15:33.
14 Lo wedi okina, naka sho ngɛnangɛna l’Ɔtɛkɛta wa Jehowa, kete “saki ka dimba, ndu saki ka ashu, ndu utaku a lumu” hawototokotola efula. Ndo nto, naka sho mbekesanɛ la wanɛ wetsha wahɔ wa Diolelo lo dihole dia ntondo, kete tayonga oko vɔ, mbut’ate tayolanga kɛnɛ kalangawɔ, ndo tayewɔ kɛnɛ kewɔwɔ.—Osambu 15:4; Tukedi 13:20.
15. Oko wakidiɔ lo dikambo diaki Yeso, ngande wayotokeketshama lo nanga ɔlɔlɔ ndo lo mpetsha kɔlɔ?
15 Mpetsha kɔlɔ ndo nanga ɔlɔlɔ akakimanyiya Yeso dia mbika washo ande lo “ongenongeno wakakitshama la ntundu kandi.” (Heberu 12:2) Kɛsɔ mbeyaka monga mɛtɛ ndo le so. Sho mbeyaka dia “akambu wa la kete la saki yawo wayushila.” Ɔngɛnɔngɛnɔ tshɛ washa andja ɔnɛ wekɔ paka wa lo tshanda mɔtshi tsho. Koko, “one latutshaka lulangu la [Nzambi] atuyalaka pundju.” (1 Joani 2:17) Lam’ele Yeso akasale lolango laki Nzambi, nde akadiholɛ anto mboka ka kondja lɔsɛnɔ la pondjo. (1 Joani 5:13) Nyɛsɔ towôkoya ndo tokondja wahɔ oma l’olowanyi ande.
La ntondo k’ehemba
16. Lande na kakakeketsha Yeso ambeki ande dia mbokana ngandji?
16 Yeso akɛnya yoho kina yakahombe ambeki ande mbôkoya lo mbuta ate: “Dimi lambunyutela akambu aso, dia nyu mbukana ngandji.” (Joani 15:12, 13, 17) Ekɔ ɛkɔkɔ efula wahomba Akristo mboka anangɛwɔ l’akadiyɛwɔ ngandji. Lo dikambo sɔ, Yeso akaleke mbidja yimba lo woho wakawahombe mpetshama oma le ase andja ɔnɛ. Nde akate ate: “Naka wa la kete wambunyuhetsha, nyu mbeyaka nyati: Wakampetsha ntundu watanyuhetsha. . . . Ukambi haleki uwandji andi. Naka vo wakansuya, wayunyusuya ndu nyu.” (Joani 15:18, 20) Eelo, lo pɛnyahɛnyama, Akristo wekɔ oko Yeso. Vɔ pombaka monga la dimama dia wolo, dimama dia ngandji diahomba mbakimanyiya dia shika tanga la ntondo ka lohetsho lɔsɔ.
17. Lande na kahetsha andja ɔnɛ Akristo wa mɛtɛ?
17 Lande na kahetsha andja ɔnɛ Akristo? Nɛ dia oko Yeso, vɔ “kema wa la kete.” (Joani 17:14, 16) Vɔ wekɔ la lomangemange l’akambo w’asɔlayi ndo wa pɔlitikɛ, ndo vɔ kitanyiyaka atɔndɔ wa lo Bible, mbɔsaka lɔsɛnɔ oko ekila ndo sɛnaka lo ndjela ɛlɛmbɛ wa lâdiko wendana la lɔkɛwɔ. (Etsha 15:28, 29; 1 Koreto 6:9-11) Eyango awɔ woleki ohomba ele eyango wa lo nyuma, aha wa nyanga lomombo. Vɔ wekɔ lo sɛna l’andja, koko oko wakafunde Paulo, vɔ ‘hawoyasha tshɛ lɔkɔ.’ (1 Koreto 7:31) Eelo, anto amɔtshi mandolaka Ɛmɛnyi wa Jehowa l’ɔtɛ wa lɔkɛwɔ lawɔ la dimɛna. Koko, Ɛmɛnyi wa Jehowa hawosekola ɛlɛmbɛ dia mandɔma kana dia mbetawɔma le anto. Diakɔ diele anto wa l’andja ɔnɛ hawâmane fundo, ndo efula mbahetshaka.
18, 19. Lo ndjela ɛnyɛlɔ kaki Yeso, kakɔna kasala Akristo la ntondo ka ɔlɔshamelo ndo ɛhɛnyɔhɛnyɔ?
18 Apɔstɔlɔ waki Yeso wakɛnyi lohetsho la mamba lele l’andja etena kakandama ndo kakadiakema Yeso, ndo vɔ wakɛnyi kɛnɛ kakasale Yeso la ntondo ka lohetsho lɔsɔ. L’ekambɔ ka Ngɛtɛsɛmanɛ, atunyi w’ase ɛtɛmwɛlɔ waki Yeso wakaye ndjowonda. Petero akayange dia mbokokɛ la yɔɔmbɔ, koko Yeso akatɛ Petero ate: “Ukaluya yombo yaye lu dihusu; ne dia wane tshe wakimela yombo, wayuvo la yombo.” (Mateu 26:52; Luka 22:50, 51) Lo nshi ya ntondo, ase Isariyɛlɛ wakalɔshaka atunyi awɔ la tɔɔmbɔ. Koko, ɛlɔ kɛnɛ, akambo wambotshikitana. Diolelo diaki Nzambi “diaha dia la kete nye” ndo diɔ bu l’elelo wendana la wedja wahombadiɔ kokɛ. (Joani 18:36) Aha la mbeta edja, Petero akahombe ndjonga ɔtɔi ɔmɔtshi wa lo wodja wa lo nyuma, wodja wele anto wa lɔkɔ wayotɔsɛna l’olongo. (Ngalatiya 6:16; Filipi 3:20, 21) Tatɛ oma l’etena kɛsɔ, ambeki waki Yeso wakahombe ndɔshana la lohetsho ndo l’ɛhɛnyɔhɛnyɔ l’ɛnyɛlɔ ka Yeso, mbut’ate aha la wɔma koko lo yoho ya ki. Vɔ wakahombe tshika akambo tshɛ l’anya wa Jehowa ndo ndjaɛkɛ le nde dia nde mbasha wolo wa vɔ mbikikɛ.—Luka 22:42.
