Losanganya La Distrikɛ 1996—otshikitanu
1 Ekɔ mɛtɛ ɔngɛnɔngɛnɔ w’efula dia monga lawɔ lo afɛstɔ wa lo nyuma, oyadi lo nsanganya ya l’etshumanelo kana y’otshimbedi, lo nsanganya yotshikitanyi ya lushi ɔtɔi kana ya distrikɛ. Lande na ɔsɔku? Nɛ dia, diɔtɔnganelo dia l’anto woka Nzambi wɔma mbelaka ekeketshelo ndo asawo wa lo nyuma washama lo tena diakɔ toholaka akambo woleki ohomba.
2 L’ɛnɔnyi wetshi ɛnɛ, anto nunu wakasangana la so lo nsanganya shɔ ya lo nyuma ndo vɔ wokôngaka nshi tshɛ nyemba nyemba dia ntsha ɔnkɔsɔ. L’asa 1985 la 1995, lofulo la tshumanelo lakadɛ oma lo 49716 polo 78620. Lam’ele Jehowa ekɔ lo tasalanganya olimu w’otshumanyelo, pombaka nɔngɔsɔla nsanganya efula ya distrikɛ la y’otshimbedi. (Isaya 60:22) Paka l’ɛtshi kaso ka nkɛtɛ keto, sho kokaka mɛna woho watadɛ lofulo la tshumanelo la diambo tshɛ lo ndjela lofulo la nsanganya ya distrikɛ: nsanganya 35 yakasalema lo 1995, koko lo 1985 aki 18. Olimu w’ohomba wakambema dia nɔngɔsɔla nsanganya shɔ tshɛ ndo dia yɔ mbeta dimɛna tadɛka paka mbudɛ tsho. Lam’ele sho sanganaka dia kondja wahɔ w’oma lo difɛstɔ dia lo nyuma, ekɔ dikambo dia lomba dia mbela otshikitanu lo yoho yakoka lo kɛnɛ k’endana l’elimu wa l’emunyi wasalema.
3 Pombaka Mbɔsa Tɛdikɔ t’Eyoyo: Tekɔ lo nyanga ɔtshɔkɔ wa Jehowa nɛ dia hatokalola ɛkɔngɔkɔngɔ. Tekɔ l’ɔngɛnɔngɛnɔ dia mɛna ɔnɛ Jehowa mbishaka ekambi ande lomba la yimba yewɔ l’ohomba. Sho pombaka mbeya ɔnɛ oma lo tshimbo y’ɔhɔmbɔ wa kɔlamelo ndo wa kɛsɔ mbalɔmbɔla Yeso Kristo olimu l’ɔkɔmi tshɛ, woho wa sangwelo diaki Jehowa kotshama la diambo di’efula. (Mat. 24:45-47; Kol. 1:9, 10) Ɔnkɔnɛ, Olui Walɔmbɔla ambɔsa yɛdikɔ nyɛ yayela, yanyewoyaso: Tatɛ oma lo nsanganya ya distrikɛ 1996, nsanganya y’otshimbedi ndo yotshikitanyi ya lushi ɔtɔi ya lo Lovula 1996, diangɔ dia ndɛ kana kafeteria hoyala nto. Onto l’onto ayohombaka mbela mbo ya ndɛ ndo ya nɔ.
4 Etshikitanelo Wakatalongamɛka: L’edja k’ɛnɔnyi wakatakatɛka tangangɔ tɔmɔtshi ndo wakatakahanyaka, akɛnama dia diangɔ efula kema ohomba. Olimu wakakambemaka l’otema ɔtɔi oma le wanɛ wakayakimɔka la lolango wekɔ ohomba efula; mɛtɛ, vɔ sunganaka mbokama losaka. Koko oma ko kakianɛ, diɛsɛ oma l’otshikitanu w’oyoyo wambɔtɔ, nunu di’anangɛso l’akadiyɛso wanɛ wakela ekimanyielo kawɔ lo kɛnɛ k’endana la kɛndjakɛndja mituka, somba diangɔ, katɛ, toma ndo kahanya mbo ya ndɛ, wayokondja diaaso dia mbetsha wenya awɔ l’eweso ekina wa Teokrasi w’ohomba, ndo djekoleko dia vɔ mbɔtɔnganɛ kana sawola l’anangɛwɔ lam’asalema nsanganya ya weke. Lo wedi okina, wanɛ wayasha la lolango wakakambaka l’olimu wa mbo ya ndɛ wayokoka mbisha lonya l’elimu ekina, oko ɛnyɛlɔ, olimu w’olongwelo ndo wa mbidja pudipudi (entretien). Ɔnkɔsɔ mbayâmɔ wotsho w’onto l’onto ndo honga nto ohomba w’anto efula wayasha la lolango kamba olimu polo ndo la dikɔlɔ di’otsho kana tatɛ kamba la lɔkɛsɛ, kana lo wonya wa losanganya, oko akadiatshamaka l’olimu wa mbo ya ndɛ.
