Fakatupulekina ʻa e Mahuʻingaʻia Naʻe Langaʻi ʻe he Ongoongo ʻo e Puleʻangá Fika 36
1 Kuó ke tufa ʻo ʻosi ho ʻinasi ʻi he Ongoongo ʻo e Puleʻangá Fika 36? ʻOku ʻeke ai ha fehuʻi feʻungamālie ki he faʻahinga kotoa pē ke nau fakalaulauloto ki ai: “Ko e Mileniume Foʻoú—Ko e Hā ʻOku Tauhi Mai ʻe he Kahaʻú Maʻaú?” ʻI he fakaofi mai ʻa e taʻu 2000, ko e ngaahi ʻamanaki ki he meʻa ʻe ʻomai ʻe he mileniume foʻoú naʻe kehekehe lahi. ʻOku lāulea ʻa e Ongoongo ʻo e Puleʻangá Fika 36 ki he niʻihi ʻo e ngaahi ʻamanaki ko iá pea ʻoku fakamanatu mai ai kiate kitautolu ko e ngaahi tuʻunga ʻo e māmaní ʻoku ʻikai te ne ʻomai ha makatuʻunga ki ha fakatuʻamelie. Ko e mileniume pē te ne ʻomai ʻa e melinó mo e maluʻangá ʻa ē ʻoku kumi ki ai ʻa e tokolahi taha ʻo e kakaí ko e Pule Mileniume ʻa Kalaisi Sīsuú. Ko ʻetau tuipau ki he moʻoni ʻo hono Puleʻangá ʻokú ne fakaʻaiʻai kitautolu ke tau tufaki ʻa e Ongoongo ʻo e Puleʻangá Fika 36 ki he tokotaha kotoa pē te tau lavá.
2 Ngaahi Tali ki he Ongoongo ʻo e Puleʻangá: Ko hono tufaki ki muʻa ʻa e Ongoongo ʻo e Puleʻangá naʻe fakamoʻoniʻi ʻa ʻene hoko ko ha fakaueʻiloto lelei kiate kitautolu ʻi heʻetau ngāué. ʻI he fekauʻaki mo e Ongoongo ʻo e Puleʻangá Fika 35, naʻe tohi ʻe he vaʻa ʻi Kānatá: “Ko e feingangāue makehe ko ʻení naʻe poupouʻi loto-māfana ia ʻe he kau malanga mo e kau tāimuʻa ʻi he malaʻe malangá, pea naʻe maʻu ʻa e fiefia ʻi he ngaahi meʻa fakalototoʻa lahi naʻe hokosiá.” ʻOku ʻikai ha toe veiveiua kuó ke fakahā ʻa e loto-māfana tatau ki hono tufaki ʻo e Ongoongo ʻo e Puleʻangá Fika 36.
3 ʻOku fakataimi-tēpileʻi ʻa e feingangāue lolotonga ki he Ongoongo ʻo e Puleʻangá ke ngata ʻi Nōvema 17, 2000. Kuo ʻosi ngāueʻi ʻa e kotoa ʻo e feituʻu naʻe vaheʻi atu ki hoʻo fakatahaʻangá? Kapau ʻoku ʻikai, ʻe kole atu nai ʻe he kau mātuʻá kiate koe ke ke hokohoko atu ʻa e feingangāué kae ʻoua ke aʻu ki he ngataʻanga ʻo Nōvemá.
4 Ko e hā ʻa e tali kuo fai ʻi heʻene aʻu mai ki he taimi ní ki hono tufaki ʻa e Ongoongo ʻo e Puleʻangá Fika 36 ʻi ho feituʻú? Ko e kakai tokosiʻi pē te nau fakafonu ʻa e kūponí pea kole ha tatau ʻo e polosiua Fiemaʻu mo e/pe ko ha ako Tohitapu ʻi ʻapi. Kae kehe, ko e tokolahi taha ʻo e faʻahinga naʻa nau ʻuluaki fakahā ʻa e mahuʻingaʻia ʻi he kaveinga ʻo e mileniumé ʻoku ngalingali ʻe ʻikai te nau fai ha meʻa kae ʻoua kuo toe ʻaʻahi atu ha taha ʻo e Kau Fakamoʻoni ʻa Sihová. Ko e faʻahinga kotoa pē naʻa nau fakahā ʻa e mahuʻingaʻiá ʻoku totonu ke toe fai ha ʻaʻahi ki ai. Ko fē ʻa e taimi lelei ke fai ai ʻení? Ko e toe ʻaʻahí ʻoku totonu ke fai ʻi he vave taha ʻe ala lavá.
5 Fakatokangaʻi ʻa e ngaahi meʻa naʻe hokosia ko ʻení ʻa ia naʻe maʻu mei he toe foki ki he ngaahi Ongoongo ʻo e Puleʻangá Fika 35 naʻe tukú. Ko ha tāimuʻa ʻi ʻAilani naʻá ne tuku ha Ongoongo ʻo e Puleʻangá ʻi ha tokotaha ʻoku ʻoʻona ha falekai. Naʻe maongo ki he fefiné ʻa e pōpoakí pea naʻá ne fakaafeʻi ke foki ange ʻa e tuofefiné. Naʻe toe foki ki ai ʻa e tuofefiné hili e ʻaho ʻe ua, pea naʻe kamata ha ako Tohitapu. ʻI Tenimaʻake, ko ha tatau ʻo e Ongoongo ʻo e Puleʻangá naʻe tuku ia ʻi ha fale naʻe ʻikai ke ʻi ai ha taha ʻi he ʻapí. ʻI he ʻaho tatau ko iá, ko e fefine naʻe nofo aí naʻá ne ʻave ʻa e kūponí ki he ʻōfisi vaʻá, ʻa ia naʻe ʻoatu ia ki he fakatahaʻanga fakalotofonuá. Ki muʻa ke ʻosi ʻa e uiké, naʻe ʻaʻahi atu ʻa e ongo tuofāfine ʻe toko ua, naʻe fokotuʻutuʻu ha ako, pea naʻe maʻu ʻe he fefiné ʻa ʻene ʻuluaki fakataha ʻi he Fale Fakatahaʻangá!
