Totombole Jehowa l’ekimanyielo k’esambu aso
1 Ohofola dibuku diaye di’esambu lo dikatshi di’ekomelo. Ɛnaye na? Wa levite, olui w’amembi wele lo tempelo kaki Jehowa, wêmba l’ongenongeno, enyo hwe. Nkembo yakosaka dihole di’ohomba lo otemwelo wa pudipudi l’atei wa tempelo kaki Jehowa. Lo nshi ya nkum’ekanga Davidi, olekanyi anto 10 lo lokama a l’atei a wane wakakambeka Jehowa lo tempelo wakasonama dia mbotombola la mishiki. Ladiko dia lofulo loso, anto 288 waki amembembi wakalakanyema, “[vo, NW] tshe wakeyaka mimba ololo.” Lo mete, vo kokɛnyaka la nkembo.—1 Ek. 23:3, 5; 25:7.
2 Naka sho kadimo dia menda kene kak’ete lo tena dia Yeso, sho kondjaka wetshelo w’one: Yeso l’apostolo ande wakembe osambu omotshi l’ekomelo ka Dambo dia Nkumadiondjo. (Mako 14:26) Mbala efula, otomami Paulo tolombaka dia tombola Nzambi l’ekimanyielo ka nkembo. Onkone mbakandafunde lo Kolosai 3:16 ate: “Dui dia Kristu diadjase, diangone l’etema anyu. [Nyotetemale la mbetshanya ndo la mbewolana l’ekimanyielo ka, NW] kimbu la esambu w’ololo la wa Nyuma. Nyimbeli Unyashungu esambu la ngandji ka mamba l’etema anyu.”—Nyênde nto lo Efeso 5:19, 20.
3 Lêmbo l’esambu wa Diolelo eko otoi omotshi a l’atei a weoho wa tombola Jehowa. Onde hatokoke memba l’etema aso tshe? Naka osoku mbatshaso, kete Jehowa mbatombolaso. Oko w’okande alombelo aso, woho ako wame mbahokamende ndo esambu a wembeso. Naka sho memba la dui dia wolo, kete hatongenyangenya paka anyaso ato, koko sho kondjaka waho shoameme.
4 Tokanyia dia eteketa w’amena wa lo esambu aso. Mete, vo tokimanyiaka dia ‘sho mbetshana ndo mbewolana.’ Nde alako w’amena wele l’atei w’esambu aso lee! Naka sho mbaosa la kenemo, kete alako ako wayotokimanyia dia sho ntɔ elowa wa lo nyuma, wele naka wayonga efula le so, kete wayotokoke oma lo tosengiya ta lo demba ta andja one. Mete, ‘memba l’etema aso’ ayotokeketshaka dia kambe Jehowa l’osalosalo ndo la wangasanu.
5 Dia tatɛ sanganya la lembo, olombodi hewoya paka numɛlɔ k’osambu keto, koko ayewoya ndo ote a dui w’osambu ako. Tena dimotshi, nde kokaka nembetɛ vɛsa yele etshina ka lembo lako ndo ndjiɔmbɔla lo tshena pe ndo mɛnya diokanelo diele lasayo l’awui w’enyami.
6 Mélodies du Royaume yakimi ndo kasɛti yele l’esambu loko ndo yohomami la lɔngɔbi yeko weoho w’ololo efula wa kimanyia nkumbo kaso dia vo mbeya esambu dimena efula. Woho omotshi wa dimena wa mbekesanɛ l’esambu aso ele dia mbâlonga lo mishiki l’ololo tshe.
7 Afundelo toholaka mbala efula dia sho pombaka tombola Sheso le l’olongo, loludi la ngandji l’ekimanyielo k’esambu. Totshe dui so l’etema aso tshe. Lo sala ngaso, tayosha enyelo kele la wangasanu le anto waya dia sangana laso mbala ka ntondo. Oko akadisale Davidi nshi ya ntondo, têtawoke ndo têmbɛke Jehowa esambu.—Osam. 108:1-3.