5 Tosuke Tɛdikɔ Tɔsami: Anangɛso l’akadiyɛso, la Société nyokaka losaka efula oma l’osukɔ wa l’“utema otoi” wakanyasukɛ tɛdikɔ takɔsama dikambo dia nsanganya, kâmɛ ndo tɔnɛ t’endana l’olimu wa mbo ya ndɛ l’edja k’ɛnɔnyi l’ɛnɔnyi. (1 Ek. 29:9) Tamu kema di’anangɛso l’akadiyɛso wakakambe la lolango lawɔ ndo l’etema w’ɛlɔlɔ, wɛnya lowando lawɔ oma l’etsha, wayotetemala monga la woho wa yimba ya ngasɔ.—Tuk. 11:25; Luka 16:9.
6 Woho wa Sala dia Ndɛ Yangɔ: Nɛ dia otshikitanu w’oyoyo wambosalema, nkumbo yayohombaka ndjayangɛ vamɛ, kɛnɛ kayonga la wɔ ohomba dia ndɛ la midi lo wonya wa diomuyelo. Sho ndeka mbɔsa ɛlɔlɔ wakondjaso oma lo ekongelo ka lo nyuma la nɛmɔ di’efula. Honga dui dia tshundju le so naka tayɔsa olelo wa l’emunyi la nɛmɔ dia tshambandeko. Lo dikambo sɔ, ekɔ ohomba efula di’onto l’onto ‘mbidja akambo woleki ohomba lo yimba yande.’ (Fil. 1:9, 10a) Tayɛna shate: naka tayɔlɛ diangɔ di’esadi, kete tayodjaka yambalo ɔlɔlɔ ndo tayokondja wahɔ efula oma l’ekongelo ka l’ɔkɔngɔ a midi. Diɔ diakɔ diele, onto l’onto pombaka mbela olelo w’osadi koko washa demba wolo. Oko ɛnyɛlɔ, tôhɔ dia, lam’akandalesha elui w’anto, Yeso akawasha paka weoho ehende wa mbo ya ndɛ eto: mapa la nse.—Mat. 14:16-20; enda lo Luka 10:42a.
7 Diomuyelo dia la midi hadiotoviyaka nto oko akidiɔ lo nsanganya yetshi. Koko, etena kayonga efula dia ndɛ yangɔ y’osadi ndo ka mbɔtɔnganɛ kana sawola lam’asaso la ntondo ka etenyi ka losanganya ka l’ɔkɔngɔ a midi tatɛ. Anangɛso l’akadiyɛso wadjasɛ l’esomba wasalema losanganya, kana wele lo ngelo yosukanyi, ndo wakalola lawakawɔ l’akɔlɔ tshɛ, hawotonga l’okakatanu wa katɛ diangɔ dia ndɛ di’ose nkumbo tshɛ. Kokaka ntsha oko atowɔlɔngaka ana watshɔ la kalasa l’ekate, elowa, biscuits ndo yangangɔ ya nɔ. Diangɔ sɔ mbatɔlɛkaka anto efula l’ahole awɔ w’elimu.
8 Mbokɛmaka hwe dia hoyala dikambo dia wɔdu le angɛndangɛnda woye oma l’amakina. Vɔ pombaka tâkani dia kɛnɛ kayowoyɔlɛ la midi. Amɔtshi wayɛna ɔnɛ olelo w’osadi wokatemi l’akatshikatshi ndo l’elowa ayɛdima la wɔ ndo wayokoka ndja la mbo yayoyonga ohomba le wɔ oma lawakawɔ. Ondo ayokokaka nto tasombaki yangangɔ ya ndɛ lo lobingu la l’osomba wayosalema losanganya.
