ʻOlunga ʻi he toʻohemá: Marek M. Berezowski/Anadolu Agency via Getty Images; ʻi lalo ʻi he toʻohemá: Halfpoint Images/Moment via Getty Images; loto-mālie: Zhai Yujia/China News Service/VCG via Getty Images; ʻolunga ʻi he toʻomataʻú: Ismail Sen/Anadolu Agency via Getty Images; ʻi lalo ʻi he toʻomataʻú: E+/taseffski/via Getty Images
HANGANAKI LEʻO!
2023: Ko e Taʻu ʻo e Loto-Moʻuá—Ko e Hā ʻa e Lau ʻa e Tohi Tapú?
ʻI he lolotonga ʻa e taʻu 2023, naʻe lahi ʻa e ngaahi meʻa naʻe hoko takatakai ʻi he māmaní ʻoku fakamoʻoniʻi māʻalaʻala ai ʻoku tau moʻui ʻi he taimi ʻoku lave ki ai ʻa e Tohi Tapú ko e “ngaahi ʻaho fakaʻosí.” (2 Tīmote 3:1) Fakatokangaʻi koe ngaahi meʻa ʻoku lolotonga hoko ʻi hotau ʻahó naʻe tomuʻa tala pē ia ʻe he Tohi Tapú.
Ko e Tohi Tapú mo e ngaahi meʻa ʻoku hoko ʻi māmani lahí
“Ngaahi tau pea mo e ongoongo ʻo e ngaahi tau.”—Mātiu 24:6.
“Ko e ngaahi fepaki fakamālohí ʻoku fakautuutu ia ʻi he ngaahi tafaʻaki kehekehe ʻo e māmaní.”a
Sio ki he kupu “Ko Hai Te Ne Fakahaofi ʻa e Kau Siviliane?” mo e “Laka Hake ʻi he $2 Tiliona ʻa e Fakamole ki he Meʻa Fakakautau ʻi he Māmaní.”
“Ngaahi mofuike ʻi he feituʻu ki he feituʻu.”—Maʻake 13:8.
“Talu mei he kamataʻanga ʻo e taʻu 2023, kuo ʻi ai ʻa e ngaahi mofuike ʻe 13 ʻi māmani lahi ʻa ia ʻoku laka hake ʻi he 7 hono mālohí, ko e taha ia ʻa e fika māʻolunga taha kuo lēkooti ʻi he taʻu ʻe taha.”b
Sio ki he kupu “Taaʻi ʻe ha Ngaahi Mofuike Fakatupu Maumau Lahi ʻa Toake mo Sīlia.”
“Ngaahi meʻa fakamanavahē.”—Luke 21:11.
“Kuo ngata ʻa e kuonga ʻo e māfana ʻa e māmaní; kae hoko mai eni ki he kuonga ʻo e vela fakaʻulia ʻa e māmaní.”—António Guterres, sekelitali seniale ʻa e Puleʻanga Fakatahatahá.c
Sio ki he kupu “Vela Lahi Fakaʻulia ʻa e ʻEá ʻi Māmani Lahi ʻi he Faʻahitaʻu Māfana 2023.”
“Ngaahi nounou fakameʻatokoni.”—Mātiu 24:7.
“2023: Ko e taʻu loto-moʻua lahi ia ʻa e faʻahinga ʻoku nau fāinga ke tokonaki maʻa honau ngaahi fāmilí.”d
Sio ki he kupu “Fakautuutu ʻa e Nounou Fakameʻatokoni ʻi Māmani Lahí Koeʻuhi ko e Taú mo e Feliuliuaki ʻa e ʻEá.”
“Ngaahi taimi fakalilifu ʻa ia ʻe faingataʻa ke fekuki mo ia.”—2 Tīmote 3:1.
“Ko e toko taha ʻi he toko valu ʻi māmani lahi ʻoku nau moʻua ʻi he puke fakaʻatamaí.”e
Sio ki he kupu “Hohaʻa ki he Hōloa Fakaʻatamai ʻa e Toʻutupú.”
Ko e hā ʻe lava ke tau ʻamanekina ʻi he taʻu 2024?
ʻOku ʻikai ha taha ʻokú ne ʻiloʻi ʻa e meʻa ʻe hoko ʻi he taʻu 2024. Ka ʻoku fakahaaʻi ʻe he ngaahi meʻa ʻoku hoko ʻi māmaní, ʻoku vavé ni ke fetongi ʻe he Puleʻanga ʻo e ʻOtuá pe founga pule fakahēvaní, ʻa e ngaahi founga pule fakaetangatá pea fakangata ʻa e ngaahi tupuʻanga kotoa ʻo e faingataʻá mo e loto-moʻuá.—Taniela 2:44; Fakahā 21:4.
Lolotonga ʻetau tatalí, ʻe lava ke tau hanga ki he ʻOtuá ki ha tokoni ʻi he taimi ʻoku tau ongoʻi loto-moʻua aí. ʻOku pehē ʻe he Tohi Tapú:
“ʻI heʻeku manavaheé, ʻoku tuku ʻeku falalá ʻiate koe.”—Saame 56:3.
ʻE lava fēfē ke tau fakahāhā ʻa e falala ki he ʻOtuá? ʻOku mau fakaafeʻi koe ke ako lahi ange ki he talaʻofa ʻa e Tohi Tapú ʻo fekauʻaki mo ha kahaʻu ʻa ia heʻikai ke toe ʻi ai ha faingataʻaʻia. ʻAhiʻahiʻi ʻemau ako Tohi Tapu fetalanoaʻaki taʻetotongí ke sio ki he founga ʻe lava ke ke maʻu ʻaonga ai mo ho fāmilí mei he ngaahi talaʻofa ʻoku ʻomai ʻe he Tohi Tapú.
a Foreign Affairs, “A World at War: What Is Behind the Global Explosion of Violent Conflict?” ʻe Emma Beals mo Peter Salisbury, ʻOkatopa 30, 2023.
b Earthquake News, “Year 2023: Number of Major Earthquakes on Course for Record,” Mē, 2023.
c Ngaahi Puleʻanga Fakatahatahá, “Secretary-General’s Opening Remarks at Press Conference on Climate,” Siulai 27, 2023.
d Polokalama Fakameʻatokoni ʻa Māmaní, “A Global Food Crisis.”
e Kautaha Moʻui ʻa Māmaní, “World Mental Health Day 2023,” ʻOkatopa 10, 2023.