Ekongelo Ka Losanganya L’oyoyo Lotshikitanyi La Lushi Ɔtɔi
1 Lande na kahombaso sambisha lokumu l’ɔlɔlɔ aha la mpekɔ? Akoka akɔna wahomba onto ndjâla la wɔ dia monga osambisha wa lokumu l’ɔlɔlɔ? Ngande wokoki kânga akanga a diki la tɔmɔ̂mɔma mbɔsa yɛdikɔ dia mbewoya lokumu l’ɔlɔlɔ le anyawɔ? Wembola ɛsɔ watshutshuya onto dia kana yimba ndo ekina nto wayokadimɔma lo losanganya l’oyoyo lotshikitanyi la lushi ɔtɔi lakatatɛ salema lo Lovula letshi. Lɔ lekɔ l’ɔtɛ a dui w’ɔnɛ: “Tambolowanyema dia Monga Ekambi wa Lokumu l’Ɔlɔlɔ.”—Enda lo 2 Koreto 3:5.
2 Tekɔ ekambi wa Jehowa; diɔ diakɔ diahombaso nama lɔkɛwɔ laso ɔlɔlɔ. Ɛlɔngɔlɔngɔ wayɔkɔndɔla akambo washa ekeketshelo wɛnya woho wakawashike tanga la ntondo ka shɛngiya y’asekawɔ. Ambutshi wambokeketshama la ngandji tshɛ dia mbeya ohomba wa ndowanya anawɔ dia vɔ koma ekambi wa Nzambi. Sho tshɛ tekɔ lo kondja alako wayotokimanyiya dia mpotɔ ohomba wa sambisha ndo ɛtshɔkɔ wayotokondja ndo sho ndo wanɛ watolonga.—1 Tim. 4:16.
3 Sɛlɛmɔnyi ka batismu ekɔ mɛtɛ etena k’ohomba efula ka lushi lakɔ. Koko la ntondo ka dikambo sɔ, wayosha dako dimɔtshi dia lo Bible diatɛwɔ djekoleko anto weke ka ndjakimɔ le Nzambi. Tena tshɛ, ampokami tshɛ nɔmbamaka dia mpokɛ lotui lo dako sɔ dialembetshiya kitshimudi ya batismu hwe. Wanɛ tshɛ walanga batizama lo losanganya lotshikitanyi la lushi ɔtɔi pombaka tewoyisha omendji-walɔmbɔla kɔ̂lɔmɔ, woho wa nde mbɔsa tɛdikɔ dia dikumanyi sɛdingola la wa kandida wembola wakasɔnama.
4 Lushi lɔsɔ layonga ndo la nyango dako diayoshama oma le ɔngɛndangɛnda. Dako sɔ, diele l’ɔtɛ a dui w’ɔnɛ: “Tambolowanyema ndo Tambokondja Akoka wa Monga Ekambi wa Nzambi,” mɛnyaka tɛdikɔ tɔnɛi ta weke tayotokimanyiya dia sho ndjalowanya oko ekambi. Ndo ɛkɔndɔ washa ekeketshelo wayɔkɔndɔma.
5 Toyalɔngɔsɔlɛ oma ko kakianɛ dia mboka alako tshɛ (onyake kana takashile la mboka). Tatohɛke mbelɛ anto wayasha lo Bible dia vɔ lawɔ kondja ɛlɔlɔ w’oma lo lushi lɔsɔ la wetshelo wa Teokrasi. Ɔsɔku mbayotonga l’eshikikelo ka ‘ndowanyema’ oko weso ekambi wa lokumu l’ɔlɔlɔ.