Ko e Taua Leʻo mo e Awake!—Ko e Makasini ki Hotau Taimi Fakavavevavé!
1 ʻI hono fakahoko ʻa e kikite ʻi he Tohi Tapú, ʻoku ngaʻuta ʻa māmani ʻi he ngaahi meʻa ʻoku hokó! ʻI heʻetau fakakaukau ki he meʻa ʻoku hoko takatakai ʻiate kitautolu ʻi he māmaní pea pehē foki mo e loto kautaha fakateokalatí, ʻoku lava ke tau maʻu ʻa e mahino kakato ki he fakavavevave ʻo ʻetau malangaʻi ʻa e “ongoongo lelei” ʻo e Puleʻangá. (Mk. 13:10) ʻOku tau maʻu ai ha ʻuhinga ke tau hanganaki faivelenga ʻi heʻetau ngāue fakamalangá ʻi he lolotonga ʻo e māhina ko ʻEpelelí.
2 ʻOku fakamamafaʻi ʻa e mahuʻinga ʻo ʻetau pōpoakí ʻe he ngāue makehe te tau fai ʻi he māhina ní. ʻOku tau tatali manava-kāvakava ki hano tuku ange mai ʻa e Ongoongo ʻo e Puleʻangá ʻa ia te tau tufaki ʻi he lolotonga ʻo ʻEpeleli mo Meé. Ke fakatupu ʻa ʻetau loto-māfana ki he ngāué ni pea pehē ki hono fakatupulekina ʻa e mahuʻingaʻia ʻi hotau feituʻú, ʻe ʻomai ʻi he Ko e Taua Leʻo mo e Awake! ha ngaahi kupu taimi totonu ʻokú ne fakamamafaʻi ʻa e ʻuhinga fakaekikite ʻo e ngaahi meʻa fakatupu hohaʻa ki he māmaní. ʻOku anga-fēfē ke tau teuteu ha tuʻuaki te ne ueʻi ʻa e mahuʻingaʻia ʻi he ngaahi makasiní?
3 Ngalingali te ke lava ke faʻufaʻu ha tuʻuaki ola lelei ʻi he muimui ki he ngaahi lākanga tefito ko ʻení: (1) Filifili ha kupu ʻi he taha ʻo e ngaahi makasiní ʻokú ke pehē ʻe fakamānako ki he kakai ʻi ho feituʻú. (2) Filifili ha fakamatala pe ha konga Tohi Tapu ʻoku lave ki ai ʻi he kupu ko ʻení ʻa ia ʻokú ke tui ʻe langaʻi ai ʻa e mahuʻingaʻia ʻa e tokotaha ʻapí. (3) Teuteu ha tuʻuaki nounou pē ʻo kau ki ai ʻa e lea fakafeʻiloaki anga-fakakaumeʻa, ko ha fehuʻi pe fakamatala ʻokú ne fakaeʻa ha fakakaukau mahuʻinga Fakatohitapú, mo ha fakaafeʻi moʻoni ke tali ʻa e ngaahi makasiní. ʻOku hangē ko ia ʻokú ke ʻiló, ʻoku faingofua ʻaupito pea ʻoku ʻikai ke fihi. Mahalo te ke fakataha mo ha tokotaha malanga kehe ʻa ia kuó ke ngāue mo ia ʻi he ngāue fakamalangá ʻo teuteu ha tuʻuaki.
4 ʻOku fakamatalaʻi ʻa e “Ko e Ngaahi Tupuʻanga ʻo e Fakaʻikaiʻi ʻOtuá” ʻi he “Taua Leʻo” ʻo ʻEpeleli 1. ʻI hono tuʻuaki ʻo e makasiní, te ke pehē nai:
◼ “Ko e kakai ʻe niʻihi kuo kamata ke ʻikai te nau toe tui ki he lotú. Kuó ke fetaulaki mo ha tokotaha pehē?” Pea lave ki ha fakamatala ʻi he kupu ko ʻení.
5 Te ke ngāueʻaki nai ʻa e “Taua Leʻo” ʻo Maʻasi 1 mo e kaveinga ko e “ʻOku Sio Mai ʻa e Kau Maté?” ʻE tali lelei nai ʻa e lea kamata ko ʻení:
◼ “ʻOku manavahē ʻa e kakai tokolahi ke nau ʻalu ʻo fakalaka ʻi ha faʻitoka ʻi he poʻulí. Ko e niʻihi ʻoku nau talanoa ki he faʻahinga kuo mate ʻoku nau ʻofa aí ʻi heʻenau ʻaʻahi ki honau faʻitoká. ʻOkú ke pehē ʻoku sio mo ongoʻi mai ʻe he kau maté kitautolu? ʻOku fakahā ʻe he kupu ko ʻení ha tali fakafiemālie ki he fehuʻí ni. . . . ”
6 Ki muʻa ke ke ʻalu ʻi he ngāue fakamalangá, fēfē ke ke ʻahiʻahiʻi ʻa hoʻo tuʻuakí mo ha tokotaha malanga kehe ke ke alāanga mo hoʻo tuʻuakí? ʻOku ngalingali te mo lava ʻo fevahevaheʻaki ʻa e ngaahi fokotuʻu ʻaonga ʻe tupulaki ai ʻa hoʻo ola leleí mo ke maʻu ai ha loto-maʻu lahi ange.
7 ʻI he fakaofi mai ʻa e ngataʻanga ʻo e tuʻu ko ʻení, ʻofa ke tau fakalahi ʻa ʻetau feinga ke tokoniʻi ʻa e faʻahinga loto-totonú ke hao mei Pāpilone ko e Lahi. (Fkh. 18:4) ʻOku mahuʻinga ʻa e kaunga ʻo e Ko e Taua Leʻo mo e Awake! ʻi he ngāue ko ʻení ʻe ʻikai ke toe fai. ʻOku tau fakamālō kuo ʻomai ʻe Sihova ʻa e ngaahi meʻangāue lelei ko ʻení ke tau ngāueʻaki!