Fakautuutu ʻa e Ongoʻi Tuēnoá ʻi Māmani Lahi​—ʻE Lava Fēfē Ke Ke Fekuki mo Ia?

• “Ko e vaeua ʻo e kakai lalahi ʻi ʻAmeliká ʻoku līpooti ʻo pehē ʻoku nau hokosia ʻa e ongoʻi tuēnoá, pea ko e lahi taha ʻo e faʻahinga ko iá ko e toʻutupu.”​—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

• “Naʻe fanongonongo ʻe he Kautaha Moʻui ʻa Māmaní kuo vaheʻi ha faʻahinga ke nau tokangaʻi pea fekumi fekauʻaki mo e ongoʻi tuēnoá ko ha palopalema ia ʻi he moʻuí ʻoku fiemaʻu fakavavevave, ke fakalototoʻaʻi ʻa e kakaí ke nau tokangataha ki hono fakatupulekina ha vahaʻangatae mo e niʻihi kehé pea fekumi ki ha ngaahi founga ʻoku lelei ange ki hono tokangaekina ʻa e faʻahinga ʻoku ongoʻi tuēnoá ʻi he ngaahi fonua kotoa pē, ʻo tatau ai pē pe ʻoku masiva fēfē ʻa e fonua ko iá.”​—Kautaha Moʻui ʻa Māmaní, Nōvema 15, 2023.

ʻOku ʻomai ʻe he Tohi Tapú ʻa e faleʻi ʻaonga ke tokoniʻiʻaki kitautolu ke fakatupulekina ha vahaʻangatae lelei mo e niʻihi kehé ke ʻoua te tau ongoʻi tuēnoa.

Ongo tefitoʻi moʻoni Fakatohitapu ʻe lava ke tokoní

Fakasiʻisiʻi ʻa e ngaahi meʻa ʻokú ne fakamavaheʻi koe mei he niʻihi kehé. Kau ai ʻa e ngaahi meʻa hangē ko hono ngāueʻaki tōtuʻa ʻa e mītia fakasōsialé. ʻI hono kehé, kumi ki ha ngaahi founga ke feohi ai mo e kakaí pea ʻai ha ngaahi kaungāmeʻa moʻoni.

• Tefitoʻi moʻoni Fakatohitapú: “Ko ha kaumeʻa moʻoni ʻokú ne ʻofa ʻi he taimi kotoa pē pea ko ha tokoua ia ʻoku fanauʻi mai ki he taimi faingataʻá.”​—Palōveepi 17:17.

Kumi ki ha ngaahi faingamālie ke tokoni ai ki he niʻihi kehé. ʻI heʻetau fai ʻa e ngaahi ngāue lelei maʻá e niʻihi kehé, ʻoku ʻikai ngata pē hono fakaivimālohiʻi ai hotau vā mo kinautolú ka ʻokú ne toe ʻai foki ke tau fiefia ange.

• Tefitoʻi moʻoni Fakatohitapú: “ʻOku ʻi ai ʻa e fiefia lahi ange ʻi he foaki atú ʻi he maʻu maí.”​—Ngāue 20:35.

Vakaiʻi ʻemau uepisaití ki ha fakamatala ʻaonga lahi ange mei he Tohi Tapú fekauʻaki mo e founga ke langa hake ai ha kaungāmeʻa lelei.