9 Lam’ele dihole tshɛ diasalema losanganya pilɔka Mbalasa ka woke ka Diolelo, ayonga dui dia lomba di’aha piloya dihole diakɔ oko edye k’ɔlɛmwɛlɔ kana ka dishi lo wonya wa diomuyelo dia la midi. Oko wahatale diangɔ wonya wa nsanganya, woho akɔ wamɛ mbahatatɔlɛ kana nɔ wonya wasalema losanganya la woke. Hawotosha anto dikimɔ dia vɔ mbela tosakasaka t’ehonde w’ashi a tshitshi lo dikambo dia nkumbo k’otondo l’ahole wa losanganya. Vɔ kokaka monga wâle, ndo ndjiha ɛsɛsɛ weteta anto kana kitshama l’ahole wahomba anto mbidjasɛ. Ayoleka dimɛna mbidja mbo ya ndɛ yayonyela dia ndjɔlɛ la midi lo atapa wa plastikɛ kana wa kartɔ. Naka ohomba wekɔ, kete onto kokaka ndja la hionde ya shekaseka y’ashi a tshitshi yakokande mbidja la tshina di’okala wodjashinde. Aha ndjikitsha l’okala. L’ekomelo, tambonyohola dia ɔnwɛlɔ wa wanu a wolo (vinyɔ, biɛlɛ, ndo weoho ekina) hasungana lo losanganya l’Akristo.
10 Pombaka nto menda weoho w’ehonde l’akɔhɔ wayonyɛmba otsha l’ahole wayosalema losanganya. Nyu kokaka mɛmba wa tɛrmusɛ dikambo dia nɔ̂nɔ dia dja. Weoho tshɛ w’elangi kana akɔhɔ wa talatala wekɔ wâle. Vɔ shimbamaka l’ahole efula wa losanganya. Naka wanu wa pɛ wodjishawɔ l’atapa wa plastikɛ kana wa aluminium mbosombinyu ndo wahahike dia paka kitshama lo dihole dia lânde, kete ayoleka dimɛna nyu mangola l’ɛlɔndɔ wahôlɛ wakokanyu kitsha la tshina di’ekala wodjashinyu.
11 Ɛlɔlɔ Ekina: Tamboshihodia di’otshikitanu w’oyoyo ɔsɔ ekɔ dui dia lomba. Sho tshɛ tayokoka mbahɛ yambalo yaso tshɛ l’akambo wa lo nyuma wayowotaka l’alako, dui sɔ mbele ɔkɔkɔ wa mɛtɛ wasalema nsanganya. Sho kondjaka ɛlɔlɔ oma lo woho wɔtɔnganɛso l’anangɛso ndo l’akadiyɛso, kâmɛ ndo ɛlɔlɔ watomba oma lo ekongelo ka losanganya. Omalɔkɔ, lo dihole dia tombaka oma lo dihole diasalema losanganya etena ka diomuyelo dia la midi woho watoyanga yangɔ ya ndɛ, ndeka ɔlɔlɔ ndja la diangɔ diayonga la so ohomba. Ɔsɔku mbayotetsha wenya efula kâmɛ la anyaso Akristo ndo hatotohandja ndoko dako diayoshama lo etenyi ka losanganya ka l’ɔkɔngɔ a midi.
12 L’ɔkɔngɔ wa keketshama dimɛna lo nyuma, ondo anto amɔtshi, kâmɛ la nkumbo yawɔ ndo angɛnyi awɔ, wayolanga mɛngɔla kâmɛ lo diwotɔ etena kɛmɔtshi ndo kɛtshanya lo dikambo di’awui wakawuki la yanyi etena kewɔ lo ndɛ yangɔ mɔtshi yakeketsha demba lo rɛstora ɔmɔtshi kana lo cafétéria. Ondo wanɛ wele l’akoka wayolanga kalola lawakawɔ dia ntɔlɛ oko atowosalaka nshi kina.
13 Mɛtɛ, sho tekɔ l’ɔngɛnɔngɛnɔ efula dia monga l’alambo wa lo nyuma wa ngasɔ, mbuta ate: nsanganya ya weke. Sho tolongolaka ekanda w’eyoyo lɛkɔ, wetshelo wa djembi ndo alako w’amɛna efula. Ɔsɔ mbele ɛlɔlɔ watotôhɔka sho tshɛ. Tekɔ nto l’ɔngɛnɔngɛnɔ wa tanema l’atei w’ekambi wa Nzambi ekina. Tukedi 10: 22 mbutaka ɔnɛ: “Otshoko wa [Jehowa, NW] mbatongonyaka. Ndi hataheka lunyangu ladiku diawo.” Ɔsɔku mbediɔ nɛ dia, sho, ekambi wa Jehowa, hatɔtɔ lo nsanganya ya weke l’oyango wa paka monga la mbo ya l’emunyi efula, kana wa nyanga ɔngɔnyi aso. Naka sho ntshɔ̂ka lo nsanganya yakɔ, kete la saki k’oshika ka tokondja ɛlɔlɔ wa lo nyuma lam’asanganaso, ndo Jehowa tofutaka dimɛna di’efula lo menda woho wa yimba yɛnyaso.—1 Tim. 6:6-8; Heb. 11:6.
