Ko e Tui ki ha ʻOtua ʻOku ʻIkai Nai Ke Tau ʻIloʻi
KO E toko ua mei he kakai ʻe toko tolu ʻi Siamane ʻoku nau tui ki he ʻOtuá. Neongo ia, ʻi he taimi naʻe ʻeke ai ki ha faʻahinga laka hake he toko taha afé ki hano fakamatalaʻi ʻo e ʻOtua ʻoku nau tui ki aí, ko e meimei tokotaha kotoa pē naʻá ne ʻomai ha tali kehekehe. “ʻOku maʻu ʻe he kakai Siamané ʻa e ngaahi tui tāutaha ki he ʻOtuá ʻoku kehekehe ʻo tatau tofu pē mo e kakaí tonu,” ko e līpooti ia ʻa e makasini ongoongo ko e FOCUS. Lolotonga ʻoku fakaongoongoleleiʻi ʻa e tui ki he ʻOtuá, ʻikai ko ha meʻa fakaʻofa ia ke tui kiate ia ʻo ʻikai ʻiloʻi pe ko e tokotaha fēfē ia?
Ko e veiveiua ko eni fekauʻaki mo e natula pe ko e tokotaha ko e ʻOtuá ʻoku maʻu ia ʻo ʻikai ʻi he ngaahi kauʻāfonua pē ʻo Siamané; ʻoku hoko ia ʻi he ngaahi feituʻu kehe ʻi ʻIulope. Ko ha savea naʻe fakahoko ʻi ʻAositulia, Pilitānia, mo e ʻOtu Netalení naʻe fakahaaʻi ai ʻa e loto-tatau mafolalahia ko e ʻOtuá ko “ha mālohi māʻolunga ange pe ko ha fakapulipuli taʻealafakamatalaʻi.” ʻOku tautefito ʻi he lotolotonga ʻo e toʻutupú, naʻa mo e ʻi he lotolotonga ʻo e faʻahinga ʻoku tui kiate iá, ʻa ʻene hoko ko ha misitelí.
ʻOkú Ke ʻIloʻi Fakafoʻituitui ʻa e ʻOtuá?
ʻOku ʻi ai ha fuʻu faikehekehe ʻi hono ʻiloʻi ʻo ha taha mo hono ʻiloʻi fakafoʻituitui iá. Ke ʻiloʻi ha taha—ko ha tuʻi ʻi ha feituʻu mamaʻo, ko ha ʻatelita tuʻu-ki-muʻa, ko ha sitā faiva—ko e lāuʻilo pē ia ʻokú ne ʻi ai. Kae kehe, ke ʻiloʻi fakafoʻituitui ha taha, ʻoku ʻuhinga iá ki he meʻa lahi ange. ʻOku kau ki ai ʻa e maheni mo e anga, ʻulungaanga, ongoʻi, saiʻia mo e fehiʻa, pea mo e ngaahi palani ki he kahaʻú ʻa e tokotaha ko iá. Ke ʻiloʻi fakafoʻituitui ha taha ʻoku fakaʻatā ai ʻa e hala ki hono maʻu ha vahaʻangatae fekoekoeʻi mo ia.
Ko e laui kilu ʻo e faʻahinga tāutaha kuo nau fakaʻosiʻaki ko hono maʻu pē ha fakakaukau fakaʻalongaua fekauʻaki mo e ʻOtuá—pe ko hono ʻiloʻi pē iá—ʻoku ʻikai ke feʻunga. Kuo nau fakalakalaka lahi ange ʻaki ʻa e hoko ʻo ʻiloʻi lelei ʻa e ʻOtuá. Kuo nau ʻiloʻi ʻoku ʻaonga ia? Ko ha tangata ko hono hingoá ko Paul, ʻa ia ʻoku nofo ʻi Siamane Tokelau pea naʻá ne kiʻi tui ʻi ha taimi ki he ʻOtuá, naʻá ne fili ke hoko ʻo maheni fakafoʻituitui lelei ange mo Ia. ʻOku fakamatala ʻa Paul: “Ko e hoko ʻo ʻiloʻi lelei ʻa e ʻOtuá ʻoku fiemaʻu ki ai ʻa e taimi mo e feinga, ka ko e ngaahi olá ʻoku māʻolunga. Ko hono maʻu ha vahaʻangatae vāofi mo e Tokotaha-Fakatupú ʻokú ne ʻai ʻa e moʻui fakaʻahó ke toe lelei ange.”
ʻOku mahuʻinga ʻa e taimi mo e feinga ʻoku fiemaʻu ke hoko ai ʻo ʻiloʻi lelei ʻa e ʻOtuá? Kātaki ʻo lau ʻa e kupu hoko maí.
[Fakamatala ʻi he peesi 3]
ʻOku ʻi ai ha fuʻu faikehekehe ʻi hono ʻiloʻi ʻo ha taha mo hono ʻiloʻi fakafoʻituitui iá