6 Meʻa ke Leaʻaki ʻi Hoʻo Toe Fokí: Ko hono fai ha ngaahi toe ʻaʻahi ki he Ongoongo ʻo e Puleʻangá naʻe tukú ʻoku faingofua pē pea ko ha konga fakafiefia ia ʻo ʻetau ngāue fakafaifekaú. ʻI he fai peheé, ʻe fakapotopoto ange ke ke toʻotoʻo ha tatau ʻo e Ongoongo ʻo e Puleʻangá Fika 36, koeʻuhí naʻa kuo ʻikai ke maʻu nai ʻe he tokotaha-ʻapí ʻene tataú. Te ke ʻahiʻahiʻi nai ʻa e ngaahi fokotuʻu ko ʻení.
7 ʻI he hili ʻa hoʻo fakamanatu ange ki he tokotaha-ʻapí pe ko hai koé, te ke pehē nai:
◼ “Naʻá ku tuku heni ha kiʻi lauʻi tohi ʻa ia ʻoku fakakaveinga ‘Ko e Mileniume Foʻoú—Ko e Hā ʻOku Tauhi Mai ʻe he Kahaʻú Maʻaú?’ ʻIkai naʻe fakalototoʻa ʻa hono lau ʻe vavé ni ke kamata ʻa e Pule Mileniume ʻa Kalaisi Sīsuú, pea te ne ʻomai ʻa e ngaahi tuʻunga faka-Palataisi ki he foʻi māmaní? [Fakahā ange ʻa e ngaahi fakatātā ʻo e Palataisí ʻi he Ongoongo ʻo e Puleʻangá Fika 36.] ʻI he peesi fakamuimuí, ʻoku fakaafeʻi atu ai koe ke ke kole ha tatau ʻo e polosiua Ko e Hā ʻOku Fiemaʻu ʻe he ʻOtuá Meiate Kitautolú?” Fakahā ange ʻa e polosiuá, huke ki he lēsoni 5, lau ʻa e ʻuluaki fehuʻí mo e palakalafi 1 mo e 2, pea kole ange ki he tokotaha-ʻapí ke ne fai ha fakamatala. Lau pea fakamatalaʻi ha konga Tohitapu ʻe taha pe ua. Kapau ʻoku malava, lāulea ki ha fehuʻi mo ha palakalafi ʻe taha, pea fokotuʻutuʻu leva ke toe foki atu ʻo hoko atu ʻa e fetalanoaʻakí.
8 Koeʻuhi ko e tuʻuaki hoko mai ki Nōvemá ko e polosiua “Fiemaʻu” pe ko e tohi “ʻIlo,” te ke pehē nai:
◼ “ʻI heʻeku ʻaʻahi fakamuimui mai kiate koé, naʻá ku tuku atu ai ha tatau ʻo e ‘Ko e Mileniume Foʻoú—Ko e Hā ʻOku Tauhi Mai ʻe he Kahaʻú Maʻaú?’ ʻOku ʻi loto ai ha tuʻuaki ʻo ha ako Tohitapu taʻetotongi ʻi ʻapi. Ko ʻeku toe foki maí ke fakahaaʻi atu kiate koe ʻa e tokoni fakaeako ʻoku mau ngāueʻakí. [Fakahā ange ʻa e polosiua Fiemaʻu, pea huke ki he takafi ʻi muí; pe fakahā ange ʻa e tohi ʻIlo, pea huke ki he peesi 188-189.] Ko e Mileniume ʻoku leaʻaki heni ʻi he Tohitapú te ne ʻomai ʻa e ngaahi tuʻunga ʻo hangē ko ia ʻokú ke vakai ki ai ʻi he fakatātā ko ʻení. Ke taau ki he moʻui ʻi he Palataisí, ʻoku fiemaʻu ke tau maʻu ʻa e ʻiloʻi totonu ʻo e ʻOtuá. Kātaki tuku ke u fakahāhaaʻi nounou atu ʻa e founga ʻoku mau ako ai ʻa e Tohitapú.”
9 Ko hono tufaki ʻa e Ongoongo ʻo e Puleʻangá Fika 36 kuó ne ueʻi kitautolu ke tau toe fakalahi ange ʻetau kau ʻi he ngāue fakafaifekaú, ʻo fakatupu mai ai ha fakamoʻoni lahi. ʻOku ngalingali kuo ueʻi ʻe he meʻá ni ʻa e mahuʻingaʻia ʻa e faʻahinga tāutaha tokolahi ʻi he feituʻú. Ko ʻetau feinga fāʻūtaha ke fakatupulekina ʻa e mahuʻingaʻia ko ʻení, fakataha mo e tokoni ʻa Sihová, ʻe iku ai ki heʻetau fiefia ʻi hono ʻiloʻi ʻa e faʻahinga lahi ange hangē ha sipí.—Mt. 10:11; Ng. 13:48, 49, 52.