ʻUnuʻunu Ofi ki he ʻOtuá

ʻOkú Ne Fakasio ʻa e Leleí

1 TUʻI 14:13

“ʻOKU hakule ʻe Sihova ʻa e loto kotoa pe, pea ʻoku ne ʻafioʻi kotoa pe ʻa e ngaahi fakakaukau.” (1 Kalonikali 28:9) Ko e ngaahi lea fakamānavaʻi ko iá naʻe fakataumuʻa ia ke fakafonuʻaki kitautolu ʻa e houngaʻia ki he loloto ko ia ʻo e mahuʻingaʻia ʻa Sihova ʻia kitautolú. ʻOku fakasio ʻa Sihova ki he lelei ʻi hotau ngaahi lotó neongo ʻoku tau taumamaʻo mei he haohaoá. ʻOku hā mahino eni heʻene ngaahi lea fekauʻaki mo ʻApaia, ʻa ia ʻoku maʻu ʻi he 1 Tuʻi 14:13.

Naʻe nofo ʻa ʻApaia ʻi ha fāmili fulikivanu. Ko ʻene tamaí, ʻa Selopoame, ko e ʻulu ia ʻo ha fāmili tafoki mei he moʻoní.a Naʻe fakataumuʻa ʻa Sihova ke fakaʻauha fakaʻaufuli ʻa e fale ʻo Selopoamé, “hange ko e tafi kinohaʻa, kaeʻoua ke ʻosiʻosingamalie.” (1 Tuʻi 14:10) Ka naʻe tuʻutuʻuni ʻe he ʻOtuá ko e mēmipa pē ʻe taha ʻi he fāmili ʻo Selopoamé, ʻa ʻApaia—ʻa ia naʻá ne puke lahi—ʻe fai hano tanu fakalelei.b Ko e hā hono ʻuhingá? Naʻe folofola ʻa e ʻOtuá: “ʻI he fale ʻo Selopoame kuo ʻilo ai haʻane lelei kia Sihova ko e ʻOtua ʻo Isileli.” (1 Tuʻi 14:1, 12, 13) Ko e hā ʻoku tala mai kia kitautolu ʻe he ngaahi lea ko eni fekauʻaki mo ʻApaiá?

ʻOku ʻikai lave ʻa e Tohi Tapú ia ʻo pehē ko ʻApaiá ko ha tokotaha lotu faitōnunga ʻa e ʻOtuá. Ka, naʻe ʻi ai pē ha kiʻi lelei ʻiate ia. Ko e lelei ko ení naʻe kaunga lelei ia “kia Sihova,” ʻi he fekauʻaki nai mo ʻEne lotú. ʻOku fakahuʻunga ʻe he kau hiki-tohi faka-Lāpaí ʻo pehē ko ʻApaiá naʻá ne fai ha fononga fakapilikimi ki he temipale ʻi Selusalemá pe naʻá ne toʻo ʻa e kau leʻo naʻe fokotuʻu ʻe heʻene tamaí ke taʻofiʻaki ʻa e kau ʻIsilelí mei heʻenau fononga ki Selusalemá.

Neongo pe ko e hā ʻa e meʻa tonu naʻe hokó, naʻe taau ke fakatokangaʻi ʻa e lelei ʻa ʻApaiá. ʻUluakí, naʻe fai loto-moʻoni. Ko e lelei ko ení naʻe “ʻilo ai”—ʻa ia, ʻi hono lotó. Ko hono uá, naʻe kiʻi makehe. Naʻe fakahaaʻi ʻe ʻApaia ʻa e lelei ko ení neongo naʻá ne “ʻi he fale ʻo Selopoame.” ʻOku pehē ʻe he mataotao ʻe taha: “ʻOku taau ke fakaongoongoleleiʻi lahi ʻa e tangatá ʻi heʻenau tauhi maʻu ʻenau ʻulungaanga leleí lolotonga ia ʻenau nofo ʻi he ngaahi feituʻu mo ha ngaahi fāmili kovi.” ʻOku toe pehē ʻe ha taha ko e lelei ʻa ʻApaiá naʻe “hā mahino . . . , ʻo hangē pē ko e ulo ngingila ange ʻa e ngaahi fetuʻú ʻi he taimi ʻoku fakapoʻuli ai ʻa e langí, pea mo e fakaʻofoʻofa ange ʻa e ʻulu sitá ʻi he taimi ʻoku fakatōlau ai ʻa e ʻuluʻakau takatakaí.”

Ko e meʻa mahuʻinga tahá, ko e ngaahi lea ʻi he 1 Tuʻi 14:13 ʻoku akoʻi ai kitautolu ki ha meʻa fakaʻofoʻofa fekauʻaki mo Sihova pea mo e meʻa ʻokú ne fakasio ki ai ʻia kitautolú. Manatuʻi naʻe “ʻilo” ha lelei ʻia ʻApaia. Naʻe hakule moʻoni ʻe Sihova ʻa e loto ʻo ʻApaiá kae ʻoua kuó Ne maʻu ai ha lelei. ʻI hono fakahoa atu ki hono fāmilí, ko ʻApaiá, hangē ko ia ko hono fakamatalaʻi ʻe ha mataotao ʻe taha, naʻá ne hoko ko ha foʻi mataʻitofe “ʻi ha fokotuʻunga maka fuopotopoto.” Naʻe fakamahuʻingaʻi ʻe Sihova ʻa e lelei ko ení pea naʻá ne fakapaleʻi ia, ʻo ʻoange ha meesi ki he mēmipa ʻe taha ko eni ʻo ha fāmili fulikivanu.

ʻIkai ʻoku fakatupu tuipau ke ʻilo ʻoku fakasio ʻa Sihova pea ʻokú ne fakamahuʻingaʻi ha lelei ʻia kitautolu neongo ʻetau ngaahi taʻehaohaoá? (Sāme 130:3) Ko hono ʻiloʻi ení ʻoku totonu ke ne ueʻi kitautolu ke tau ʻunuʻunu ofi ange ai kia Sihova, ʻa e ʻOtua ʻokú ne hakule hotau lotó ʻo kumi naʻa mo ha kiʻi lelei ʻi ai.

[Fakamatala ʻi lalo]