19 Ɛnɔnyi efula l’ɔkɔngɔ, Petero akayofunda ate: “Kristu akanyusuwela, akanyutshikela [ɛnyɛlɔ], dia nyu mbuyela lu wanya andi. . . . Lam’akawôtenge, ndi kumbatenga. Lam’akandasuyama, ndi kumbânela, keli ndi akayakimo le one latulumbwanyaka ololo.” (1 Petero 2:21-23) Oko wakate Yeso, aya ɛnɔnyi efula wahomana Akristo l’ɛhɛnyɔhɛnyɔ wa wolo. Oko wakidiɔ lo ntambe ka ntondo ndo lo nshi nyɛ, Akristo wekɔ lo ndjela ɛnyɛlɔ kaki Yeso ndo lo yoho ya diambo vɔ mbikikɛka akambo asɔ la kɔlamelo tshɛ, lo mɛnya dia vɔ namaka olowanyi awɔ la wɔladi tshɛ. (Enyelo 2:9, 10) Nyɛsɔ sho tshɛ tongake anto walama olowanyi awɔ la wɔladi etena kahomanaso l’ekakatanu wa wolo.—2 Timote 3:12.
“Nyolote Khumadiondjo Jesu Kristu”
20-22. Lo yoho yakɔna ‘yalɔta Akristo Nkumadiɔndjɔ Yeso Kristo’?
20 Paulo akafundɛ etshumanelo ka la Rɔma ate: “Nyolote Khumadiondjo Jesu Kristu. Tanyutshikelaki saki ya kolo dihuli lu alimba anyu.” (Romo 13:14) Akristo ndɔtaka Yeso oko dihɔndɔ. Vɔ salaka la wolo dia mbokoya waonga ndo etsha ande polo ndo lo vɔ kɛnɛmɔla waonga w’Owandji awɔ, kânga mbewɔ kema kokele.—1 Tesalonika 1:6.
21 Tayokoka ‘ndɔta Nkumadiɔndjɔ Yeso Kristo’ dimɛna naka sho mbekesanɛ la lɔsɛnɔ lande ndo sala la wolo dia sɛna woho wakandasɛnɛ. Sho mbokoyaka okitshakitsha ande, ngandji kande k’akambo w’ɔlɔlɔ ndo lohetsho lande l’akambo w’ɔlɔlɔ, ngandji kande otsha le anango, woho wakinde kondjatambiya l’akambo wa l’andja ɔnɛ ndo woho wakandakikɛ asui la solo dia lotutsha. ‘Hatototshikɛ nsaki ya kɔlɔ dihole lo alemba aso,’ mbut’ate oyango aso woleki woke hatonga wa kotsha eyango wa l’emunyi kana wa ngɛnyangɛnya nsaki yaso ya demba. Koko, etena kɔsaso yɛdikɔ mɔtshi kana kakandolaso okakatanu ɔmɔtshi, sho la dia ndjambola ɔnɛ: ‘Kakɔna kotosala Yeso lo dikambo nɛ? Kakɔna kohondolanga dimi sala?’
22 L’ekomelo, sho mbokoyaka Yeso lo ndjasha efula lo tetemala ‘sambisha lokumu l’ɔlɔlɔ.’ (Mateu 4:23; 1 Koreto 15:58) Ndo lo dikambo sɔ, Akristo ndjelaka ɛnyɛlɔ kakasha Yeso, ndo sawo diayela diayɛnya woho wayelawɔ ɛnyɛlɔ kakasha Yeso lo dikambo diakɔ.
Onde wɛ koka nembetshiya?
• Lande na ekɔ ohomba dia Okristo monga l’okitshakitsha?
• Ngande wakokaso monga la kanyi ya dimɛna lo kɛnɛ kendana la ɔlɔlɔ la kɔlɔ?
• Lo yoho yakɔna yokoya Akristo Yeso la ntondo k’ɔlɔshamelo la ɛhɛnyɔhɛnyɔ?
• Ngande wakokaso ‘ndɔta Nkumadiɔndjɔ Yeso Kristo’?
[Osato wa lo lɛkɛ 19]
Yeso akasha ɛnyɛlɔ ka kokele k’okitshakitsha
[Osato wa lo lɛkɛ 20]
Dui tshɛ dia lo lɔsɛnɔ l’Okristo, mbidja ndo esambishelo nɔmbaka dia monga la l’okitshakitsha
[Osato wa lo lɛkɛ 21]
Satana koka sala dia tɔkɛnyɔ ta kɔlɔ mɛnama oko tɔ mbetawɔmaka le Okristo