Feinga ke Maʻu ha Taha ʻe Fie Fanongo
1 Ko e tokolahi ʻo e kakai ʻoku tau fetaulaki ʻi he ngāue fakamalanga fale-ki-he-falé ʻoku ʻikai te nau fakakaukau maʻu pē ki he ngaahi meʻa fakalaumālié. ʻOku nau fuʻu tokanga taha nai ki he ngaahi mēmipa ʻo e fāmilí, ngaahi faingataʻa fakaʻikonōmika, pe ngaahi palopalema fakaekinautolu. Ke kamata ha fetalanoaʻaki, ʻoku faʻa lelei tahá ke lea ʻo kau ki ha ngaahi meʻa ʻoku mahuʻingaʻia ki ai ʻa e tokolahi ʻi he feituʻu ko iá. ʻE lava ke ngāueʻaki ʻa e ngaahi fehuʻi ke langaʻi ʻa e mahuʻingaʻiá, koeʻuhi ʻoku ʻai ʻe he meʻá ni ke fakakau ʻa e tokotaha-ʻapí ki he fetalanoaʻakí. Ko e ola lelei tahá ko ha ngaahi fehuʻi ʻe ʻikai ke ongoʻi mā ai ʻa e kakaí ke fakahā ʻa e anga ʻo ʻenau fakakaukaú.
2 Te ke maʻu nai ha taha ʻe fie fanongo ʻaki haʻo kamata ʻa e fetalanoaʻakí ʻi ha founga meimei tatau mo ʻeni:
◼ “Mālō ʻetau maʻu e pongipongí ni. Ko hoku hingoá ko _____. ʻOku ou nofo ofi mai ki he feituʻu ko ʻení. ʻOku tokolahi ʻa kinautolu kuo u lea ki ai ʻi he pongipongí ni ʻoku nau tokanga ʻo kau ki he [fakahā ha meʻa ʻi he ongoongó naʻe toki hoko ʻo kau ki he feituʻu ko iá pe ha meʻa ʻoku tokanga ki ai ʻa e kakai ʻo e koló]. ʻOkú ke fakakaukau ko e taumuʻa ia ʻa e ʻOtuá ke pehē ni pē ʻa e māmaní?” Tuku ke ne tali. ʻI he aʻu ki he tuʻunga ko ʻení ʻe malava ke tuʻuaki ʻa e tuleki Moʻui ʻi ha Māmani Foʻou Melino. Lave taimi nounou ki he fakatātā ʻi he peesi 1 mo e fakamatala ʻi he palakalafi 1-3 ʻo fakatatau ki he taimí. Kapau ʻe maʻu ha mahuʻingaʻia, ʻe lava ke fakahā leva ʻa e tohi ko e Moʻui Taʻengata. Te ke lava ʻo fakahanga ʻa e tokangá ki he Sāme 37:9, 10 ʻo hangē ko ia ʻoku hiki ʻi he peesi 157 pea lau ia mei he tohí. Ngāueʻaki ʻa e ngaahi fakatātā ʻi he peesi 156-157, ke fakamatalaʻi ʻe ʻi ai ʻi he māmaní kotoa ʻa e ngaahi tuʻunga angatonu ʻi he mole atu ʻa e fulikivanú.
3 ʻAi ke mateuteu maʻu pē ke tuʻuaki ha taha ʻo e ngaahi tuleki ʻe valu. ʻOku fuʻu loto-hohaʻa ʻa e kakai ʻi he feituʻu kotoa pē ki he tō lalo ʻa e ngaahi ʻulungaanga leleí. ʻE lava ke ngāueʻaki ʻa e tuleki ko e ʻE Kei Tuʻu ʻa e Māmani ko Ení? ke ne langaʻi ʻa e mahuʻingaʻia ʻi he kakai ʻi ho feituʻú. ʻI he ʻikai ke fuʻu lōloa ʻa e fakamatala ki he ngaahi tuʻunga koví, fakahanga ʻa e tokanga ʻa e tokotaha-ʻapí ki he kupu ʻi he peesi 5 ko e “Ope ʻo e maumau lao.” Pea hoko atu ke fetalanoaʻaki ki he palakalafi ʻe ua hono hokó ke fakahā ʻa e meʻa pau ʻoku fakahā ʻe he Tohitapú ki he kahaʻu. Ko e ngaahi makasini ʻoku lolotonga maʻú pea pehē ki he ngaahi ʻīsiu motuʻa ʻo e Ko e Taua Leʻo mo e Awake! ʻe lava ke tuʻuaki ʻi ha faʻahinga taimi pē ʻo tānaki atu ki he ngaahi ʻaho makehe ʻoku tuʻuaki ai ʻa e ngaahi makasiní.
4 Manatuʻi ko ʻetau taumuʻá ke langaʻi ʻa e mahuʻingaʻia ki he pōpoaki ʻo fekauʻaki mo e Puleʻangá. Ke maʻu ha taha ʻe fie fanongó, kuo pau ke tau ʻuluaki maʻu ʻa e tokanga ʻa e tokotaha-ʻapí pea ke ueʻi ʻene fakakaukaú. ʻE fakatupunga heni ki he kakai hangē ha sipí ke nau fie “fanogo ki he folofola ae Otua ko Jihova” ʻo fekauʻaki mo ʻene taumuʻa ki he kakaí.—Sāme 85:8, PM.