14 Nsanganya ya weke yekɔ tena di’ekeketshelo diatohola lɛnɛ ambotokoma lo dinela dia lo nyuma. (Joa. 4:35, 36) Dibuku di’Isaya tshapita 54 mimɛka la leeta lɔnɛ l’etawɔ ɔlɔngɔswamelo waki Jehowa wele oko omoto lotshukami, leeta la ndjalɔngɔsɔla woho wa mɛna ehamelo k’ɔngɛnɔngɛnɔ. Oko wakatâditshi Isaya, ɔlɔngɔswamelo akɔ wakalongamɛka dia nyomohama, diangana ndo sɛnaka oma l’ekimanyielo ka wolo w’oyoyo: “Okokole luudu laye la dipema. Unanule apema wa mvudu yaye, tuhekoki. Utaluli ekodi ndu ushikike dikoho dia luudu laye, ne dia [wɛ] ayudiangana lu lunya la pami ndu lu lunya la lomoso.” Ekotshamelo ka pɔlɔfɛsi ka diambo kɛsɔ mɛnamaka ɛlɔ kɛnɛ l’ohamelo wa diambo w’ɔtɛmwɛlɔ wa pudipudi.—Is. 54:1-4.
15 Eelo, otshikitanu w’oyoyo wambosalema ekɔ djembetelo y’ekanelo ka yimba. Ampokami tshɛ wayokoka kondja ɛlɔlɔ w’oma l’ekongelo ka lo nyuma kakalɔngɔswama lam’ayosalema nsanganya ya weke aha l’awui efula mbaekola yimba. Tambetawɔ shate: Jehowa ayɔtshɔkɔla tɛdikɔ tɔnɛ, nɛ dia tɔ tayotokimanyiya dia ntokomɛ ehamelo. Naka tayodjaka yimba l’akambo w’ohomba, kete tayokondja ɛlɔlɔ efula lo nshi yayotetsha kâmɛ l’anangɛso ndo akadiyɛso, ndo tayɔngɔna lo nyuma. Tekɔ lo nɔmba Jehowa dia nde tshɔkɔla weolo tshɛ watetemalaso la mbidja dia sho ndja a ndjɔlɛ lo mɛsa waki Jehowa.—Enda lo Euhwelu k’Elembe 16:14, 15.
[Caption on page 4]
[Box on page 4]
Ɛlɔlɔ Watomba oma lo Wonyelo w’Olimu wa Mbo ya Ndɛ
◼ Lotumu kema efula la ntondo ka losanganya, l’etena kasalemalɔ ndo l’ɔkɔngɔ alɔ, dui diatokimanyiya dia sho kondja ɛngɛnɔngɛnɔ watomba oma l’osanganelo wa l’anangɛso ndo akadiyɛso.
◼ Ndoko ehomɔ kɛmɔtshi kahomba nɔngɔswama dikambo di’olimu wa mbo ya ndɛ.
◼ Anto efula kokaka kondja ɛlɔlɔ tshɛ oma l’ekongelo ka lo nyuma.
◼ Anto efula wayasha la lolango wayɛnama dia kamba elimu ekina.
◼ Wenya efula wayokondjama dia ndjasha l’eweso ekina wa Teokrasi.
Kɛnɛ Kakokaso Tɔla dia Tɔlɛ
◼ Olelo w’osadi, w’aha ɔnɛ wamɛnyi ndo washa demba wolo.
◼ Elowa, mapa.
◼ Ehonde w’ashi a tshitshi wa tosekaseka, naka ohomba wekɔ.
◼ Wanu wa pɛ, ashi w’elowa la ashi lo diangɔ diaholɛ.
Kɛnɛ KAHATAKOKE Tɔla l’Ahole wa Losanganya
◼ Wanu wa kandji kana alkɔlɛ.
◼ Ehonde kana akɔhɔ wa talatala.
◼ Tosakasaka t’ehonde w’ashi a tshitshi dikambo dia nkumbo.